الاثنين، يونيو 21، 2010

آخر هلوسه (6) كلام عاقلين او مجنونين




·       وانا فى لجنه الامتحان السنه دى بيجيلى احساس غريب .. احساس الوداع اللى بيحاول يسلم على كل حاجه وكل حد وهو عارفه انه مش هيشوفهم تانى .. ولو صادف واشفهم هتبقى الدنيا غير الدنيا والناس غير الناس ..


·       وانا بحكيلكم عن النسكافيه وعن حبي ليه .. وعدد الكوبايات اللى بشربها كل يوم بحس انى بفتح قلبي فبرتاح .. يمكن تكون حاجه بسيطه اوى .. ويمكن تكون "هبله" كمان .. لكن انا بحب المشاركه وبحب يكون فيه حاجات كتير بشاركه مع غيري ..


·       اتوصلت لنتيجه ما اعرفش ايه رأيكم فيها .. لما تفكر فى حد كتير اوى "كتير زياده عن اللزوم يعني" يعني تشوفه بطل كل المسلسلات اللى بتشوفها.. وتلاقيه فى وشوش كل الناس اللى تعرفها واللى ما تعرفهاش، تلاقيه صوته فى ودانك وانت مش بتسمعه .. لما تفكر فيه وانت بتذاكر وتلاقيك بتكتب اسمه بدل ما تسّمع اللى المفروض يتسّمع .. تفكر فى كل حاجه حصلت ما بينكم وتفتكرله كل حركه وكل كلمه وكل هفوه "وفسوه" عملها .. الطبيعي انه يبقى بطل أحلامك كل ليله بقى، وزى ما بتشوفه وانت صاحى فى كل حاجه فى دنيتك، بتعيش معاه وانت نايم فى جنتك!! مش كده ولا إيه؟؟!


·       اصعب لحظات الانتظار هى اللحظات الاخيره .. وبيقولوا ان اسود لحظات الليل هى ما قبل بزوغ الشمس .. وانا أؤكد وابصم على الكلام ده ... اخر 10 ايام فى حياتى التعليميه بجد اطول وأصعب بكتير اوى اوى من ال17 سنه اللى اتعلمت فيهم بحالهم..


·       لو ينفع ما يبقاش فيه فتره مراهقه .. يعني ننط من الطفوله على مرحله النضج كده على طول!! كانت الحياه هتبقى لذيذه جدا .. الطفوله ببرائته ورقتها وضحكها وبساطته .. والنضج بعقله .. من غير مراهقه وتقلباتها الجسمانيه والنفسيه .. خناقات مع اهلكوأصحابك ونفسك .. تمرد وجنون وآلم .. وكل يوم قصه حب وكل يوم رحله وداع .. يا سلام لو ما فيش كل ده ...! أمنيه مستحيله لانها فتره مهمه بس اهو كلام بفك بيه عن نفسي وخلاص.


·       لو سالتونى بقى ايه اكتر حاجه بحبها فى نفسي ... هقول .. و ... و .. و ... و ...و .. وووووووووووووووووووو ... بس كده!!! مغرور؟؟!! لا مش كده خالص لكن لو ما حبتش كل حاجه فيا واقتنعت بيها مش هعرف احب اى حد فيكم ولا هعرف اعيش اصلا فى الدنيا اللطيفه دى .. واكتر حاجه بقى بحبها فى نفسي هى اكتر حاجه عجبت كل واحد حبنى علشانها :) يعني اللى بيحب فيا كذا فانا بحب كذا ده فى نفسي لانه خلى فلان يحبنى .. واللى بيحبه كذاهواتى .. انا كمان بموت فى كذاهواتى ده .. وكده يعني :) نظريه مش كده!!


·       أمنيه: نفسي اطلع من نفسي واعيش معاها!! يعني نفسي اشوف نفسي من برا وهى عايشه وبتتعامل مع الناس .. ونفسي اقدر اسمع الناس بتقول عليا ايه وانا مش قدامهم .. واعرف مين بيحبنى بجد ومين بينافق ومين بيكرهنى!!

مش مستنيه كومنتات عاديه تقليديه!! انا عايزه تعليقات على كل نقطه .. مشااااااااااركه فعاله بقى :)
* ما فيش جمع اسمه مجنونين

هناك 3 تعليقات:

bos bos بسمه عبدالباسط يقول...

مش عارفة أعلق على إيه ولا إيه
بس زى ما تقولى كده حاسة أنى أنا اللى كاتبة الكلام ده

أصل ساعات برضة أصحى من النوم رايقة ومبسوطة ويفضل الروقان يقل يقل وأوصل لنفس الحالة

ونفس أحساسك بتاع أخر كام يوم فى الدراسة حصلى بالظبط وكنت ببص على كل حاجة كأنى بودعها ولأنى عارفة أن حتى لقائنا بعد كده هيبقى مختلف تماما

عارفة أنا متخرجة من ست سنين اهو يااااااااااااه عمر بحاله بس أحساسك بصحابك وبالجو العام وبكل حاجة بيختلف تمام لما تتخرجى حاجات كتيرة بتتغير جواكى هتلاقى نفسك كبرتى ونضجتى وحتى كلامكم ولقائتكم بقت مختلفة
عارفة كان نفسى نفضل زى ما أحنا كان نفسى يفضل جوانا نفس المرح والشقاوة عمالة أدور على أحساسنا بكل حاجة اللى أتغير ومش لاقياه

مرحلة الدراسة عامة مرحلة جميلة جدا وعمرها ما تتعوض

بخصوص المراهقة لازم يا بنتى تبقى موجودة ما هو بعد البراءة والضحكة والمرح الطفولى ده ما ينفعش ننط فجأة للنضج لازم يبقى فيه شوية شقاوة ومغامرات وحركات عشان توصلى للنضج اللى بتقولى عليه ده لأن كل اللى بتمرى بيه فى مراهقتك هو اللى هيوصلك للنضج

Ahmed.php يقول...

حلوه فكره نموسية كحلى صباح الخير

غير معرف يقول...

انتى بنت زى العسل عفويه اوووووووووووووى وده اللى بيحصلنا بجد كلنا وبالظبط والبتفصيل بس حلو اوى التعبير اللى انت معبره بيه ده ربنا يوفقك