الاثنين، أكتوبر 15، 2012

الحنين لما هو آت

عارف الحنين .. الحنين ده اللى بتحسه لما تفتكر انسان كنت بتحبه وبعدتم عن بعض .. واللى بتحسه لما يكون فيه مكان متعود تروحه وعشت فيه لحظات حلوة فى عمرك وبطلت تروحه دلوقتى .. فبتحس بالحنين ليه ولأيامه ... انت عارف الحنين للحاجات اللى فاتت .. للحظات وناس وذكريات وشوية صور عشتها كانت حلوة .. 

عارف بقى ايه أجمل؟؟ الحنين لحاجات لسه هتيجي ولسه هتعيشها ولسه ما تعرفهاش !!

هى حالة اشتياق لحاجات لسه هتحصل، بتحلم بيها ومن كتر ما بتعيش جوا الحلم بتصدقها فلما بتطلع لارض الواقع والحياة اللى عايشنها بيجيلك حنين ليها وبتحس انها واحشاك وكانها كانت حقيقة فى يوم من الأيام.

انا اصلى بعيش فى الحالة دى كتير قوى .. الحنين لبكرا .. بكرا اللى عندى أمل انه هيبقى أحلى من النهاردة فبحس انه واحشنى ونفسي يجي بسرعه بقى .. فبتجيلى حالة من الحنين لايام حلوة عايزة اعشها.

ان نص حياتى تقريبا أحلام .. بحب أحلم وبعيش قوووى جوا أحلامى علشان بحب أحلمهم  بضمير .. فطبيعي انى لما انزل لارض الواقع احس بالحنين للحاجات اللى عشتها فى أحلامى قبل كده .. 

هناك تعليقان (2):

محمد سلامة يقول...

جميل جدا
انا عكسك بأحلم أه بس لما أنزل للواقع بأتصدم وبأعرف إن السعادة ما هى إلا حلم
تحياتى :)

Unknown يقول...

السعادة الحقيقة بتبقى فى تحقيق الحلم .. وتحقيق الحلم بيجي من الإيمان بيه والصبر والمثابرة عليه

وربنا يسعد كل ايامك
شرفنى مرورك