الاثنين، أبريل 25، 2011

مش هتقول بتحبنى




بحبك .. نقطه وتبدأ الحكاية
تقريبا كل الناس معتقدة ومؤمنه بكده .. لازم اقلها بحِبك.. علشان تعرف انى بحبها .. وعلشان نبدأ انا وهى فصل جديد من حياتنا مع بعض ..
لازم نقول كلمه "بحبك" علشان نوقع على عقد الحب . ونبدا نعيش فيه .. ونتصرف على اساسه ..
يمكن الفكر ده .. والرأى ده صح .. يمكن !!
لكن تعالوا بقى اقلكم على وجهه نظرى فى الموضوع ده ..
انا شايفه ان كلمة "بحبك" ما ينفعش تبقى أول حاجه تتقال .. ومش هى أبدا اللى بتربطنا ببعض .. ولا هى اللى هتخلينى اتصرف على اساس انى "فعلا" بحبك .. ولا هتضمنلى انك فعلا هتحبنى ..

الأهم من انك تقول "بحِبك" انك فعلا تحبنى .. وان كل تصرفاتك تبقى بتقول بحبك فى اليوم مليون مرة .. يهمنى اللى فى قلبك اكتر بكتير من اللى بتقوله بلسانك .. يهمنى اللى بتعمله علشانى اكتر من اللى بسمعه بودانى ..
يهمنى انك لما تحبنى .. تقولها بينك وبين نفسك .. تفتكرها وتعيش فيها .. تتملك كل كيانك .. وتطلع منك أفعال وتصرفات .. احساس .. نظرات .. لمسات .. همسات .. تنهيدات .. تطلع منك حب ×حب.
يهمنى انك تحبنى أكتر من انك تقول بتحبنى .. لان الكلمة سهله قوى تطلع .. لكن تنفيذها هو اللى صعب ..



مش معنى كده انى مش مشتاقة اسمعها منك وبصوتك واحساسك .. وكل دقيقه كمان ..  ما هو انا هبقى مش طبيبعيه لو قلتلك كده .. ما فيش بنت مش عايزه تسمعها .. لكن مش عايزاها تبقى هى اول حاجه بتربطنا .. انا عايزاك تحبنى بجد الأول .. تحبنى لدرجه ما تقدرش تستغنى فيها عنى ولا دقيقة واحده .. تحبنى لدرجه تبقى ابتسامتى اغلى هديه على قلبك .. ورضايا هو هدفك ومرادك .. تحبنى حب يجري فى كل عروقك مع الدم .. وتخلينى أحبك انا كمان .. تخلينى ما اشوفش غيرك وما افكرش فى غيرك وما اتمناش من الدنيا غيرك ..

باختصار .. شايفه ان لما اتنين يحبوا بعض .. لازم يتصرفوا مع بعض على انهم بيحبوا بعض .. ويعيشوا على انهم بيحبوا بعض .. بشوف ان الحياه قبل الكلمة دى بتفرق عن الحياه بعدها ..
قبلها فيه حرية وخجل .. برائه وجرائه .. اشتياق وتشوق ..

اما بعدها.. حيااااااااااااااة.


بعد ما يتم الاعتراف .. وتوقيع العقد .. اللى بيتمضى بكلمة واحده ..وموافقة الطرفين .. خلاص من هنا بقى بجد .. نقطة ومن أول السطر .. بنينا اول طوبة على طريق حياتنا ..



السبت، أبريل 23، 2011

أكتر من الحب ..



بحبك وبتحبنى .. دى احلى حاجة فى الدنيا .. وخلاص كده انا مش عايزه حاجه تانيه من الدنيا ..
زمان فى بداية مرحلة المراهقه كنت فاكره كده .. كنت فاكره ان "بس" ان اتنين بيحبوا بعض يقدروا يتجوزوا ويفتحوا بيت ويعملوا اسره وعيله .. وحياة.
دلوقتى لما كبرت شوية كده .. شوية صغنونه مش قوى يعنى ;)  لقيت الموضوع اكبر بكتير من كلمتين حب .. او حتى مجرد احساس موجود فى القلب ..
لان الناس مش بتعيش وتتعايش بالاحساس وبس ... ومش بتكلم عن الفلوس خالص على فكرة ..
انا بتكلم عن الحاجة الكبيرة اللى المفروض كلنا بنبصلها ورا الحب .. اللى هى الجواز .. البيت والاسرة والعيله .. والحياااااااة.
لما بفكر كده شوية فى موضوع الجواز ده .. بحس انه اكبر بكتير من مجرد اتنين بيحبوا بعض .. مع انه فى الاول وفى الاخر بيجي على دماغ الاتنين دول بالخير او بالشر .. على حسب بقى.



لكن بفكر فى الشخص اللى المفروض هحبه وهرتبط بيه .. مش هتفضل طول عمرها علاقة خارجيه كده .. ماهو لازم هيدخل البيت .. هيتعامل مع اهلى .. مع امى وابويا واخويا .. هيشوف قرايبي وخلاتى وعمامى .. هيخرج معايا فى كل حته وهخرج معاه برضه فى كل حته ...
هيبقى فيه زيارات بين عيلتى وعيلته .. بين اهلى واهله .. يعني الموضوع هيبقى اكبر منى انا وهو .. هنبقى احنا وهما ..
يعني اكبر من مجرد احساس بالراحه والامان لشخص .. ده الموضوع طلع كبير قوى وطلع فيه ناس كتير قوى هيدخلوا فيه ..
لما بحضر فرح مثلا .. واشوف الناس الكتير اللى بتحضر وتتعرف على بعضها .. وقرايب العروسة يتفرجوا على قرايب العريس والعكس .. لما بشوف عيلتين بيدخلوا فى بعض علشان يبقوا عيله واحده.. علشان لما تمر شوية ايام وشهور يبقوا اولادهم مشتركين .. لأ ده الموضوع كبير بقى !!
 
لما بفكر فى عيد الفطر وعيد الأضحى وزيارات بين العيلتين .. او على الأقل انا وهو هنروح بيت اهله .. وهقعد مع ناس كانوا لحد وقت قريب غرب عنى .. وانى المفروض هخده وادخل بيه بيت اهلى .. ويقعد عادى كده مع بابا وماما .. واقعد انا كمان معاهم :) ..لما بفكر  فى فرح بنت خاله مش عارفه مين .. وبنت عم مش عارف مين .. وهروح انا وجوزى او هيروح هو وأنا ;) .. ماهو ده بقى اللى بقول عليه انا .. ان عيله دخلت فى عيله .. والناس بقت  كتير قووووى فى الموضوع اكتر من مجرد انا وهو ..
يعني من الاخر .. لازم يكون حد كده اتفشخر بيه قدام الناس وافتخر كده وانا بقلهم فلان الفلانى ده .. جوزى .. اصلى بحس ان كلمه "جوزى" كلمة كبيرة قوى .. يعني مش اى حد هينول اللقب الغالى ده ..
والعكس صحيح .. لازم اكون انا حاجه جامده كده هو كمان يفتخر بيها قدام عيلته واهله واصحابه ..
الحاجه الجامده دى مش بس فى شغله ومنصبه ومكانته الاجتماعيه .. دى كمان بتبقى فى عقله ودماغه .. اسلوبه فى الحوار والكلام واللبس .. يووووووووووه ده موضوع كبير قوووى
احيانا لما بفكر فى المعادلات دى كلها بحسها مستحيله تتحق كلها مره واحده فى شخص واحد اصلا .. وانها اذا اتحققت معقولة انا بقى هقابل الشخص ده .. ده ايه كمية المعجزات اللى هتحصل علشان حضرتى دى!!!



وبعيدن برجع تانى وأفكر .. هو انا هتجوزه علشانى ولا علشان الناس؟؟ .. يعنى ممكن يبقى واحد الدنيا كلها بتحكى وتتحاكى عنه وفيه وتقول أشعاار ومعلقات غزل .. بس لما يتقفل علينا باب واحد تبقى العيشه فى جهنم أرحم من الجنه معاه .. يبقى يا فرحتى بيه ساعتها ..
يعني هيبقى ساعتها "انا وهو" اهم  بكتير من "احنا وهما" !!!



المهم ان .. انا اكون بحب هو .. وان حضرته يكون بيحب حضرتى :$ .... مهمه قوى النقطه دى .. قوى قوى يعني :$
اننا .. انا وهو .. نكون متفاهمين ,, يعني مجرد بصه عين تفى بالغرض وتزيد كمان ..
المهم .. فى القصه دى كلها بقى .. ان يبقى فيه حب اصلا .. يعني لما احبه هشوف عيوبه مميزات "مرايه الحب عاميه طبعا" ... وهشوف كل حاجه "مش كامله" عنده كانها "بيرفكت" وشوية زيادة كمان .. واكيد العكس صحيح ..
يعني لو بحبه .. هستحمل حماتى لو كان كلامها سم شوية .. وهستحمل بنت خالته لو كان رغايه وحشرية شويتين .. وهستحمله هو لو كان هزاره سخيف شوية قدام الناس .. هعمل ايه بقى ما انا بحبه ..
بس فى المقابل هو كمان علشان بيحبنى .. هيجيب لماما هدية فى عيد الام ومولد النبى ورمضان والعيد الكبير والصغير .. وفى عيد الحب كمان :)
وهيتحمل كلام بابا معاه فى السياسة ومناقشته فى حاجات هو مش مهتم بيها اصلا ..
وهيتحمل كمان اى حد تانى من عيلتى تطق فى دماغى يغلس عليه .. من عشمه بقى :)

ماهو بيحبنى بقى .. :$:$

الجمعة، أبريل 15، 2011

حبيبي ... شكرا



زوجى الحبيب .. شكرا
شكرا على كل شيء عملته وبتعمله علشانى كل يوم ..
شكرا انك بتحبنى .. ودايما بحس انى اهم حاجه فى حياتك
ولانك بتحس بوجعى قبل اى حد تانى .. ولانك بتهون عليا اى وجع بشوفه
شكرا لانك عمرك ما خلتنى ابات فى ليلية زعلانه ودمعتى على خدى ..
ولانك دايما بتحترمنى قدام الناس .. وبتحترمنى واحنا لوحدنا
شكرا لانك دايما سبب فى رسم البسمة فى حياتى .. ولانك سبب انى اشوف الدنيا بالألوان

حبيبي .. انا بشكرك على كل لحظة حب عشتها معاك وبسببك ..
على الدنيا اللى احلوت بيك .. والأيام اللى نورت بوجودك فيها
على اهتمامك بامورى كلها .. وسؤالك دايما عن ادق تفاصيل حياتى .. من غير فضول ومن غير ملل .. لكن بحب .. واهتمام

بشكرك على عتابك الرقيق لما بغلط فى شيء .. على تقديرك لمجهودى لما بحاول اعملك أكله او شيء انت عايزه .. واعكه فى الاخر ومايطلعش زى ما انت عايز .. بتصبر عليا وتتحملنى .. وبتقدر تعبي وتلومنى بهدوء ورقة .. وحب.
لما برجع من الشغل تعبانة .. بلاقيك فاتحلى صدرك تسمع منى بصبر نادر وجوده فى اى راجل فى الزمن ده ..

شكرا لانى بلاقيك جنبى راجل .. بعتمد عليه و بلجأ اليه .. بفتخر بيه ويشرفنى قدام العالم كله انه جوزى .. وحبيبي وابو اولادى .. ودنيتى بحالها.
ولانك أحن عليا من الأم على أولادها .. لما بتعب بلاقيك جنبى تشيلنى وتخفف عنى .. تجبلى الاكل لحد عندى .. وما تلومنيش على البيت لو ما روقتهوش يومين وانا تعبانه .. ولانى بشوف لهفتك وخوفك عليا لو كحيت مره واحده .. زى خوفك عليا ايام الخطوبة زمان ..
شكرا لانك كنت السبب فى انى اكون ام لاجمل اولاد فى الدنيا ..
ولانك بتشاركنى حياتى لحظة بلحظة .. بتشجعنى وتقف جنبي .. بتحققلى احلامى من قبل ما احلم بيها .. وبتحسسنى انى شخص مهم .. وان كلامى مهم .. واحلامى مهمه .. وآرائي وافكارى وكل شيء بعمله .. مهم وله قيمه.

زوجى الحبيب ..
شكرا لانك بتحبنى .. وكل يوم بتحسسنى انك بتحبنى اكتر من اليوم اللى قبله
شكرا انك بتحترمنى .. فى كل شيء وفى اى وقت
شكرا انك بتدعمنى وتشجعنى وتقوينى .. وتحمينى
شكرا انك موجود فى حياتى .. وانك موجود بكل صفاتك اللى فيك .. الحياه من غيرك أكيد ما كانتش هتبقى حياة ..

حبيبي أقلك على سر .. انا بدعيلك كل يوم فى صلاتى .. بدعيلك بحاجات حلوة قوووى ويارب كلها تتحقق وتبقى من نصيبك .. وكمان بشكر ربنا كل يوم على نعمته اللى بعتهالى .. اللى هى أنت .. أجمل نعمه ممكن انسان يتمتع بيها .. نعمه الزوج المحب المخلص

شكرا انك خلتنى أحلم .. وابقى متأكده ان أحلامى هتتحقق

 ====================

انا كتبت الكلام ده وانا لسه ما اتخطبتش ولا ارتبط .. ولا حبيت ولا اتجوزت
بكتبه من وحى كتاب  “the secret”
بشكر ربنا على شيء لسه ما جاش .. وبحلم بيه قوووى .. وبتخيله وبعيش معاه فى بالى كانه حقيقه .. علشان يتحقق ويحصل بجد ..
لان فى الكتاب قالوا كده .. ولما جربتها على حاجات صغيره اتحققت .. فقررت اطبقها على حاجه من اهم الحاجات فى حياة اى انسان مننا ..
قررت انى اشكر ربنا على النعمه دى .. علشان يبعتهالى

*اللهم لك الحمد كما ينبغى لجلال وجهك وعظيم سلطانك *

الجمعة، أبريل 08، 2011

فى البستان .. زهره



هل ترانى وحيده ؟؟
يُيحيطنى الظلام والبرودة .. والوحدة

ربما تنظر انت الى ذلك الجانب
الجانب الذى ابدو فيه فى غير مكانى
بعيده عن أمثالى الذين هم من نفس نوعى
يتحركون كما اتحرك وياكلون كما آكل

ربما تنظر فتجدنى أقف هناك فى مكان غريب عن طبيعتى
أقف فيه وحيدة .. 
وربما يخيل لك انى أحنى ظهرى
أقف منكسره حزينة .. وحيدة


لكن ألم تلحظ مدى جمالى وبهائى
ألم تلحظ اشراق ألوانى 
الابتسامة المرسومة على ملامحى 
على كل جزء من جسدى 
ألم تلحظ ذلك التفاؤل الذى ينبعث منى

ألم تلحظ اننى انا البسمة الوحيدة فى ذلك المكان الموحش
اننى الجمال الوحيد الذى تقع عليه العين وسط ذلك الظلام
واننى أيضا اللون الوحيد الذى ستشرق عليه شمس اليوم الجديد


ربما أبدو للناظرين وحيده .. لا أنيس لى
ربما تكون هذه حقيقة زائفه
فأنا مميزة فريدة ..
الزهره الوحيدة فى بستان خالى من الأزهار
اللون الوحيد فى حياه افتقدت الألوان
واذا أمعنت النظر ستجدنى الأمل الوحيد فى حياة فقدت كثير من معانيها
أمل فى ان تنبت بعض الأزهار الى جوارى
أمل فى ان تمطر السماء 
فتنمو أوراقى وتكبر وتزدهر



والى ان تمطر السماء وتنبت الأرض
عليك ان تنظر الىّ على انى زهره فريدة من نوعها
زهره لا مثيل لها فى اى شيء ..
مميزه بألوانها .. مميزة بموقعها .. مميزة باشراقها 
عليك ان تعتبرنى رسول للأمل فى الأرض
رسول يبعث الأمل فى القلوب التى ماتت
بفعل الزمن
او بفعل الناس
رسول الأمل الذى يزرع بيده زهره فى اى بستان بائر
رسول الأمل الذى يجتهد ليضع لمسه من الألوان المشرقه 
فى حياه كل من يتعامل معه







السبت، أبريل 02، 2011

جاذبية الإحساس



أن تشعر بالأمان
بالدفىء
بالحب .. وبالحرية ..
انها أحاسيس رائعه جدا ..
والكلام عنها شديد المتعه
والجاذبيه
الأهم من تلك الكلمات ..
هو أن تشعر بها ..
أن تعيش فيها