السبت، أكتوبر 24، 2009

عيد ميلادى العشرين قد أتى


وادى السنة جريت اوام اوام, وفاتت عشرين سنه بحالهم على وجودى فى الحياة دى, كملتهم عند ربنا وعند أهلى خلاص يوم 23 أكتوبر.. وهكملهم فى الأوراق الرسمية اللى بتعترف بيها الدولة يوم 26 أكتوبر.

عشرين سنه يعنى عقدين من الزمن, يعنى عشرة سنين وكمان فوقهم عشرة سنين تانين.

يااااااااااااااااااااااه, كل ده عشته.

مرت فى حياتى القصيرة الطويلة دى حاجات كتيره ومواقف, اتعلمت حاجات بالعبيط, واخدت اقلام بالهبل على وشى, فوقتنى وصحتنى, وجعتنى اه لكن فادتنى.

اخدت أحضان كمان كتير, هونت عليا كل قلم ادتهونى الدنيا.

ضحكت فى وشوش ناس, اعرفها وماعرفهاش

وبكيت قدام ناس, وكان نفسى ما اوجعاش

حققت نجاحات فى حاجات وفشلت فى حاجات, وحلمت بحاجات وبعدت عن حاجات

اوقات حسيت الدنيا قفلت فى وشى. بكيت وصرخت من شدة الالم اللى جوايا

اوقات حسيت ان الدنيا بتضحكلى وفتحالى ابوابها ادخل من ايهم أشاء.

اتعلقت بناس وحبيت ناس وخذلنى ناااااااس

شفت اماكن كتيره اوى وعرفت معلومات كتيره اوى اوووى وقريت شوية كتب كده كتييييييييييير اوى اوى اوى.

فى حياتى الصغنونه دى اللى انا حاساهم كتير اوى (20 عااام بحالهم) عملت حاجات كتيره اوى, ذنوب كتييييييييير وحسنات يارب يكونوا كتير.

حاسه انى بقفل دفتر من حياتى, هقفله بكل ما فيه, بكل تجاربه وخبراته ولحظاته المره قبل الحلوة, هقفل 20 سنه بكل حاجه فيهم, علشان أبدأ عمر جديد, بحاجات جديدة, مشاعر جديدة وافكار جديدة واحلام جديدة .. حيااااااااة جديدة.

بارادتى او غصب عنى لازم هبص من وقت للتانى فى دفترى القديم, اكيد اتاثرت بيه وهيفضل معلم فيا لحد ما اموت, ومهما قفلت وحطيت فوقيه ميت قفل وترباس هيفض تاثيره فيا موجود.

بس بعد 20 سنة عدوا من عمرى, ضاع نصهم فى عمر ما كنتش واعيه فيه لاى حاجة, والنص التانى ما بين محاولات للادراك, لتجارب فاشله فى الادراك, وقليل من الومضات المضيئة اللى هتأثر فى عمرى اللى جاى, لازم افتح صفحة جديدة

اولا بسنة جديدة هتبدأ من حياتى

وثانيا مرحلة جديدة هتبدأ من النهاردة من حياتى....

انا اول واحده هتحس بالتغير جواها.. والناس كمان هتحسه من برا

وكل سنه وانا طيبة..

كل سنه وانا فى سلام مع نفسى

كل سنة وانا بحب نفسى اكتر

كل سنة وانا باحاول افهم نفسى أكتر

كل سنة وانا باحاول اتعلم اكتر

كل سنة وانا بحاول اتطور اكتر واكتر

كل سنة وانا بحب كل الدنيا, وعندى امل فى بكرة

كل سنة وانا طيبة




• ملحوظة:: انا ما كتبتش النوت دى علشان حد يدخل يقولى كل سنة وانت طيبة
انا اولا كتبتها كنوع من المصارحه مع نفسى
وثانيا,, انى محتاجه من كل واحد فيكم يقولى نصيحة شايف انى محتاجلها
ويقولى على عيب فيا محتاجه اتخلص منه ... وبكده تبقى قدمتلى خدمه لا يمكن انساهالك أبداااااااا

هناك 4 تعليقات:

kalam-wel-salam.bolgspot.com يقول...

1-مش كل سنة وانتى طيبة!
كل يوم وانتى طيبة كل ساعة وانتى مبسوطة وبتضحكى وفرحانة
وصريحة مع نفسك
2-خلى بالك من لاحظاتك اللى جايه
واسمحيلى اقولك حاولى ما تصدقيش كل حاجة ومتفرحيش بكل حاجة
ومتضمنيش حاجة
افرحى وانبسطى بس خلى بالك لانى العمر لو لحظة عدت منه مش بيرجع
وعلى فكرة مدونتك تحفة انا قريت كتييييييييييييييييييييييير منها وكلها عجبتنى تسلم ايدك ودماغك
ويسلملك عمرك باللى يفيدك بيه
وكل سنة وانتى طيبة
طولت عليكى سورى

Mo3taz Mo7amamdy يقول...

كل سنه وانتي طيبه ..

كتاباتك حلوة قوي

وعجباني كلها خصوصاً حادثة العربية

Doaa' Gamil يقول...

kalam-wel-salam.bolgspot.com

انا اللى اسفه انى اتاخرت فى الرد عليكى ...
بس بجد .. كلامك مش عارفه اقولك عليه ايه .. شكرا اوووى فعلا

نصايحك غاليه اوووى واوعدك هخليها على طول قدام عينى :)

وسعيده جدا بجد انك قريتى فى مدونتى وان كلامى عجبك ... الحمد لله
واتمنى تزوريها تانى وتانى وعلى طول:$

Doaa' Gamil يقول...

وانت طيب يا معتز .. ربنا يخليكى يارب .. وشكرا اووووى على كلامك ده بجد