السبت، يناير 24، 2015

تظاهر بالسعادة

تظاهر بالسعادة واضحك فى وجه الجميع، فالحقيقة ان لا أحد يهتم لأوجاعك ولا لفرحك فتوقف الان عن البحث عن ضالتك فى عيون الاخرين وابدا بالبحث عنها فى داخلك .. واسمع الى قول الامام الشافعى - رحمه الله - حين قال :
ما حكَّ جلدكَ مثلُ ظفركَ      فَتَوَلَّ أنْتَ جَميعَ أمركْ
وإذا قصدْتَ لحاجَة ٍ            فاقْصِدْ لمعترفٍ بقدْرِكْ

فلا أملا يرجى من الاخرين ولا رحمه من قلوب الغير لك، فلن ياتى الا ما قد كتبه الله لك فتعلق بالله وكفي !

من واقع التجربة الحياتيه تاكدت أننى برغم ما يبدو عليا من رجاحه عقل وخفه ظل الا انى بداخلى انسان كئيب ساذج التفكير، وباتت النتيجة الوحيدة التى أدركها جيدا هى اننى لا أصلح لأى شيء فى هذا العالم .. لاأصلح للحياة وسط البشر ولا أصلح للدخول فى أى علاقات بشرية من اى نوع.
ففى الصداقة انا صديقة سيئة وأنانية، وفى الحب انا الطرف الممل دوما.

لحظة! 
ما جدوى هذا الحديث وما دخلك فى ان تعرفه من الأساس .. ان ما بداخلى هو شيء خاص جدا بداخلى أنا لكنى ادرك الان كما لم ادرك من قبل انه ما عاد للاسرار مكان، وما عاد للحب مكان، وما عاد للدموع مكان.
اختلطت الاشياء عندى بصورة لم تكنها من قبل فأصبح إدعاء السعادة اسهل ما يمكننى فعله، أصبحت أجيد التمثيل على نفسي وأجيد اخفاء الدمع عندما ينبغى فعل ذلك.

هؤلاء البشر المقربين او الذين اعتبرتهم مقربين كلهم بدون استثناء لأحد فقدوا مكانتهم فى قلبى ولم يعد هناك من أهتم له  أو به .. حقيقة لم يبقى فى حياتى الا ثلاث أشخاص هما آخر من تبقى لقلبى كى يثق فيهم ويحبهم .. أمى وأبى وأخى، باركهم الله جميعا.

تظاهر بالسعادة واضحك فى وجه الجميع، فالحقيقة ان لا أحد يهتم لأوجاعك ولا لفرحك فتوقف الان عن البحث عن ضالتك فى عيون الاخرين وابدا بالبحث عنها فى داخلك



الخميس، يناير 01، 2015

عن بداية 2015

365 يوم سعادة .. 
هو ده قرارى ل سنة 2015 ..
ولانى من اشد المؤمنين بأن السعادة قرار ,, فانا قررت انى أكون سعيدة السنة دى .. قررت انى اختلق المواقف والأشياء اللى تسببلى السعادة .. يعني لو حسيت ان اليوم شكله مش لطيفه هدور على اى حاجه تبسط واعملها او اجبها علشان ما يعديش يوم واحد من غير شوية سعادة صغننين كده .. 
اول قرارت العام .. هى تسجيل لحظات السعادة .. وده نابع من ايمانى بان الدنيا شوية فوق وشوية تحت .. فعاوزة فى اللحظات اللى هكون مضايقه فيها لاى سبب الاقى "بنك من اللحظات السعيدة" ارجعله يشحن خزان السعادة بتاعتى على منوال فيلم "شركة المرعبين كده"
وعلشان كده اشتريت صندوق خشب شكله جميل ومبهج علشان احتفظ جواه بورق وصور وتذكرات عن الحاجات الحلوة اللى هعملها على مدار العام .. ونيتى انى أحط فيه كل يوم ورقة فيها حاجه حلوة عملتها وبسطتنى 
والحاجه التانية اللى ناوية أعملها بأذن الله هى Count your blessing يعنى هتصور كل يوم صورة وانزلها على انستجرام .. عن شيء جميل حصل كل يوم على مدار ال 365 يوم .. وده لأن الصور ليها تاثير جميل فى الذاكرة 

قررت أكون مبسوطة وابسط نفسي .. وفى المقابل هبسط الناس اللى حواليا لانى بنبسط اكتر واكتر لما أكون سبب فى ابتسامه حد :D 
كل سنة وانتم مبسوطين