الثلاثاء، أكتوبر 13، 2009

أصعب حب




* أصعب حب لما تلاقى اللى انت تحبه ما بيحبكش
ولا تحس مهما عيونك تنطق قلبه ما بيحسكش

بتحبه؟؟ لالا انت بتعشقه, بتدوب فيه وبتتمنى لو يطلب عنيك علشان تديهاله وتبينله قد ايه انت بتحبه, بتعشق حياتك علشان هو بقى موجود فيها, وبتكره امبارح لانك عشته من غيره, وبتتمنى لو ربنا يطول فى عمرك بس عشان تعيش عمرين معاه, بتحبه لأ ده أنت بتموت فيه، بتموت فى عيونه, نظراته, وبتموت فى آهات قلبك اللى بتقتلك وتعذبك كل ما تمر من قدامه وما ياخدش باله منك وبتموت فى وجع قلبك وحيرتك وانت بتحاول تلمحله أو تبينله قد ايه بتحبه وبتتمناه وهو ولا دارى ولا فى باله.


* تبدأ تضعف يمكن يعطف
تبدأ توهب يبدأ يخطف

ما انت بتحبه ومستعد تلف العالم مليون مرة لو هو يطلب بس علشان يحبك ويحس بيك, بتضعف وتضعف وتبدأ فى سلسة من التنازلات وراها تنازلات, وانت بتعملها وانت مش حاسس انك بتتنازل عن اى شئ, انت بتعمل كل حاجه بحب شديد وبإخلاص شديد, بتعمل كل ده علشان الانسان الوحيد اللى سكن جواك واخدك منك , وانت بتدى وهو بياخد, وانت سعيد اوى باللى بيحصل ومعتقد انك كده "حبيب عظيم", وتفضل تقدمله فى حاجات, وهو مش بيعمل اى حاجه غير انه بياخد وبياخد وبياخد ومش بيديك اى حاجه, ماهو ما بيحبكش ومش حاسس بالنار اللى جواك

* فجأة تحس ان اللى انت وقعت فى حبه ما يستاهلكش

وفى يوم تفوق على القلم اللى هيفوقك, انك حبيت انسان ما يستاهلكش, وانك كنت كتير عليه, كتير اووووووووووى, هتندم شوية وممكن تتعب شويتين كمان, بس هترجع بعديها تفوق وترجع لنفسك ولحياتك تانى, بقلب مجروح شوية من الدنيا, لكن قلب متعلم درس, ودرس مش سهل كمان, مش اى حد اللى يستاهل قلبك وحبك واخلاصك وتضحياتك.س

* أقوى عذاب لما دموعك تنزل منك قدام عينه ما يشوفهاش
أقوى عذاب كل ما تيجى تقوله بحبك يسكت قلبك ما يقولهاش
ولأنك عايش وحدك متغرب جوا حكايه
تايه مجروح مش عارف خايف من اى نهايه

تنتهى الحكاية وده الطبيعى لانك حبيت قلب ما حبكش, حسيته وماحسكش, هتنتهى لان ما ينفعش ان قصة حب تكبر وتبقى قصة حب بجد, وانت تفضل قدامه ضعيف, تبكى ويعمل نفسه مش واخد باله من دموعك, تقوله بحبك ويفهمها باى شكل تانى غير انك فعلا بتحبه, تقدمله عمرك راضى وسعيد وهو ياخد منك بدون اى مقابل, احساس قاتل انك تتوه فى الانسان اللى بتحبه وتتوه معاه, وبدل ما يكون سبيلك للأمان والطمأنينه يبقى سبب لخوفك وقلقك من كل الدنيا.

تبدأ تضعف يمكن يعطف
تبدأ توهب يبدأ يخطف
فجأة تحس ان اللى انت وقعت فى حبه ما يستاهلكش

كلمة أخيره: مش لازم كل قلب تحبه يحبك !!!

هناك تعليقان (2):

Banota so3'ayara يقول...

ازيك يا دودو انا رضوى لو فكرانى
عايزة اقولك ان الحب دلوقتى بقى شىء نادر وجوده و لو كان فيه يبقى مش بالصورة ده ابدا و النموذج اللى بتتكلمى عنه ده هو اللى موجود حاليا فى حياتنا ان معظم حالات الحب ما هى اللى تخيلات فى دماغ البنات و السبب فيها الشباب ربنا يهديهم
و ده مش حب على الاطلاق

Doaa' Gamil يقول...

فكراكى طبعا يا رضوى... ودى عايزه كلام

كلامك صح بنسبه كبيرة اووووى فعلا
هو فعلا معظم الحب بقى تخيلات فى دماغ البنات، بس مش السبب هو تصرفات الاولاد وبس، لا وكمان الفراغ الفكرى اللى فيه معظم البنات واللى ممكن يخليها تتخيل اى حاجه حتى لو مش موجوده اصلا

شكرا لكلامك وتعلقيك يا رضوى بجد