الأحد، يوليو 17، 2011

هو انا طبيعيه !!



لما ببص لنفسي وابص لبنى جنسي من ابناء هذا الجنس اللطيف جدا جدا، بقول الحمد لله انى مش زيهم، الحمد لله يارب على نعمه العقل اللى ادتهالى دى، الحمد لله يارب.
بستغرب انا جدا للعشق والوله والولع الفظيع اللى عند حواء لعملية التسوق والشراء لحاجات هى مش عايزاها او حتى مش فى الأولوية
.
انا لما بكون نازلة عاوزة اشترى بلوزة  .. خلاص ببقى نازلة وبدور ومركزه كل تركيزي على البلوزة اللى انا عايزاها
مش ببص فى محل أكسسورات مثلا على البلوزة اللى انا عايزاها، ولا بدخل محل جزم وشنط ابص بصه يمكن الاقى البلوزة اللى انا عاوزها تحت رف من الرفوف مثلا ..



لما بنزل مع واحده صاحبتى مثلا عاوزه تشترى حاجه معينه، ممكن نلف ونلف وكل ما تشوف محل تدخله تبص بصه بس .. وطبعا مع كل بصه فيه شيء بتشتريه، وممكن فى الآخر ما تشتريش الحاجه الأساسية اللى احنا نازلين اصلا علشان نشتريها، وتخلص فلوسها فى شوية حاجات تانية مالهاش اى تلاته لازمه اصلا اصلا :)

احيانا بسال نفسي، هو انا اللى مش طبيعيه ولا هما اللى مش طبيعين !!

يعني انا اللى ماليش فى "الشوبنج" بنت طبيعيه؟؟ .. ولا لأ .. الطبيعي هو انى ابقى مجنونة شوبينج واستمتع بيه وباللف على الحاجات :)



هناك 6 تعليقات:

انسان يقول...

الموضوع ده مش فى البنات بس موجود فى الولاد كمان والبنى ادم العاقل هو البيتصرف زيك ويجيب الحاجه الهو عايزها ومحتجها وتكون اولويه عنده

غير معرف يقول...

هههههههههههه

بصى انتوا حاجه فعلا غريبه .. و عندكم قدره ع الملاحظه اعلى من قدرة الذكور كتير و لذلك معظم محلات الملابس بتبقى ليكم .. عشان تكسب .. لأنكم دايما بتتفرجوا و وارد تشتروا .. الموضوع فعلا مزعج .. انا عن نفسى كفلان ابن علان مش من هواة التسوق و بيبقى يوم ممل لما انزل اجيبلى لبس او خلافه ..

ربنا يهدى البنات و يكملك بعقلك .. و تبطلى تروحى لابو علاء بين قوسين فيلا


:P

تسلم إيديك

Unknown يقول...

"إنسان"
صحيح ان الموضوع ده موجود فعلا ما بين الجنسين ومنتشر اكتر ما بين البنات ..
بس هو فعلا موضوع ممل جدا .. وربنا يهدي الجميع

نورتنى :)

Unknown يقول...

صديقى الغير معروف :)
هى مسالة الشوبينج والمحلات مش علشان قوة الملاحظة بس .. يمكن تكون جزء من العملية ..
هو الجزء الاكبر من وجهه نظرى ان البنات بتحب دايما يبقى شكلها حلوه وبتحب التجديد .. بس فيه ناس بتعمل ده بهبل وبتجيب حاجات غريبة بفلوس غريبه ..

وعلى فكره عمرى ما رحت لابو علاء ولا ابو رامى حتى :P
ولا اعرف حتى هو فين :))


منورنى دايما

بنـوتــــة يقول...

تعالي جنب أختك يا حبيبتي
هو بيني و بينك مش بيبقى موضوع ملل بس
ه كتير بيقلب بحالة شلل كلي و ججزئي و معتبر و كل اللي الواحد يتخيله
أنا فعلاً لما ببقى بدور على حاجة ممكن ألف عليها اليوم كله و في الآخر ملاقيش اللي يعجبني و أسمع تريقة للركب
بس على الأقل ممكن أروح بتاكسي
لكن ساعات أنزل مع حد مثلاً
نبقى هنروح شحاته
و أحاول أفتكر كنا هنجيب إيه أصلاً
بس يالا بقى
الجنس اللطيف .. محتاجله تصنيف
:D

Unknown يقول...

ايون يا مروتى ..احنبك كده وانتى زيي :))
عارفه انا بحب الشوبينج انا كمان واللف على المحلات بس لما اكون بجد عايزه حاجه، ولما اشتري اللى انا عايزاه فعلا وبدور عليهمش اى حاجه تانية ..

وببقى فرحانه قوى لما بتيجى عندى وتعملى كومنت بقى :))