الاثنين، مارس 22، 2010

كل عيد أم وانــا طيبه



سنه ورا سنه بتعدى وكل سنه لما يجى 21 مارس باكون انا كبرت سنه ومع ذلك باجى اقف قدامك باحس كانى الطفله الصغيره اللى بضفاير، اللى مهما كبرت وعدى بيها العمر وعرفت ناس او شافت أماكن، بتحتاجلك لك كل سنه اكتر من السنه اللى قبلها، تقدرى تقولى انى بحتاجلك كل يوم اكتر من اليوم اللى قبله.
أمى .. الله يكون فى عونك بجد، عارفه انى كل ما باكبر شويه مشاكلى بتزيد وجنانى بيكبر، وبخوفك عليا اكتر واكتر وبدل ما ترتاحى من همومى وتقولى دى كبرت وعقلت بقلقك عليا اكتر وبتعبك معايا بزياده.
بس انا لما باتجنن فى الدنيا وادوس فيها واخبط واروح يمين وارجع شمال بعمل كل ده لانى مطمنه ان حضنك موجود، يعنى مهما تعبت واتبهدلت فيها عارفه ان لحظات انام فيها جوا حضنك وتقفلى عليا فيها هتشيل عنى تراب الدنيا وجروح الناس واى آلم بحسه وانا بعيد عنك.

عارفه ان كل انسان بغريسته وفطرته بيحب امه وشايفها اعظم ام فى الدنيا وكل ام بفطرتها بتحب اولادها وشايفاهم احسن ناس فى الدنيا، ثنائيه غريبه وتبادل فى المشاعر ربنا زرعه فى قلوبنا بس علشان نستمتع بحياتنا وبمتعه علاقه الحب المتبادله بصدق بين طرفين، واذا كان القرد فى عين امه غزال فالام فى عين ابنها ملاك.. وانتى يا امى ملاكى اللى محاوطنى بجناحته الكبيره منين ما بروح ومنين ما باجى.
تسمحيلى أقول كل عيد ام وانا اللى طيبه مش انتى، أصل انا اللى متمتعه بمذاق وجودك فى حياتى، انا اللى عايشه فى حنانك وبين احضانك، انا اللى بقول آمين على دعواتك ليا، وانا اللى باكل اشهى اطباق فى الدنيا من ايديكي، وانا اللى بشوف فرحتك بنجاحى فى عنيك وبرضه انا اللى بحس برجفه قلبك عليا لما باعيه وارقد فى السرير، يعنى انا اللى يا بختى بيك، يا بختى انك أمى.
 

دعـــاء جميل

هناك تعليقان (2):

kalam-wel-salam يقول...

الهم امد عمر امهات المسلمين
وصبر من فقدوا ذلك الحنان الرائع من رب العالمين
كل سنة ومامتك طيبة وبخير ربنا يخليهالك
تحياتى

Doaa' Gamil يقول...

الله يخليك يارب ... ويتقبل منك