الاثنين، يوليو 18، 2011

الكلام ده .. ليك أنت

انت عارف انى بكتب كل الكلام ده علشانك انت
علشان عارفه ومتأكده انك فى يوم من الايام رجلك هتجيبك لحد هنا لوحدها
هتدخل تقلب بين حروفى وكلماتى وتشم ريحتك بين سطورى
وتعرف انى عايشه طول حياتى بحب فيك، انت وبس

عارف كمان انى كل يوم الصبح اول حاجه بعملها انى بصبح عليك
بقولك صباح الخير يا "حبيبي" .. وبسمعك بتقولى صباح الخير يا ..... وكل مرة بتقولى حاجة جديدة واحلى من اللى قبلها
بسمع صوتك فى ودانى فبقوم من سريري وانا مبسوطة
وبشم ريحتك فى كل حاجه حواليه ..
وبحس باديك ماسكه ايدي بتديها أمان وحنان .. وحب

عارف انى بحب اكتبلك كلام كتير وجوابات هنا فى مدونتى
وبحب كل الناس تقراها وتحسدك على الحب اللى بحبهولك
وهما ما يعرفوش ان اللى بكتبه وبقوله وبطلعه للنور
ما يسواش واحد على مليون المليون من اللى جوايا

انت عارف كمان انى بقيت بشوفك وانت بتلعب مع اولادنا
وشايفاك اب حنين قوى، بتحب اولادنا قوى
ودايما بتقولى ان اكبر سبب بيخليك تحبهم انهم جزء منى ومنك
انهم شيء بيربطنا بقوة قدام ربنا
وانك بتشوف فيهم حاجه منى بتصبرك على غيابى لو انا مش موجودة

انت عارف بقى ان كل يوم بعيشه من غيرك هو بالنسبة لى جحيم
وانك بتوحشنى كل يوم اكتر من اليوم اللى قبله
وانى بحبك بجد بطريقة ما تخطرش على بالك ولا حتى فى أحلامك
وعارف انى ما بقتش اخاف اكتب عنك وليك قدام الدنيا بحالها
عارف كل ده ليه ..
عارف ليه بقيت بحبك بشجاعه وجرائه
بحبك بجنون واشتياق واخلاص

لانى فعلا بحبك ..
ومحتاجالك ..
محتاجالك قوى





ليست هناك تعليقات: