جواز الصالونات
***********
انا الفراشة فيرى بلف على الناس فى الفيس بوك بأسمع حكاوى كتير ودردشات عجيبة بس اكتر دردشة بتعجبنى هى دردشات دعاء ورغدة بنتين ما يعرفوش بعض ومش متأكدين من بعض هههههه استنوا كدة ده شكلهم بيتكلموا يلا نشوف بيقولوا ايه
* رغدة: دعاء ازيك يا بنتى فينك؟
* دعاء: اه رغده ازيك ..
انا محتاسه على الاخر وبقالى كام يوم مش بنام من كتر التفكير
* رغدة:ليه؟ فى ايه؟
* دعاء: فيه عريس، شوفتى المصيبه اللى انا فيها
* رغدة:ههههههههه جالك ازاى؟
* دعاء: كنت فى فرح ناس قرايبنا وشافتنى واحده ست فى الفرح عجبتها فقررت تجبلى عريس
شكلها بتشتغل خاطبه تقريبا حاجه كده
* رغدة:اها يعنى انتى لسة مشوفتيهوش؟ طاب وماله ماتشوفيه وبعدين قررى
* دعاء:ده هيجى يتفرج عليا، ويشوف البضاعه اللى طنط قالتله عليها حلوه ولا لأ
* رغدة:مش بضاعة يا دعاء ده تعارف وعلى فكرة ده مش بينقص من كرامة اى حد
* دعاء:تلاقيكى بتقولى كده بس علشان ما اتحطتيش فى الموقف ده قبل كدة
* رغدة:لا ملهاش علاقة دى وجهة نظر انا شايفة ان جواز الصالونات امان للبنت اكتر لانها كدة بتختصر خطوات كتير وبتتأكد ان الشاب جاد فعلا فى الارتباط مش هيركبها الحنطور ويشربها مانجا وخلاص خلصنا يشوف غيرها بقى
* دعاء: ما قلتش حاجه ، بس لما يجى يتجوزنى يتجوزنى علشان عقلى وشخصيتى عجبوه مش علشان شكلى حلو ولا لبسى شيك او باعرف اقدم العصير كويس
* رغدة:على فكرة الانطباع الاول فى حياتك العادية برده بيتاخد بالمظهر هو انتى فاكرة اننا فى حياتنا العادية محدش بيتفرج علينا؟
ده انتى مليون عين بتبص عليكى وبتراقب تصرفاتك وكل حركة بتعمليها
* دعاء: ايوه بس انا ما اعرفهمش ومش بكون مركزة عليهم، لكن ده هيكون قاعد قدامى ومبحلق فيا اوووى
* رغدة:بس الناس اللى بتبص وانتى مش مركزة معاهم دول بيبصولك من كذا زاوية قد تكون منحرفة او مستقيمة على طريقة حساب المثلثات لكن اللى جايلك فى صالون بيتكوا ده بيبصلك من زواية مستقيمة .......وبس
* دعاء:مثلث ايه بس يا بنتى مش وقت هزارك ده
ماما بتقولى عادى شوفيه وممكن يطلع كويس، مش قادره تتخيل الوضع والاحساس اللى انا همر بيهم، عندى احساس الجوارى بتوع افلام الابيض واسود كده
* رغدة:ههههههههههههه بصى يا دودو واضح انى مش عارفة اقنعك طاب ما تيجى نسأل الناس رأيهم ايه؟
* دعاء: نسالهم، واللى يسال ما يتوهش برضه
* رغدة:هههههههههههه مااحنا بنهزر اهو يعنى مش انا بس اللى مهيسة على طول زى ما بتقولى
* دعاء:هم يضحك وهم يبكى وحياتك يا رغده
ياه يا دعاء انتى ورغدة كل ماأسمع كلامكم اقعد افكر. انا على أخر المسلسل ده هاتقلب نحلة
انا مش عارفة ابقى مع رأى رغدة ولا رأى دعاء؟
يا ترى انتوا مع رأى مييييييييييييييين؟؟؟؟؟؟؟؟
النوت على الفيس بوك
ليست هناك تعليقات:
إرسال تعليق