السبت، يوليو 16، 2011

الصبر من عندك يارب

قربت اصدق انك مش موجود ..
بدات اخاف من انى افقد تفاؤلى انى فى يوم من الايام هخبط فيك الصبح صدفة وانا ماشية
وتبقى انت الصدفة اللى هتغير حياتى وتخلينى ابقى أخيرا أميرة
وحشتنى .. وانت ولا فى بالك
مستنياك انا بقالى كام وعشرين سنة اهو وحضرتك ولا هنا
ومش عارفه هفضل مستنياك كده لحد امتى؟؟
ده انا جوايا كلام كتير قوى عايزه احكيهولك
جوايا حب محوشاه ودفناه فى قلبى نفسي اطلعهولك بقى
نفسي انام على كتفك فى السينيما
وامسك ايديك واحنا بنتمشى قدام الناس
نفسي فى حاجات كتير قوى مش هقدر اقلك عليها دلوقتى
هقلك عليها بينى وبينك .. بس لما حضرتك تشرف الاول
لما تبطل بخلك ده بقى وتعرف انى مستنياك
انى بحبك وبموت فيك كمان
 حتى من غير ما اعرف شكلك ولا اسمع صوتك
انى مُخلصالك حتى وانت لسه مادخلتش حياتى
بس حضرتك تتكرم كده وترحمنى، وترحم قلبى
وتعرف انى بحبك .. وهديك حب عمرك ما حلمت بيه
وتنور دنيتى بقى
والصبر من عندك ياااااارب

هناك تعليقان (2):

غير معرف يقول...

وااااااااااااااااااااااااو

فظيعه .. لا بجد فظيعه .. يا ستى اكيد هاييجى .. هيروح فين يعنى .. بس كله بمعاده و نصيب ..و الفكره انه لما ييجى ييجى فى الجون .. زى ما انتى عايزاه عشان متتعبيش و تندى ف يوم انه جه و تقولى ياريتنى ما شوفته و الوحده احسن ..

و بصراحه مع البوست الحلو دا .. انا باحقد عليه جدا من دلوقتى (:



تسلم إيديك

Doaa' Gamil يقول...

ان شاء الله ربنا هيعوضنى بعد طولة صبرى دى خير وهيجي وهيبقى فى الجون وهيحققلى كل أحلامى واكتر من احلامى كمان .. مؤمنه بربنا انا :)

وبعدين الحقد ده هو اللى جايبنى ورا وعلشان كده ما فيش حد .. امال لما يجي بقى والناس تشوف حبى ليه هيبقى عامل ازاى، هتحقد عليه ازاى، وهيعملوا فيه ايه بيعونهم بس !!! :D:D

منورنى دايما