الأربعاء، أغسطس 29، 2012

صارح نفسك .. حب نفسك

جميل جدا لما تكون صريح مع الناس اللى حواليك فى كل مكان والاجمل كمان لما تكون صريح مع نفسك .. والأجمل وأجمل كمان لما صراحتك مع نفسك ومع الناس تنعكس على تصرفاتك، يعني لما تحس بحاجة عايز تقولها تقولها على طول من غير تردد، ولما تحس بحاجة عايزة تعملها تقوم تعملها من غير تردد، يعني تتحرك بثقة ما دمت مقتنع بالشيء اللى بتعملها او بتقوله.
 
جميل جدا لما يكون قلبك هو المقياس فى اللى بتقوله وبتعمله، يعني تقول اللى انت حاسس بيه وما تقولش غير اللى انت حاسه فعلا، ولو عقلك عايز يعمل حاجه اعملها بس حسها بقلبك الاول، لانه هيفرق كتير قوى لما تعمل حاجة بعقلك لوحده ولما تعمل حاجة عقلك وقلبك راضيين عنها، لأن وقتها بس هتوصل لنوع غريب من السعادة.
 
يعني لو بتحب حد ما تلفش وتدور كتير، اسهل طريقة توصل بيها احساسك هى الصراحة، تروح وتقوله انا بحبك، دايما اقصر طريق للوصول هو الخط المستقيم.
 
لو مضايق من حد ما تاخدش منه جنب وتتحاشى التعامل معاه او تعامله بطريقة بايخه، لأ .. انت تروح وتتكلم معاه وتقوله انك متضايق منه ومتضايق منه ليه كمان.
 
فكرة انك بتقول اللى جواك زى ما انت حاسه فكره مريحه جدا وفى نفس الوقت فكرة مبهجه، وهتحس لما تعملها بسعادة جواك من نوع غريب ولو ما كنتش جربتها قبل كده فاحب اقلك انه نوع جديد من السعادة غير اى حاجه تانيه عملتها فى حياتك.
 
الصراحة مع النفس هى الاساس وهى اللى بتخلى الانسان يعيش حياة متوازنة نفسيا وعاطفيا لان اللى ما يقدرش على نفسه وما يفهمش نفسه كويس مش هيقدر يقنع حد بنفسه ولا برأيه ولا بأى حاجة.
 
ولان الانسام الصريح مع نفسه هو اللى بيقدر يواجه الناس باللى هو عايزه وما بيخافش من حد غير ربنا، ومادام حاسس بالحاجه ومؤمن بيها بيعملها.
 
 

الجمعة، أغسطس 24، 2012

هتصبر عليا !!



من زمان وانا بحبك .. طول الوقت وانا بحبك 
يمكن تكون عارف وواخد بالك من الموضوع ده ويمكن تكون ما تعرفش لكن هتفضل الحقيقة اللى ما بتتغيرش هى انى بحبك 
لكن الحقيقة الاقوى اللى ما بتتغيرش برضه انى هفضل خايفه .. 
مش هقدر اجى وافتحلك قلبى واصرحلك كده بسهولة واقولك على اللى جواه .. واللى جواه كتير قوى
الخوف شيء غريب .. واحساس مؤلم .. ولكنه وبرغم انكارنا ليه فى بعض الاحيان الا انه موجود

بنحب وكلنا أمل .. لكن فيه نقطة خوف دايما عايشه جوانا ما بتخليش اى فرحه تكتمل
دايما اللذة ناقصة .. والفرحه فيها غُصة .. وكل ضحكة عليها شوية خوف ورعشه

عارفه ومتاكده ا انى بحبك .. ومتاكده اكتر انك بتحبنى لان احساسي هو اللى بيوصلى الرسالة دى
لكن  .. وهرجع واقول كلمة "لكن"  بعد كل بحبك .. .. فتقتلنى وتقتل فرحتى  لكنى مش عارفه اتخلص منها
بحبك لكن خايفه 

وعلشان بحبك لازم تطمنى بحبك اكتر واكتر .. لازم تتعلم الصبر وتطبقه عليا .. يعني ما تستعجلش عليا فى اى حاجه وما تطلبش منى اى حاجه فوق طاقتى .. وعلشان بتحبنى لازم تفضل جنبى وتساعدنى وتعلمنى كمان ازاى اشيل الخوف ده .. ازاى اكمل الصورة اللى ناقصة دايما وازاى اشيل الغمامة السودا من على عنيا..

علشان بحبك انا مستعده اغير حاجات كتيره فيا وفى طريقة تفكيرى وفى نظرتى للدنيا .. وعلشان بحبك مستعده ارجع ثقتى فى الدنيا من تانى .. علشان بحبك مستعده اتحدى الدنيا بحالها ومستعده اعدى صعاب ومشاكل كتير .. بس محتاجة لايدك تكون جنبى تقوينى وتشدنى وتساعدنى ..

السؤال بقى .. هتصبر قد ايه ؟؟

الاثنين، أغسطس 20، 2012

بحبك ليه !!! (1)

عارف ايه أكتر حاجة بحبها فيك؟؟ صبرك !!
علشان صبرت كل السنين دى وانت مستنينى
وعارف اكتر حاجه ما بحبهاش فيك ايه؟؟ صبرك !!
علشان لسه لحد دلوقتى بتختبر صبرى .. وانا من غيرك خلاص صبرى انتهى :(

الأحد، أغسطس 19، 2012

بحلم بأمل

ببساطة انا عارفه ان حلمى حلال .. وعارفه انه هيتحقق وكل يوم ايمانى ويقينى بانى هوصل للى انا عايزاه بيزيد، طاقة غريبة بتتولد كل يوم جوايا وبتأكدلى ان اللى انا عايزاه هيحصل وهيحصل زى ما انا نفسي واحسن كمان، ما اقدرش اقول مصدر الايمان ده ايه او ايه اسبابه ، لكن كل اللى اعرفه انه شيء ربنا بيولده جوا الانسان، شيء ممكن نسميه اليقين وممكن نسميه الثقة بالله.

ايو انا بحلم وبكبر احلامى وبوسعها وببنيها من غير اسوار ولا جدران، وكل يوم بكبرها اكتر، بحلم بأمل .. والحلم بأمل هو اجمل واقوى مليون مرة من الحلم من غير أمل .. فيه ناس بتحلم بس من اجل التمنى والرغبة بس ما عندهاش اى امل ان احلامها ممكن تتحقق وبسهولة جدا ممكن تتنازل عن كل احلامها عند اول مطب تقف عنده، اما انا فبحلم وكلى امل ان كل احلامى هتتحقق، وانا ناويها بقى انى هفضل وراها لحد ما تتحقق ان شاء الله.

بحلم بانسان هحبه جدا .. ونعيش انا وهو اجمل قصة حب فى الدنيا، ونتجوز ونجيب اولاد كتير ونفضل نحب بعض بعد الجواز زى ما حبنا بعض قبل الجواز واكتر بكتير واولادنا يتعلموا مننا يعنى ايه حب  وتضحيه واحترام.

بجلم بانسان جميل فى كل حاجه هيجيلى ويشوف فيا كل شيء جميل ويختارنى رغم ان فيه بنات كتير غيرى فى الدنيا  ومش لانى اجمل واحده ولكن لان قلبه حبنى انا مش اى واحده.

بحلم انى اسافر والف العالم واتصور فى كل بلد صور كتيره .. اتفسح فيهم شوية واتعلم منهم كتير واستفيد حاجات تضيف لخبرتى فى الدنيا ولايمانى بربنا ولعبادته من التأمل والتفكر والتدبر فى اللى خلقه سبحانه وتعالى.

بحلم انى اكون سيدة اعمال كبيرة جدا وناجحه جدا واسمى يتكتب فى كتب التاريخ اللى كل مصر تفتخر بيا فيه، ارفع اسم بلدى وقيمة المرأة فى بلدى قدام الدنيا كلها.

اجمل حاجة فى الاحلام ان مالهاش حدود .. وعلى قد ما خيالك يجيبك وعلى قد ما طموحك هيوصلك احلم .. احلم واحلم واحلم وعيش فى حلمك وصدقه .. خليه حقيقه قدامك وما تتنازلش عن اى بديل عنه .. اتعب علشانه واصبر وابعد عن قاموسك اى كلمة يأس او مشتقاتها ..