السبت، يناير 16، 2010

الحلقه الرابعه من فى دنيا الفيس بوك بطول دعاء جميل ورغده صالح


اهلا اهلا يا حلوين كل سنة وانتوا طيبين
انا الفراشة فيرى اللى دايما بجيبلكوا الموضوع المتين اللى دايما بيتكلموا فيه رغدة ودعاء الامورتين الاتنين
ايه ده ايه ده انا سامعة صوت من بعيد



رغدة :دعاء ازيك؟ عاملة ايه؟


دعاء: كويسه كويسه ... بس مش اوى اصلى قريت مقال كده وبفكر فيه بقالى كام يوم وشاغلنى اوى


رغدة:ليه؟ هو المقال بيتكلم عن ايه؟


دعاء:ممكن البنت تتجوز ولد اصغر منها سنا او الولد يتجوز بنت اكبر منه؟؟


رغدة:طاب تمام وايه المشكلة مادام فى تفاهم بين الطرفين ولا انتى ايه رأيك؟


دعاء: بس يا رغده علميا تفكير البنت بيسبق تفكير الولد لو هما الاتنين فى نفس السن، تخيلى كمان لما يبقى هو اصغر.غير ان شكل البنت مع المسؤلية بيكبر قبل الولد، يعنى كمان عشره عشرين سنه جواز هبقى جنبه تيته


رغدة: ههههههههه تيتة مرة واحدة؟ مش واسعة شوية دى؟


دعاء: لو فكرتى فيها كمان، هيلحق يكون نفسه علشان يعرف يتقدملى امتى، يكون هو بيلعب فى 24 او 25 واكون انا 26 ولا 27 .. لا وحشه اوى دى وبعدين مش هعرف احس معاه بالاحتواء والامان اللى ممكن احسه مع واحد اكبر منى فاهم الدنيا اكتر منى


رغدة: بصى يا دعاء البنت مش بتبقى محتاجة ولد اذكى اه بتحتاج حد بيفكر كويس بس مش لازم يكون اذكى البنت بتحتاج ولد يعرف يحتويها ويحسسها بالامان وده ممكن يتحقق مع حد اصغر منها وبعدين عمر الانسان مش بيتقاس بعدد السنين اللى عاشها بالعكس عمر الواحد بيتحدد بعدد التجارب اللى مر بيها


دعاء:المسأله مش بتبقى احتواء وحب بس، دى حياه زوجيه فيها مشاكل وخلافات وقرارات، وبيقولوا فى المثل أكبر منك بيوم يعرف عنك بسنه


رغدة:بس فى اولاد كتير بيبقى تفكيرهم اكبر من سنهم يعنى الموضوع مش قاعدة


دعاء:اظاهر انى انا اللى مش هعرف أقنعك المره دى .. خلاص تعالى نسأل الناس وهما يقولولنا رأيهم ايه


رغدة:يلا بينا نسألهم ههههههههه قال تيتة قال هههههههه


دعاء: اووووووف


طاب الحق اخلع انا بقى لحسن واضح ان دعاء متعصبة وانا فراشة رقيقة مش هاستحمل اى كومنت طائش بس قبل ماامشى يلا قولولى انتوا مع مين؟ رغدة ولا دعاء؟

هناك 4 تعليقات:

Mezo يقول...

طبعا مع رغدة

أختي الكبيرة ... بتقول نفس كلام دعاء

كنا بندور لأخويا على عروسة .. عقبالكوا يا رب


وكان في واحدة بيقولوا انها كويسة قوووي



بناخد راي اختي قال أبدا على جثتي لأنها أكبر من محمد ...

أنا معرفش الكلام ده ... مش لازم الولد يكون الأكبر


أهم حاجة التفاهم

Mezo يقول...

انتي مش بتعملي أي كومينت ليه عندي

http://zamanyana.blogspot.com/

مستني التعليقات يا ستي

Mezo يقول...

انتي مش بتعملي أي كومينت ليه عندي

http://zamanyana.blogspot.com/

مستني التعليقات يا ستي

Senior.AboSalah@yahoo.com يقول...

أنا مع دعاء ولا مع رغدة !!!

انا مش فاكر مين اللي قال ان لو البنت اكبر من الولد بيبقى عادي :D

بالنسبة للموضوع , فا من وجهة نظري ..
هو الطبيعي ان الولد بيكون أكبر من البنت , ولما يحصل العكس , فالموضوع حيكون شاغل تفكير الطرفين , فا اي مشكلة حتحصل حيكون أول تفكير فـ الاساس ان البنت اكبر من الولد
ومش بعيد البنت تقوله ( انا اكبر منك وعارفة ايه الصح وايه الغلط ) :D وساعتها بقى حتبقى كارثة لأن الموضوع شاغل تفكير الطرفين

ومن ناحية تانية الولد لما يرتبط ببنت أكبر منه , حيحس انه مش قد المسؤلية , وديه حقيقة وممكن يختلف فيها أراء ناس تانية

فا ليه نحط نفسنا فـ حاجة ممكن تعملنا مشاكل ؟ !!