الاثنين، فبراير 01، 2010

جنان آخر حاجه ... 5


عمارتى 12 دور وكل دور فيه 4 شقق وعندنا الشقق كلها قدام بعضها يعنى ما فييش ولا طرقات ولا سلالم ولا اى موانع ان الاربع ابواب يكونوا قدام بعض زي عمارات تانيه.
المره دى وانا راجعه من الامتحان طلعت على السلم .. 9 أدوار على رجلي وانا فى كل دور باعدى على 4 شقق .. شوفوا انتم بقى لحد لما وصلت شقتنا عديت على كام شقه فى سكتى.

انا اللى شغل تفكيري وانا طالعه الحياه اللى موجوده جوا كل شقه واللى الجار ما يعرفش فيها حاجه عن جاره اللى فى الشقه اللى جنبه .. مش مهم عندي دلوقتى موضوع الجيره اللى اتقطعت .. لكن تخيلوا ان كل دور فيه 4 قصص مختلفه لكل شقه فيهم قصه وكل قصه جواها فصول كل فصل بطله واحد من ساكنى الشقه دى

شوفوا بقى كام قصه فى العماره وكام فصل جواها .. اصل انا لما بافكر فى حياتى وفى فصولها وابوابها ومواقفها وبلاقى نفسى عايزه حد يجي يشيل معايا شويه احسن باتعب من كتر الشيل .. بجد برجع وأقول سبحان اللى شايل همومى وهموم ملاين زى .. وملاين من كائنات تانيه ماحدش يعرف عنها اى حاجه غير ربنا وبس .. سبحان الله بجد.

واضح انى كتبت النوت دى بعد ما اليوم خلص و دخلنا فى شهر من اروع واعز الشهور على قلبى .. فبراير.

بحبه الشهر ده لله فى لله كده والله .. ملئ بالمناسبات السعيده بالنسبه لى يعني .. فيه عيد الحب اللى عمري ما احتفلت بيه يعني ولا شفت فيه ورقه واحده من ورده حتى :$:$

وفيه عيد ميلاد اتنين من اغلى واعز واقرب الناس لقلبى مش هقلهم هما مين احب انا الناس اللى تعرف نفسها لوحدها .. بس هقلهم كل سنه يااااارب وانتم معايا وجنبى وبحبكم وبتحبونى ومنورين حياتى دايما ياااااارب

ولفبراير معزه خاصه فى قلبى من ايام الطفوله لارتباطه معايا بحدث عظيم وهو معرض الكتاب .. ذلك المكان الذى اذوب فيه عشقا .. ومش مبالغه بجد
وكفايه انه شهر صغنون كده وبيخلص قوام قوام والمصروف بيفضل زى ما هو فيه وما بيقلش .. ياريت كل الشهور تتخذه قدوة وتبقى 28 او حتى 25 لو ينفع.
وكل مناسبه وانتم طيبين كده يارب ...

هناك تعليقان (2):

بنـوتــــة يقول...

جامدة أوي
و فعلاً تحسي في لحظات غريبة و بدون تبرير
إن الدنيا مليانة حواديت
" يااااااه .. معقولة في ناس عايشة قصص و راوايات و أيام زيي ؟؟ في البيت في الشارع في الكليات في الجوامع ؟؟ "

و معرض الكتاب فعلاً حدث و لا أروع
بحبه جدااااااااااااا
حاسة إني شامة ريحة الكتب من هنا
تسلم إيديكي ع اتدوينة دي
^ـ^

Unknown يقول...

العفوووووووووووو

يالا الحقى روحى المعرض قبل ما يخلص بقى

وطول ما انتى عايشه بصى وفكري وتأملى فى الناس ...