الاثنين، نوفمبر 30، 2009

ممكن تصوم عرفات 3 مرات؟؟


ده بس علشان احنا ناس زى العسل, فلازم كل اللى نعمله يبقى اعسل من العسل طبعا !!

دعونا نحتفل فى صمت ونتحدث بصوت عالى، من حق كل بنى آدم يقف زى ما هو عايز يقف، حرية شخصية مش من حق اى حد تانى ان يجور على وقفة اى حد تالت.

تعرف ان السنة دى كانت سنه زى الفل, اه والله, اصل الواحد فيها كان ممكن يصلى العيد 3 مرات ورا بعد, زيادة تأكيد يعنى يمكن ما يتقبلش فى المرة الاوله ولا حاجه!!!

يعنى كنت تقضى يوم الأربع فى ليبيا تقف مطرح ما انت عايز، تصبح الصبحيه كده تصلى العيد وتقضى يوم لذيذ, على العصرية كده تاخد طياره على تونس، تفطر مع الناس الصايمه هناك وتصبح تصلى العيد تانى هناك، تقضى يوم جميل على جبال تونس الخضراء، وتيجى كده على العصرية، تاخد طياره تطلع على المغرب الجميله، تاكل مع الناس الصايمين برضه، وتصبح الصبح تصلى العيد لتالت مره

او فيه فكرة اكثر عظمه, مش وقفه عرفه صيامها يمحى ذنوب سنه فائته ؟؟؟
انا عارفه انك عامل بلاوى .. يبقى الحل انك تصوم يوم عرفه ثلاث ايام بنيه ان ربنا يغفرلك
صوم الاربع فى ليبيا, واطلع صوم الخميس فى تونس, وكمل صيام تانى الجمعه فى المغرب

بس السؤال, لو افترضنا انك صمت فى ليبيا يوم الاربع, مش المفروض ان عيدك بقى الخميس, ازاى هتصوم فى تونس تانى يوم الخميس .. هو مش حرام الصيام أول يوم العيد برضه ولا ايه؟؟؟؟

يادى الخيبه، يا أمه ضحكت من خيبتها الأمم... حتى وقفه عرفات, اللى ما فيش منه غير عرفات واحد بس فى الدنيا.. اللى فى السعوديه بس والله !!
نفسى اعرف، الناس دى وقفت فين بجد، شكلهم كده جم وقفوا على المقطم اللى عندنا واحنا مش واخدين بالنا، طب مش كنا نعرف علشان ناخد منهم ضرايب ولا نطلعلنا بمصلحه كده :S:S

مصيبة مش كده؟؟ ممكن تبان انها حاجه هايفه، والمصيبه اننا نشوفها هايفه فعلا، الغرب واسرائيل فرحانين فينا اخر حاجه يعنى ... اللهم ارفع مقتك وغضبك عنا

يارب نفوق بقى.. يا ختشى علينا :@:@


هناك تعليقان (2):

محمود المصري يقول...

حلوه ..

احنا ممكن بدل الزحمه بقي نقترح نخلي الوقفه تتقسم علي كام دوله ..

شويه يقفوا في عرفات وشويه في المقطم ..

وممكن يبقي فيه مكان للناس التعبانه يقعدوا فيه .. أي كافيه أو حاجه زي كده ..

ما هي هتبقي مسخره بقي ..

بجد ربنا يرحمنا برحمته .. مش بأعمالنا ..

Unknown يقول...

بجد ربنا يرحمنا برحمته .. مش بأعمالنا

يااارب.. يارب