بزغزغ نفسي

بنضحك من همنا ولا بنبكى من فرحنا

خايفين مطمنيين ..

هو فيه ايه بالظبط !!!

انا مش عارفه ومش عارفه أعرف ..

بس هو اكيد فيه حاجه بتحصل ..

احيانا بحس انى مبسوطه قوى وفرحانه

كانى طايره وبمشى فوق السحاب

واحيانا وبدون سبب برضه

بلاقينى مضايقه ومكتئبه وحزينه

مش فاهمانى .. مش فاهمه ايه بيبسطنى وايه بيضايقنى

يعني هو انا عايزه ايه فى الاخر كده

واللى بيضايقنى فى نفسي لما بضايق انى مش بلاقى سبب يخلينى اضايق

يعني لما بقارن نفسي بغيرى من الناس على الاقل اللى فى سنى بحس ان الحمد لله ربنا مدينى حاجات كتير حلوه قوى ومش عندهم .. ومش معنى كده ان عندى كل حاجه لان ربنا ما بيديش للبنى ادم كل حاجه فى الدنيا لحكمته سبحانه .. اننا نشتاق للجنة ولنعيمها .. لكنه عادل برضه فى توزيع ارزاقنا ..

بس يمكن برضه المثل اللى بيقول ربنا وزع العقول كل واحد عجبه عقله وزع الارزاق ماحدش عجبه رزقه ..

عجيب أمر البنى ادم مننا مش بيبص ومش بيركز غير على الحاجات اللى ناقصاه بس ومن كتر تركيزه عليها بيحس انها حاجات كبيره قوى او هو اللى بيكبرها لنفسه وبيكبرها فى دماغه مع انها ممكن تبقى فى الحقيقة حاجات صغيره وماحدش بيشوفها كبيره غيره وهو السبب فى كده اصلا.

وانا زى باقى البشر فى اوقات بكون فيها ضعيفه ومكسوره

يمكن علشان كده بدور على حاجات تكآبنى او بحاول ابرر لنفسي انا ليه مضايقه

!!واللى بيضايقنى بقى اكتر انا ليه اضايق اصلا .. انا مش ناقصنى حاجه

وحتى لو ناقصنى فاكيد ان فيه ناس غيري ما عندهمش نص اللى عندى، يبقى ليه اضايق من اساسه.. وبالتالى باضيف لنفسي ضيق فوق ضيقى اللى انا فيه

انا اصلا مضايقه وكمان مضايقه انى اصلا مضايقه .. فاهم حاجه!!

بس أجمل حاجه لما فى وسط ده كله تحصل اى حاجه عبيطه تخلينى اضحك او حتى ابتسم غصب عنى ..

بس يمكن الضحك غلى شوية .. يمكن اسبابه بقيت قليلة شوية الأيام دى

ويمكن انا اللى ماليش نفس اضحك من جوايا حتى لو باين قدام الناس انى بضحك ومبسوطة

بس فى الآخر بقى انا بنسى اى حاجه وكل حاجه لما برجع اخر النهار البيت واترمى فى حضن امى .. بحس انى للحظات رجعت طفلة صغيرة تانى ماعندهاش مشاكل ولا هموم ..

وبفتكر واحد قريبى كان عجوز قوى كان بيقولى انا  لو مالقتش حاجه تضحكنى بزغزغ نفسي :)