السبت، سبتمبر 26، 2009

بلمسة ايد


قالت له: سامحنى لم اعد احتمل ما انا فيه, لم اعد اشعر بهذا الامان بجوارك كما كنت فيما مضى, لا اعرف ماذا حدث حتى يسلب منى احساسى بالامان والراحه الذى كنت اشعره فقط مع ذكر اسمك, ولا أدرى لماذا الان وانا معك دوما فى خوف.

قال لها: انتظرى أرجوكى, مازال الطريق أمامنا طويل, وساعوضك عن خوفك هذا صدقنيى, انا احبك وحبى لكى هو الامان من كل شر, صدقينى حين أقول انى سأفعل من أجلك المستحيل, لن أدعك يوما لتضيعى من بين يدى بسبب احدى حماقاتى.

نظرت له والدموع تملأ عيناه وهى تحاول جاهده ان تمنعهم من النزول, ثم تحركت شفتاها بدون ان يخرج منهما كلام, لم تجد ما تقوله, فمنذا ان عرفته وهو يكرر هذه الكلمات على مسامعها كلما واجهتهم مشكله.

لقد فقدت ثقتها فيه, وفقدت اهم صفه كانت تميزه, إحساسها المختلف بالأمان والراحه من الدنيا الذى كانت تشعره بجواره تحول الى خوف , خوف حتى منه شخصيا, لقد بدأت تخاف من وجوده.

عندما طال الصمت تحدث هو مره أخرى, حاول ان يجعل نبرة صوته هادئة قدر الامكان: أعرف ان ظروفا كثيرة مرت علينا مؤخرا, سفرى الكثير وغيابى عنك, واعلم انى لم اعد اسأل عنك وعن أحوالك كما كنت افعل, ولكنك تعرفين ان كل هذه الامور تحدث دون ارادتى, فانى أعمل من أجلك, وان غبت عنك فاننى اغيب عنك من أجلك.

استمرت تنظر له فى حيره, بداخلها صوتان, فواحد يخبرها بأنه صادق وهو صوت قلبها الذى لم يحب غيره يوما, وصوتا آخر يخبرها بأن الحب وحده ليس كافى لكى تسعد فى حياتها, وهو صوت العقل.

لم تجد ما تقوله, استمرت فى النظر إليه, قلبها يحبه ولكنه خائف, خائف من ان يتركه يوما ويظل وحيدا يعانى من الألام والدموع, وعقلها محتار فى أفعاله وفى أقواله.

أمسك بيدها وقال, دعى العقل الان, فالحب يحتاج الى جنون, والعقل لا يعجبه الجنون, ليس من قوانينه الجنون بأى حال, اتركى لقلبك العنان ليحب وينطلق, ولا تخافى, فأن قلبى دوما معك, ودوما سيحبك.

شعرت بدفئ يديه بين يدها, شعرت بنفسها تشحن بأمانه مره أخرى, هل يعقل ان يكون ُُجل ما كانت فى حاجته هو مجرد لمسه من يديه, لمسه تشعرها بأنه حقا يحبها ومازال الى جوارها.

ابتسمت له فى رقه, ونزلت منها دمعه , دمعه تخبره فيها انها تحبه ولم تحب غيره ولن تحب سواه, مسح هو الدمعه بيديه, ونظر طويلا فى عينيها, قائلا, يالله ما أجمل عيناك حتى والدموع تملأهما.

وجدتها ... هذا هو الحب


بعد بحثا طويل استغرق منى وقتا وجهدا وتفكيرا, قرأت فيه الكثير من الكتب والمقالات وشاهدت العشرات من الأفلام, فى محاولة بسيطة لكى اجد تفسير لهذه الكلمة الصغيره جدا (الحب)
اخيرا وجدته...
انه معنى يعرفه الجميع, ولكن ربما لا يشعره الجميع

ببساطه, انه حب الله :)

الحب الحقيقى الذى يطمئن النفس ويهدئ الروح, ليس ذلك الحب الذى يدمى الفؤاد ويهدر العمر ورائه
ان حب الله, هو الحب الوحيد الذى كلما اخلصت فيه, حصدت سعادتين, سعاده فى الدنيا براحه البال, وسعادة فى الاخره بدخول الجنه.
حب الله يأتى الا بعد الايمان بان لا حب بعد حبه, ولا حب قبل حبه, فهو الاول والاخر والظاهر والباطن.
هو حب انت فى حاجته والله غنى عنك, انت تبذل لتنال الرضى, انت الطامع فى عفو الله ومغفرته وعنايته, والله الغنى عن كل ما تفعل, ومع هذا كلما احببت الله أحبك, وكلما اخلصت فى العمل, نلت خير الجزاء.
حب الله عندما يملأ الفؤاد تهون كل الدنيا, وتهون كل مصاعبها مهما كبرت.
عندما تتعلم ان تحب الله بكل ما أوتيت من طاقه على الحب, وان تعبده بكل ما أوتيت من إخلاص فى العبادة, ستعرف المعنى الحقيقى للسعادة وراحه البال, وأخيرا ستنام ليلا وانت مطمئن لست بخائف.

الجمعة، سبتمبر 18، 2009

مصائب قوما عند قوم فوائد




مصائب قوما عند قوما فوائد فعلا كل ما الواحد بيعيش اكتر بيعرف اكتر وبيتأكده من حاجات كده بصورة اكبر برضه.

ببساطه كان عندى امتحان النهاردة (17/9/2009) امتاحن آخر ليفل انجليزى ليّ فى الجامعه الامريكية, وطبعا كنت مرعوبة من الامتحان على الاخر, علشان الليفل ده هتطلع بيه الشهادة الاخيرة اللى هتتكتب فى السى فى (CV) بتاعى بعد كده وانا من عادتى بقى انى باتوتر فى الامتحانات المهمه كده.

ليلتها بقى ما نمتش اساسا, بما اننا فى رمضان يعنى نمت بعد الفطار الليلة اللى قبلها وصحيت الساعه 12 بليل, ومانمتش الا تانى يوم بعد الفطار.

طبعا كنت بذكار شوية واتفرج على التلفزيون شوية واكل شوية واقعد على الكمبيوتر شويتين, لحد لما جه معاد نزولى من البيت.

نزلت بالسلامه, وبعد لما وقفت شوية كده فى الشارع مستنيه حاجه اركبه, عدى المنى باص اللى انا عايزه بس كان واخد أقصى الشمال, فطبعا طبعا ما وقفش, وانا اعصابى تتحرق مش مهم, مش مشكلة السواق يعنى, دى اعصابى انا مش اعصابه هو يعنى.

بس خير خير,, قلت لو كمان ربع ساعه ما فيش مينى باص تانى جه هاخد تاكسى وامرى لله, بس مشكلتى بقى انى مش عارفه لو ركبت تاكسى هاقله انا رايحه فين بالظبط, منطقة ما باعرفش اوصفها ولا أسميها بصراحه.

شوية وجيه منى باص تانى وكان ايه بقى, فاضى ورايق وزى الفل, وانا قعدت اراجع شوية كده, وكنت باضحك بينى وبين نفسى, اصلى افتكرت نفسى ايام امتحانات الجامعه, لما كنت بقعد ارجاع فى المواصلات كده برضه.

نزلت من المنى باص قبل الامتحان بالظبط بخمس دقايق, كنت تقريبا باجرى فى الشارع علشان الحق اوصل فى المعاد، اصل المدرسة بتاعتنا فى الكورس كانت بتقول ان الامتحان صعب طويل ومحتاجين كل دقيقة فيه.

آن آن آآآآآآآآآآآآآن

اجمل احساس بقى فى الدنيا لما وصلت قدام مبنى الجامعه الأمريكية العريقة لقيت اتنين اصحابى معايا فى الكورس واقفين قدام المبنى من تحت, انا استغربتهم اوى وشاورتلهم كده يالا اطلعوا بسرعه انتوا لسه هتقفوا وترغوا ولا ايه, بس هماش شاورولى علشان اروحلهم, قلت اروح اشوف فيه ايه كده, لقيتهم بيزفوا ليا الخبر السار جدا بزيادة

الامتحان اتلغى

اه والله, الامتحان اتلغى, علشان انفلونزا الخنازير, وتأجيل الدراسه ل 3 أكتوبر , فبالتالى كل الأنشطة التربوية اتأجلت لحد 3 أكتوبر بقى , واحنا بقى امتحانا اتلغى خالص وهناخد الدرجة بتاعتنا على نسبة الكويزات (quizzes) اللى كنا بنمتحنها طول فترة الكورس.

وبس كده, خلصت من الامتحان على خير, بس عمرى ما هنسى الموقف ده ابدا, ما هو اصله كان اخر كورس, فهيفضل ذكرى للأبد, وهتفضل أنفلوزنا الخنازير بكل أضرارها ليها الفضل انها خلصتنى من الامتحان, وربنا يلطف بينا من شرها ياااااااااارب وفعلا مصائب قوما عند قوما فوائد.

الجمعة، سبتمبر 11، 2009

بعد كل حاجه, بيجى اول لكل حاجه


محتاره اضحك ولا أبكى.

طبعا لو ضحكت ليا اسبابى ولو بكيت ليا اسبابى, ولو ما عنديش اسباب مش هغلب, دى اسهل حاجه تلفيق الاسباب واختراعها يعنى.

هضحك من حياتى ومن نفسى, من هبلى فى حاجات ومن عقلى فى حاجات تانيه.

هبكى على عمر ضايع, على ايام وشهور وسنين عدت .. كده .. من غير ما احس بيهم

ممكن اضحك على.. لا هضحك من بكره ومن اللى ممكن تخبيه الايام, هضحك من حلم مستنياه, ومن فرحه عايشها جوايا مخبياها وخايفه عليها حتى من نفسى.

وارجع وابكى تانى من نفسى, حاجات كتير مش فهماها, وكل ما احاول افهمها, مش بلاقى لها اى تفسير, بتعب لما اتوه فى نفسى واغرق فى شبر مايه كده.

======================

سؤال. سؤال تقليدى

هو ايه الحب ده؟

لأ بجد, سؤال خطر فى بالى, ايه الشئ العجيب اللى ممكن يخلى الانسان يضحى بحاجات كتير فى حياته, علشان خاطر انسان تانى, اى كان هو مين الانسان ده, يا ترى فيه حد يستاهل التضحيه فى أيامنا الحلوة دى؟؟! ولا ما فيش؟

مش تشكيك فى ان الحب موجود فى الدنيا دى, لكن تعجب من ماهيته, ايه طبيعه الشئ اللى مفعوله اقوى من اقوى مهدئ للاعصاب, بيدخل جوا الانسان ويمحى ذكريات مؤلمه كتير, بيمحيها فعلا مش مجرد كلام, وبيملى مكانها ذكريات تانيه, ولحظات تانيه بتبنيها مع انسان بتختاره من وسط كل الناس, علشان تكمل معاه عمرك وحياتك.

لما بتفكر فى بكره بيكون هو كل بكره , ولما بتتمنى نجاح بيكون هو اول خطوة وسلمه فيه.

===============================

مش عارفه ليه بقى, بقالى فترة كل ما أكتب حاجه امسحها, ومش مقتنعه باى شئ باكتبه, وحتى لما بيعجب حد ويقولى انه حلو برضه مش باقتنع بكلامه.

مش عارفه, هو كده معناه انى باحاول اوصل لدرجة اعلى, معناها انى باجرى ورا التقدم والنجاح اكتر

ولا معناها انى بدأت ابقى شخصية ما يعجبهاش العجب :(( والله مش عارفه

=============================

حقيقى بقى, ان كل اخر كان له اول فى الاول

واكيد ان كل اول لازمله من اخر فى الاخر

ماهو دوما الحال من المحال

واذا دامت لغيرك ما آلت اليك

والكلام الغريب الكبير المكلكع ده

هى بس حاجة بقولها لنفسى لما ما بفهمنيش

وانا اليومين دول بقيت ما بفهمنيش كتير اوووووى

بعد كل حاجه بيجى اول لكل حاجة

بعد الحزن بيجى فرح

وبعد الضلمة بيجى نور

وبعد الغروب, بيرجع الشروق

وبعد الوداع بيجمعنا لقى

وبقيت بعد اى حاجه وحشه, بستنى الحاجة الحلوة اللى هتيجى

وبقيت يا دعاء, باحاول أفهمك, وعلى الله أفهمك

ويارب حد يفهم اى حاجه, ولو حد فهم يبقى يفهمنى

ينوبه فيا ثواب

السبت، سبتمبر 05، 2009

يا لمبه منوره حياتى




النهاردة يوم مش عادى, ده كلام حقيقى, النهارده (أحلى يوم فى السنة) لانه عيد ميلاد اغلى صاحبه فى الدنيا بحالها, عيد ميلاد اختى اللى كان نفسى تبقى اختى فعلا,
عيد ميلاد لمبتى زى ما بحب اناديها, لانها منور كل حاجه فى حياتى, نوران مصطفى ,, صاحبتى واختى واغلى حاجة فى حياتى.
بينطبق عليها الاغنية اللى بتقول, كل يوم بيعدى تزيد غلاوتك عندى واشتاقلك واحبك, تسوى ايه الدنيا مهما كانت حلوة لو ما اكنش معاك.

نورا, السنة دى يبقالنا 8 سنين نعرف بعض, ده عمر يا بنتى, كنت ساعتها يا دوب داخله على ال 12 سنه, يعنى يا دوب بدأت اعى الدنيا اللى حوليا وافهمها شوية, شوية مش اوى.
دايما لما بافتكربدايات تعارفنا ببعض, لازم اضحك, اصلى بفتكر تصرفاتنا الطفولية التى لا تخلو من برائه بصراحه,, انا بحب كل يوم بعيشه معاكى, وبجد مش مبالغه كل يوم معاكى بيبقى احلى يوم فى عمرى.

كل عام وانت بخير وصحه وسعادة وفرح وكل حاجه حلوة فى الدنيا يااااااااارب,, ويارب السنة اللى جايا ما تبقيش لوحدك بجد ... !!! فهمانى يا لمبتى طبعاااااااا