الثلاثاء، فبراير 24، 2009

انا مش ملاك

انا مش ملاك,انا انسانه مليانه عيوب بس فيه شوية مميزات, انا باحب وباكره وباغضب وباثور وباكون كمان هاديه ورقيقه طيبه وحنينه, واحيانا شريره ومتوحشه اذا لزم الامر, انا مش ملاك,, وبعيده عن صفات الملايكه تمام البعد, انا بس حلوه علشان انت شايفنى بعينك ,, انا بس حلوة لان عيونك حلوين, واى شئ مهما كان لما يتشاف من عنيك لازم يحلو, ويبقى كله مميزات,, وخالى من العيوب.
انا مش ملاك , لانى بشر, وعاوزاك تحبنى على انى بشر و متحلمش بيا انى الملاك الطاهر البرئ الجميل فى كل شئ بيعمله ,, صدقنى الشكل بيخدع والكلام بيخدع ,, لازم تعرفنى اكتر وتعاشرنى اكتر علشان تعرف انا مين,, انا بشر بكل عيوب البشر ,, وانسانه بكل صفات الناس ,, وبنت زى كل البنات اللى فى الكون,, عندى عنين وايدين ورجلين زى باقى البشر, انا مش شيطان بانياب ,, ولا باذى ولا باعض ,, انا بس باكون جد وقت الجد ,, ألش آخر حاجه وقت الهزار ,, مجنونه اذا لزم الامر .... واكيد باعمل ذنوب ,, صحيح باستغفر ربنا عن الى باعمله .. واملى فى اجابه الدعاء هو ايمانى بعفو ربنا ,, لكنى بشر ..
بكل طاقات البشر وخبايا البشر .. بحلوهم ومرهم ,, قسوتهم ورقتهم .. عنيده فى اوقات كتيره ,, واحيانا بامسك فى راى حتى لو غلط علشان بس منظرى قدام الناس ,, احيانا باتكلم كلام مالهوش لزوم ممكن يزعل منى حد ,, اكيد مش باعمل ده بقصد منى بس باعمله .. باعمله لانى بشر ومش ملاك..
لو كنت ملاك مكنتش حبيتك ,, لان الملايكه مخلوقه مش علشان تحب حد ,, مخلوقه علشان تعبد ربنا ,, لكن البشر بيحبوا ويكرهوا ,, عندهم مشاعر واحاسيس ويقدروا يعبروا عنها ,, وانا بشر ,, انسانه ,, بابكى واضحك واجرى وأقع واقف تانى ,, باخبط فى الدنيا وابنى طريقى بايدى ,, علشان اوصل ,, ما يهمنيش الوصول قد ما بيهمنى انى استمتع بطريقى للوصول .. ما يهمنيش الوقت بس يهمنى انى اوصل للمكان اللى انا عاوزاه وما اغلطش فى العنوان ,,

هو انتى مرتبطة ؟؟

سؤال اتسالته كتير بعد ما كتبت الكلام اللى كتبته
انتى كاتبه الكلام ده لمين؟ انت مرتبطه؟ طيب انتى بتحب؟
انا اكيد رديت بس قبل ما اقلكم ايه ردى عاوزه اعرف حاجه بس,, هو ليه الكلام الحلو علشان يطلع محتاج سبب؟ ليه كلمه الحب ما ينفعش تتقال من غير واحد تتقال له؟
انا كده, باكتب من غير ما اوجه كلامى لحد وباحب من غير ما يكون فى حد بحبه, عايشه لسه فى جو الاطفال, باتخيل واعيش الخيال ده واصدقه كانه واقع, بحب فى خيالى وباتخيل حبيبى يوم مزعلنى ويوم مصالحنى, يوم جنبى ويوم بعيد عنى, باتخيل اننا بنخرج سوى وبناكل سوى بنذاكر سوى ونغنى ونرقص سوى, باتخيل يوم خطوبتى ليه وفرحى معاه واولادنا, باتخيل مشاكل ممكن تقابلنا وهانعمل ايه وقتها, كل ده ماحصلش الا فى خيالى انا .. باتخيله كانه واقع وبامثله فى دماغى فلما يتكتب يبان انه حقيقى قوى, لانى باكون عشته فى الخيال بجد, ولما باوصفه باوصفه زى ما شفته فعلا .. كانى شفته فى والواقع تمام..
انا فى كلمة قلتها مرة وهاقلها تانى,, انا مش هاتكسف لو حبيت ويوم ما هاحب حد لازم اعرف الدنيا كلها انى اخيرا لقيت حلمى, لقيت اللى هايحقق لى كل اللى تخيلته وحلمت بيه فى حياتى.
يمكن فى ناس مش مصداقنى, او مش مقتنع بكلامى ده. يس ساعتها دى هاتبقى مشكلتهم هما مش مشكلتى انا.
مش ذنبى انى باحب اعبر عن احساسى وافكارى ومشاعرى بكل حرية وصراحه , ومش ذنبى ان خيالى واسع وباعرف اعبر عنه ,,
اروع شعراء الحب من رأى الشخصى نزار قبانى. ماكنش فى كل قصايده الرومانسية الجميلة – اللى مليانه حب يغرق الكون كله – بيوصف حب حقيقى عاشه.. كان بيسرح فى الجمال ,, فى خلق الله وبديع صنع وكتب لنا اروع الكلمات وارقها .. اكيد حب وعاش فى قصص حب ,, بس ماكنتش هى السبب فى كل قصايده .. كانت السبب فى جزء فقط .. والباقى ابداع شاعر, وخيال شاعر, واحساس شاعر.
هو كده الحب, بيعمل عمايل فى البشر, فى كل الدنيا اللى يعرفه او مايعرفوش بيحس بوجوده, بس كل واحد ومقدرته انه يعبر عن الوجود ده.

السبت، فبراير 14، 2009

هل لى بتلك الرقصة

**هل لى بتلك الرقصة معك, رقصة زفافنا. لكم حلمت بهذا اليوم وبهذا الموقف, حين ارتدى فستانى الابيض "المنفوش" واحضنك امام اهلى واصدقائى .. امام كل الدنيا بلا خوف ودون ان يرمش لى جفن .. وانت تمسكنى بيديك وتداعب اصابعى بين يديك .. ونتراقص سويا على نغمات الموسيقى الهادئة .. فننسنا انفسنا و تداخل ارواحنا معا .. فاصبح انا وانت كاننا كائن واحد له جسدان ,, اغمض عينى وارمى براسى على كتفك.. واتذكر كيف تخيلت هذا اليوم كثيرا .. واؤكد لنفسى ان الواقع اروع بكثير من الخيال,, وان ما انا فيه الان معك اجمل من كل احلامى واحلى من كل خيالاتى ,, يدق قلبك متسارعا .. فاحس به فوق قلبى .. فاشعر به مع كل دقة ينده باسمى ويخبرنى انك تحبنى .. فارفع راسى من فوق كتفك .. وانظر الى عينيك .. لكى يخبراك هما كم احبك .. فتسبقنى انت بلسانك وتقولها .. "بحبك" فانظر لك بخجل .. لكم تمنيت ان اسمع منك هذة الكلمة فى هذا الموقف تحديد .. وامام كل هؤلاء الناس,, الذين كنت اخجل ان اخبرهم انى كبرت وصار عندى قلب ينبض ويحب ويعشق .. وكانوا يرونى دوما فى اعينهم طفلة صغيرة.. فاليوم وانا بين احضانك ,, وامامهم اخبرهم ان طفلتهم قد كبرت وصارت زوجة لك .. ترتدى دبلتك فى يدها اليسره .. وتمسك بين يدها اليمنى بيد اعز من تمنت ان تمسكه فى حياتها .. طوال حياتى عندما اتخيلك .. لا اتخيلك الا وانت ترتدى بذلتك الجميلة ذات الضى الازرق ..وانا ارتدى فستانى الابيض الذى تعبت معى كثيرا حتى اجده .. ونقف هنا فى هذا المكان الهادئ تحت هذه الاضاءه الخافته والموسيقة الكلاسيكية الهادئة لتلك الاغنيه التى لا افسر كلماتها والتى اخترتها انت .. لانك ترانى فيها ونرقص ونحن لا نعرف كيف نرقص فتدوس على قدمى .. واتحمل الالم حتى لا ابدو متزمرة منذ البدايه .. وحتى لا يبدو وجهى وهو يتالم فى شريط الفديو الذى سيظل معنا طوال حياتنا ..اتعرف انا الان لا اريد سوى ان اوقف تلك الموسيقى واذهب لامسك بهذا المايك واقول بصوتى .. اننى احب هذا الرجل .. الذى علمنى كيف اكون امرأة .. اننى احب هذا الرجل .. الذى حقق كل احلامى بوجوده فى حياتى .. اننى احب هذا الرجل .. الذى عرفت نفسى بجواره .. ورسمت حياتى بيديه ,, وبنيت احلامى بعينيه .. اننى احب هذا الرجل الذى بجواره اشعر بنفسى وهى نفسى فعلا .. وهى جميلة رائعه .. اننى احبك