سبحان الله وحده .. خالق الكون بحكمته اللى بتعجز قدامها دايما عقولنا البشرية الضعيفة
النهاردة حسيت قوى بفكرة مسلسل حديث الصباح والمساء ..
كل يوم انسان بيتولد للدنيا وانسان تانى بيودعها
وهى كده الدنيا ماشية .. ما حدش يعرف مين هيجي امتى ومين هيمشى امتى
فى يوم واحد .. عرفت خبر وفاة والدة واحدة صاحبتى قوى . صاحبتى من بتاع 10 سنين كده ولا يمكن اكتر .. بالظبط كنا فى تانية اعدادى ايام ما اتعرفت عليها .. وعدوا انتوا بقى كام سنة ..
صاحبتى يعني كنت برحلها البيت وبتجيلى وبناخد مع بعض دروس .. بكلم مامتها وبتكلمنى وتسالنى على حاجات وادردش معاها ..
فاكره يوم فرح صاحبتى دى وانا ببارك لطنط ويا عينى كانت مخضوضه كده من كتر التعب والفرحه كمان فى نفس الوقت ان بنتها بتتجوز بقى .. وفاكره يومها وهى بتتكلم معايا وتقولى فاكره يا دعاء ايام ثانوى والدروس ..
** آه يا طنط فاكره .. وهى دى ايام تتنسي برضه :'(
وفاكره كمان حنه اخت صاحبتى لما رحتها متاخر شويتين تلاته علشان كان عندى كورس كالعادة وطنط بتسالنى اتاخرتى ليه يا دعاء !!!
انا فكرها كويس قوى .. فاكره هدوئها وهى بتتكلم وطيبه قلبها وضحكتها .. وكل ما افتكرها وافتكر السنين اللى فاتت دى كلها غصب عنى بانفجر فى العياط .. الأم غالية قوى وقيمتها فى حياة اى انسان مننا ما تتعوضش .. ربنا يصبرك يا آية ..ويخليكي ليا يا أمى انتى وحضنك وقلبك ووجودك ونورك فى حياتى يارب :)
نرجع لحديث الصباح والمساء من تانى ..
فى نفس اليوم اللى عرفت فيه خبره الوفاة ده، كان هو نفس اليوم اللى واحد زميلى فى الشغل بيدينى علبة السبوع بتاعت بنته اللى لسه مولوده من 3 ايام .. وشفت صورتها على موبايله ..
فقلت سبحان الله .. ربنا بياخد من هنا وبيدى من الناحيه التانية ..
هناك تعليق واحد:
اولا حديث الصباح و المساء روايه رااااائعه لمحفوظ .. بتتسمى رواية أجيال لأنها بتمر بعصور كتير و يعتبر محفوظ من الرواد فى النوع دا من الروايات .
و هى فعلا كان معناها ميلاد جديد و رحيل جديد كل يوم .
الام فعلا هى الاهم ف حياة اى حد و هكذا يجب ان تكون ، ربنا يخليلك مامتك مهما كانت بتزعقلك
و انا عارف زميلك اللى خلف قريب
و هى الدنيا كده بتدى و تاخد من غير ما حد يفرض او يختار
تسلم ايديك
إرسال تعليق