الأربعاء، أغسطس 17، 2011

رسالة الى حبيبي ... 3

حبيبي، حبيبي اللى نفسي اقابله بقى ومشتقاله بجنون
عارف .. انا خايفه أحبك .. اصل اللى انت ما تعرفهوش انى بخاف اعلق قلبى بحاجه .. بخاف احب حاجه وتضيع منى .. وعلى قد ما انا خايفه احبك على قد ما انا نفسي احبك .. احبك بكل الجنون اللى جوايا، بكل عالم الكارتون اللى لسه عايشه فيه .. ببرائتى وأنوثتى .. نفسي أحبك الحب اللى بسمع عنه فى الروايات والأفلام الرومانسية .. الحب الأفلاطونى اللى ما بقاش موجود دلوقتى .. نفسي أحبك حب معاه ما تقدرش تبعد عنى لثوانى .. ما تقدرش تفكر فى واحده تانيه غيرى حتى لو انا بعيده عنك ومتخاصمين ..

عارف .. نفسي أحبك حب يحسدك عليه العالم كله .. حب انت نفسك تحسد نفسك عليه وتبقى معاه حاسس انك ملك ملوك الأرض واسعد اهلها ..
نفسي لما اشوفك اديلك حب ما خطرش فى بالك حتى فى اسعد احلامك علشان تحس انى نعمه ربنا ادهالك وحتى لو مش بتحبنى زى ما بحبك، تقدر حبى وتحبنى على حسه .. حتى لو هتحبنى واحد على مليون من حبى ليك .. انا قابله وموافقة وراضية .. وجودى جنبك .. وحبى ليك هيكفونى .. المهم انك تيجي ..

المهم انك تبدأ .. انى اخطر فى بالك .. انك تحس انك محتاجلى زى ما انا هموت عليك
وتعرف انى بحبك "قوى" من دلوقتى .. بحبك حب غريب .. حب معاه مستعده اوهبك عمرى حتى لو هتعيشه من غيرى المهم تكون مبسوط وسعيد ومرتاح .. 

حبيي .. انا نفسي احكى عنك لاصحابى واهلى .. نفسي اتكلم عنك قدام ابويا وامى وانا مش خايفه ومش مكسوفه .. نفسي احس بقى انك بتاعى وانا ملكك ومن حقى احلم بيك وما ابقاش خايفه حد يحس بافكارى وما ابقاش خايفه انى احلم بيك وفى الاخر تطلع سراب .. نفسي احلم وانا مطمنه ومرتاحه .. انا بجد نفسي أحبك .. ولما هحبك .. هحبك حب الدنيا بحالها تشهد عليه ..
 :$ وعلى فكرة انا بمووووووووووووووووت فيك  
من دلوقتى بقى

هناك 11 تعليقًا:

Karim يقول...

لو كان في واحدة بتحب واحد بالشكل ده, فالواحد ده كل ما عليه انه يشكر ربنا ليل نهار على النعمة دي.

Unknown يقول...

ياترى فيه كده ؟؟
ويا ترى فيه واحد فى الدنيا دى يستاهل انه يتحب بالشكل ده ..

خلينى عايشه فى الأمل ..

Karim يقول...

جميلة أوي الكلمة دي, الأمل. لأنه في حد يستاهل....زي ما في واحدة بتحب زي كده.

طول ما الأمل موجود, الواحد ده هيكون موجود..

Unknown يقول...

تفائلوا بالخير تجدوه ... شعارى فى الحياة .. والحمد لله عمره ما خيب ظنى ابدا

منور يا كريم .. ربنا يخليك

غير معرف يقول...

بتخيلك وانتي بتقولي "تفائلوا بالخير تجدوه" كالعادة مبتسمة و وشك منور D:

سبحان الله...واحدة زيك بضحكك ورقتك وخفة دمك وحبك للناس, وبتسأل اذا كان في واحد يستاهل...

انتي تستاهلي كل خير و شوية كمان :)

Unknown يقول...

احم حم ..
يا كريم ربنا يخليك .. بترفع روحى المعنوية والمعدينه والله :$ .. ربنا يخليك ويكرمك كده يارب

وبعدين هو الواحد مننا بيضحك ليه يعني .. ماهو علشان الدنيا مش مستحمله نكد .. نضحك الدنيا تحلو وتضحكلنا هى كمان :))

غير معرف يقول...

الواحد بيضحك عشان من غير ضحكته الدنيا تقف و مايبقاش ليها طعم.
وبعدين النكد احنا اللي بنوجدو .بس في ناس النكد مش بيكون لايئ عليهم لانهم من غير حاجة بيوجدو السعادة و الضحك في اي مكان بيكونو فيه :)

Unknown يقول...

والله يا كريم الاتنين احنا للى بنوجدهم .. سواء الضحك او النكد يعني.

بتحصل معايا انى ابقى مضايقه ومخنوقه بس عاوزه اضحك .. مزاجى انى اضحك .. عاوزه اخرج نفسي من الموود ده .. فبدور على اى حاجه تضحكنى وخلاص .. افتح اليوتيوب واتفرج على مقطع من مسرحيه بحبها .. اكلم واحده صاحبتى دمها خفيف نهزر شوية .. اقف قدام المرايا واضحك لنفسي زى الهبله .. المهم انى اخلق موودى ده لنفسي .. المود اللى انا عايزاه يعني ..

والنكد كذلك .. احيانا هى بتبقى طالبه نكد .. بس اكيد مش بتلكك علشان انكد على نفسي، مع انه احيانا بيحصل ومن غير اسباب ظاهره

فى النهايه يعني .. من غير ضحك وتكبير دماغ .. واننا ناخد الدنيا ببساطه .. هتبقى الدنيا صعبه وممله ودمها تقيل ..

ربنا يدمها علينا نعمه .. العقل وتكبير الدماغ

Karim يقول...

مش بقولك, دمك زي العسل :)
بس معايا الوضع مختلف, مع النكد مش ببقى فايق للضحك ,يعني مش بداور عليه... بس لو حد ضحكني, بسووووووووء فيها وبطلع من الموود.
انما مع الضحك, حاسب يا بيه, كركعة لحد ما يبان لي صاحب. النهاردة مثلا, اشتغلنا 3 ساعات وضحكنا ال 3 التانيين على الامتحان بتاع الانجليزي...عايز أقولك اني وشي وجعني من كتر الضحك.

بس انا ناوي اجرب الموضوع بتاع الوقوف قدام المرايا...مخبيش عليكي, الهبل ده دماااااااغ و مش اي حد يعرف يعملها.

Unknown يقول...

جرب وطمنى .. بس اوعى يجيلك هبل بجد .. يعني لازم يبقى هبل ب كونترول برضه :))

وبكره بقى .. اوعدك انا اللى هيجيلى الهبل ده.. هقف نفس والقفه تانى واراقب الجو والناس .. وفى الآخر هدخل امتحن .. يارب بس ما اقلش جزر ويطلعلى اسماعيل يس ..

صيام مع ما فيش نوم مع ارهاق مع شوية شمس حلوين .. صباح التهيييييييييييييييييييس

Karim يقول...

هتقولي جزر؟؟ خيييييييييير, ده مش هيبقى اسماعيل يس, هيبقى عبدالسلام النبولسي و واخد شكوكو في ايده :]

المهم, انا متأكد انك هتبقي احسن واحدة ويبقى طمنيني...ولو عوزتي اي حاجة, اكيد مش هتأخر :)

حاولي تنامي دلوقتي عشان تعرفي تركزي بكرة ان شاء الله.