الثلاثاء، أبريل 03، 2012

وبعيش الحنين


وبتتحقق كل يوم أغنية هشام عباس ..  زمان .. بتتحقق وبيتأكدلى قد ايه هى صح وحقيقة قوووى.

زمان وانا صغير كنت بحلم ابقى كبير
تعب القلب واتحير م الدنيا وم المشاوير
والحلم كان بريء مفروش بالورود
والقلب كان جريء مليان بالوعود
ولما كبرت قلت ياريت ما كنت حلمت ولا اتمنيت
قلت يارتنى فضلت صغير زى زمان

ادينا كبرنا وكبرت مسئوليتنا وزادت الدنيا فى تعقيدها اكتر من الاول وبقت الخطوة اللى بنمشيها لقدام مستحيل نرجعها تانى لورا، واليوم اللى بنعيشه لازم نفكر فيه الف مره قبل ما نعمل فيه اى شيء لاننا كبرنا خلاص وبقت تصرفاتنا محسوبة علينا كويس قوى، وفى اوقات كتير مش محسوبة علينا لوحدنا لكن فيه ناس بتبقى ارتبطت بينا والخطوة اللى هناخدها هتاثر على ناس تانية معانا.


حالة من الحنين للماضى لأيام جميلة كان الواحد فيها عارف هو عايز ايه وبيعمل ايه بالظبط، عارف بكره فيه ايه او متوقع منه ايه بالظبط .. أيام كانت فيها هموما بالنسبة لسننا كبيرة بس مهما كانت نسبة المخاطرة فيها كانت قليلة .. ونسبة الضحك والتطنيش كبيرة .. ايام كنا بنعيش فيها اليوم بيومه .

حنين لألبوم صورى .. مراحل عمرى اللى فاتت .. ومع كل صوره بحس انى كبرت اكتر .. بحس ان فيه ايام كتير فاتت .. مش عارفه افرح انهم كانوا ايام حلوة ولا أزعل انهم كانوا أيام حلوة وخلصت .. 

أكيد مرت فيهم أيام مرة .. ودموع ووجع وشوية آهات .. بس الأكيد ان كل ذكرى مؤلمة سابت معاها وهى بتحفر الوجع درس وعبره معلمين لحد النهاردة .. والغلطة اللى غلطتها زمان استحالة أرجع وأعملها تانى.

أكيد كل دروس الأيام اللى فاتت خلتنى النهاردة أقوى وقادرة أقف على رجلى بثقة  .. بس ولأن الدنيا بتجرى بسرعه قوى ومحتاجة نفس طويل قووى بيجي وقت الواحد يحس فيه انه تعب ومحتاج يرتاح شوية .. والراحة بتبقى فى الإحساس بالأمان .. والمستقبل لانه مجهول دايما بيصيب الانسان بخوف اكبر .. لكن الماضى ولانه معلوم وعشناه خلاص مش هنخاف منه .. هنطمن واحنا بنفتكره ونعيشه مره تانية فى خيالنا.

حنين .. حنين لطفولتى .. حنين لضحكتى بتاعت زمان .. حنين للمة مع اصحابى وخروجنا بعد الكلية نلف بدون هدف ..
حنين لشقاوة الأطفال فى لعبى مع اولاد خالتى واحنا صغيرين .. حنين للبحر وريحته وصوته وشكله ولونه.
حنين للغرق وسط كتبى اللى بعدت عنها .. حنين لزنقة ايام الامتحانات وانا مش ملاحقة اخلص ايه ولا ايه.
حنين لايام كنت بتمنى فيها أخلص الكلية واكبر بقى .. حنين لأحلامى البريئة الصغيره اللى كنت بخاف عليها.
حنين لأيام المدرسة والصحيان بدرى قوى كل يوم .. ودعواتى انى اكبر بقى علشان ما اصحاش بدرى
حنين لحياة عشتها على مدار 22 سنة وشوية شهور ..