مش عارفه أنام :(

ادينى سهرانه لحد الفجر .. مش عارفه انام .. عماله افكر فيك ومش قادر ابطل تفكير .. ابكى شويه .. اتفرج على التلفزيون شوية، ابص من الشباك شوية .. وافكر فيك كتير وارجع ابكى من تانى.

مش عارفه انام ولا قادره ابطل تفكير فيك، واحساسى بانك نايم وانت زعلان منى، احساس بيقتلنى ويموتنى ومخلينى بفكر فى افكار سوده وغريبه .. وارجع افوق من كل الافكار دى على دموع مش بتبطل ومش عارفه اوقفها.

اوعى تفكر فى يوم ان قبولى لكلامك ضعف منى او استسلام .. ولا مجرد مهدئ لموقف علشان يعدى والسلام .. انا لما بقولك حاضر بقولها بعقلى وقلبى .. يمكن علشان بحبك بقتنع بكلامك .. يمكن علشان بحبك ما بزعلش من كلامك .. ويمكن علشان بحاول انى افهم كلامك زى ما انت شايفه مش زى ما انا شايفاه... ويمكن علشان بحبك بيكون كل ده مع بعضه.

بحبك ... يعنى بحب عيوبك قبل حتى مميزاتك

بحبك يعنى قبلتك بكل حاجه فيك .. ومحتاجه لكل حاجه فيك

بحبك .. يعنى بموت الف مره فى بعدك

بحبك .. يعنى بكون وحيده غريبه فى الدنيا وانت بعيد عنى

بحبك ... يعنى ما اعرفش انام وانت زعلان منى

 ممكن تنيمنى بقى .. احم احم قصدى انا اسفه ما تزعلش منى 

 بـــــــــــــحـــــــــــــبــــــــــك