الخميس، يناير 28، 2010

جنان آخر حاجه ... 4


والله الواحد طول ما هو عايش فى مصر وبيمشى فى شوارعها وبيتعامل مع ناسها، مش بس يكتب موضوع ولا موضوعين ولا حتى كتاب فيها، لأ بصراحه هو أقل واجب يكتب مجلدات تفوق فى عددها وحجمها مجلدات ميكى وسمير فى عزهم.

النهارده وانا ماشيه الشوارع كانت ظريفه جدا، جدا جدا جدا يعنى
مباره تاريخيه فى وقت حرج جدا ما بين مصر والجزائر بليل، وبالتالى سبوبة بيع الاعلام والطراطير فى نص الشوارع شغاله الله ينور، وعلشان السبوبه تنغنغ كده يعنى الشوارع كلها كانت واقفه وزحمه جداا، علشان البايعين يعرفوا ياخدوا راحتهم ويبرتعوا يعنى، اصل هو دونن عن كل ايام السنه اختاروا النهارده بالتحديد علشان يفتحوا معرض الكتاب " بالذمه الناس هتسيب الماتش وتروح المعرض يعنى" المهم ان السيد الرئيس والحاشيه بتفتح فى المعرض والشوارع مقفوله والبايعين بيبعيوا والناس لابسه احمر ومعلقه اعلام فى كل حته .. كل واحد فى حاله مستفيد من غيره وغيره مستفيد منه وماحدش واخد باله من حاجه.

تخيل مشهد من فيلم اشاره مرور والكاميرا بتعدى من فوق وبتعرضلك مجموعات متفرقه من الناس كل واحد فى حاله لا تجمعهم سوى وحده الموقف ... زحمه يا دنيا زحمه.


احنا بقى ولا بلاش كلمه احنا اللى بنبدا بيها دايما اى جمله فيها تريقه ... بس احنا فعلا لازم نتريق على نفسنا بدل ما ننفجر، من يومين لقيت جروب طالع اسمه "الحمله الشعبيه لمنع الفنانه فردوس عبد الحميد من الذهاب لانجولا" اشمعنى فردوس عبد الحميد، طب ما هو اللى سافروا المره اللى فاتت كانوا كتير سبتوهم كلهم ومسكتوا فى فردوس عبد الحميد يعنى .. مش فالحين غير فى عمل جروبات وحملات شعبيه على اى حاجه وضد اى حاجه واى حد .. وكل حاجه بقت اى حاجه × اى حاجه وماحدش فاهم اى حاجه خاااااالص.

خلاص انا كمان من حقى اعمل "الحمله الشعبيه للشرب من الحنفيه" او "الحمله الشعبيه لمحبى الملوخيه بالتقليه" .. براحتى بقى حد ليه عندى حاجه ؟؟
ولا ايه رايكم اعمل جروب "نجمع اكبر عدد بيحبوا يفتحوا التلاجه ايام الإمتحانات" ولو وصلنا 10000 هنخلى شركات الاجهزة الكهربيه تخترعلنا تلاجه بريموت كنترول .. وصباح التجمعات بقى :)



اخيرا بقى : حته جد .. اوعى تندم بجد على اى موقف مؤلم عيشته فى حياتك واوعى تقول ابدا ياريته ما كان حصل ويارتنى ما اتصرفت كده وبوظت الدنيا .. يعنى اوعى تقول ابدا ياااااااااريت ... لان بجد بجد بجد كل حاجه وحشه بتحصلنا وبنصبر عليها وبنلجأ لربنا فيها بإخلاص ربنا بيعوضنا ويرزقنا احسن منها الف مليون قول تشليون مره

هناك 3 تعليقات:

معتز محمدي يقول...

أمري لله .. هكتب تعليق .. ومش هتردي عليه زي كل مرة

متفق معاكي أننا أزكيا جداً خاصة في البيع

النهاردة بعد الامتحان حودنا انا وصاحبي نشتري لب وفول سداني ب 2 جنيه

اديت للبياع العشرين جنيه ... الرجل معوش فكة ... راح في خفة المحترفين دور على سواق وفك لي العشرين جنيه ... واداني الباقي


غمزت صاحبي قلت له عاوز ياكل عيش

معتز محمدي يقول...

وبخصوص الزاحمة

http://www.mawaly.com/music/M7mad+Adawea/track/40217

Doaa' Gamil يقول...

والله يا معتز كنت مشغوله فى الامتحانات مش اكتر .. كنت بكتب وبس وما كانش فيه وقت خالص ارد بجد؟؟

وفعلا .. المصري ما يغلبش لما يكون عاوز يبيع حاجه فعلا