السبت، أغسطس 13، 2011

خايفه مره أحب .. أو أتحب




الموضوع بصوتى 
بس التسجيل صوته واطى شوية ابقى على السماعات على الآخر

هو مش الحب المفروض يعني انه اجمل احساس وشعور ممكن اى بنى ادم يحسه ويعيش فيه فى الدنيا دى ..
هو مش الحب قالوا عنه انه بيطمن القلب ويدفى الايد ويريح البال ..
هو مش الحب ده اللى اتكتبت فيه معلقات وروايات واتصورت فيه افلام ومسلسلات بتشهد بحلاوته واهميته فى حياتنا
هو مش الحب ده اللى بنعيشه اليومين دول هو نفسه الحب اللى اتوجد على الأرض من يوم ما ربنا خلق ستنا حواء علشان تكون ونيس لسيدنا آدم ..

هو مش كده ولا إيه ؟؟!!

طب فيه ايه بقى .. لما الحب حلو قوى كده وجميل انا ايه اللى بيحصلى .. ليه كل ما تيجي سيرته قدامى جسمى بيتلبش وبخاف وكأن فيه داء مالوش دوا بيقرب منى وبخاف اتعدى ..

لو حسيت ان فيه حد من اى حته بيفكر بس انه يحبنى او يعجب بيا بخاف واترعب واتلخبط وابقى مش بفكر غير فى حاجه واحده بس .. ازاى اخليه ما يعجبش بيا خااالص .. ازاى اخليه يفضل اخ عزيز مش اكتر من كده ..
ايه الاسباب  وايه الدوافع للى بعمله ده .. الله اعلم

احيانا بفسر لنفسي انى بخاف ان الحد ده يحبنى وانا ما احبهوش فاشيل ذنبه .. حتى لو مش بقصدى او مش بارادتى انى ما احبهوش ومش بارادتى ولا ارادته كمان انه حبنى .. بس برضه هحس فى النهايه بالذنب وبحس ان الحل الوحيد انى اكرهه فيا من الاول علشان ما اشيلش ذنبه فى الآخر ..

ونفس الحاله بتحصل بالظبط لما احس انى بدات اميل لانسان معين وبدات افكر فيه واتخيل حاجات كده .. من وجهه نظرى انها حاجات حلوة وبتخلينى مبسوطة للحظات .. بتحصلى نفس حاله الرعب الفظيعه ويمكن اكتر من اللى قبلها .. وبدعى واقول يارب ما اكونش بحبه .. يارب ما تعلقش قلبى بحد .. ياااارب انا مش قد الحب وعمايله .. مش هكون حمل انى احب واحد ما يحبنيش او ما يبادلنيش نفس الشعور .. او حتى يحبنى واحبه والدنيا تفرقنا .. وانا مش حمل فراق وبعاد ووجع قلب .. لالالا انا مش هقدر ..

يعني ولا كده عاجب ولا كده عاجب .. ومع ذلك طول الوقت بحلم بالانسان اللى هحبه ويحبنى
ازاى مش عارفه ؟؟

غريب كلامى مش كده!!
وانا اكتر واحده بتكتب عن الحب .. وكل الناس بتقول فيها دى شخصيه رومانسيه وعاطتشفيه وكده ..
ويمكن الكلام ده صح .. ويمكن من كتر ما انا بفكر بقلبى اكتر من عقلى نص الوقت بخاف على قلبى قووى وبخاف بالتالى على قلوب الناس التانيه كمان .. وزى ما انا عارفه انى مش هستحمل انى ابعد عن حبيبي او انى احب وما اتحبش مش هقبل انى اكون السبب فى ان حد يحبنى وما احبهوش يتجرح بسببى او انى احب واتحب ونتفرق وحبيبي يتعذب بفراقى ..

انا عايزاك تقرا الكلام ده وكانك ما قرتش اى حاجه
عارف ليه ؟؟
لانى ببساطه أجمل حاجه فى الدنيا كبرتها وعقدتها وكلكعتها ..
وانا مش عايزه اعقدك معايا .. كفايه عليا انا عقدى وكلاكيعي

وبمان انى بحب عبد الحليم .. ده انا متاكده من حبه بصراحه
بهديك الأغنيه دى تعيشك فى الموود




هناك تعليق واحد:

http://www.facebook.com/freedomHeart يقول...

صوتك وحش اوى
هههههههههههه
و وااااااااااااااطى جدا لدرجه انى حسيت او افتكرت زمان من كام سنة اول ما نجوم اف ام و اسامه منير و برنامجه و المتصله تكون بتكلم من تحت السرير المهم
مش عارف اقول ايه او اقولك ايه لكن و كلمه لكن بتغير
الموضوع كله نصيب و على الله يعنى بيكون فى ارتياح و قبول و بعد كده بتجيى الموده و الرحمه اللى ربنا قال عليهم و دى المعامله نسيمها حب نسميها عشرة او تعود او نسميها زى ما نسميها مش مهم المهم ان الزوج و الزوجه ربنا بيلقى الحب بالفطرة بينهم زى ما يحبوا ابنهم و ابنهم يحبهم مش عشان هما احسن اب و ام ولا هو احسن ابن لكن فطره ربنا حاجه مش بتاعتنا اساسا
و بعدين الحب او الاحساس انك بتحب و بتتحب ده احتياج عند البشر كلها كل الناس بتدور عليها بطرق مختلفة او مريحه نفسها و سيبها ع الله و النصيب و كله مكتوب يا دعاء صباحك زى الفل
تصبحى على خير :) و على فكره بهزر انتى صوتك جميل زى اسمك :)