أمك ثم أمك ثم أمك

أمك ثم أمك ثم أمك ...

وكانت وصية الرسول الكريم..عليه أفضل الصلاة والسلام..

وصانى بيكى.. بحبك ورعايتك وخدمتك

ماما..

يمكن ما كنتش معاكى دايما  زى ما الوصية بتقول.. ويمكن ما أكونش زى ما بتتمنى انى اكون  .. لكنى بحاول .. بحاول احققلك كل أحلامك فيا، بحاول اكون زى ما انتى بتتمنى واحسن كمان.. بحاول اكون سبب فى فرحك وبسمتك وسعادتك وفخرك.

بجننك معايا كتير.. ويمكن كتير بزعلك منى .. وان كنت متأكده ان قلبك الحنين ده عمره ما يقدر يزعل من بنته اللى بتمووووووت فيه.. بحبك قووى وعلشان كده بدلع عليك وبطلع عنيكي.. وبتعبك معايا.

ماما..

أجمل كلمة ممكن ينطقها لسانى .. وادفى حضن ممكن اترمى جواه.. واحن قلب ممكن يخاف عليا ويحبنى..

ماما..

كل يوم الصبح بفتح عينيى وادعيلك.. فى كل مرة بروح البيت تعبانة من الشغل والاقى اكلك الدافى اللذيذ بدعيلك.. فى كل مرة ببقى مضايقه وبعيط وتيجي كلماتك زى البلسم تريحنى وتحللى اصعب مشاكلى بدعيلك.. فى كل مرة بحس انى وحيدة واجرى على حضنك زى العيال واحس بحنانك.. واحس ان العالم ده كله مش موجود منه غير مساحة حضنك الدافيه .. بدعيلك.

فى كل مرة بتقف قدامى مشكلة مش عارفه احلها .. اول حاجة بفكر فيها علشان احلها هى انتى.. وفى كل مرة بيكون حلك هو اصلح حل.. الوحيدة فى الدنيا اللى بتساعدنى بحب.. وبتنصحنى بحب.. وبتخاف عليا بجد.. وبتتمنالى الخير والسعادة بجد.. الوحيدة فى الدنيا اللى مش بتكسف قدامها من مشاكلى مهما كانت تافهه.. او كانت كبيره ومحرجه.

ماما..

مش بقلك كل الكلام ده علشان النهاردة عيد الأم!!

انتى اكتر واحده عارفه انا بحبك قد ايه.. وكل يوم انتى فيه فى حياتى هو عيد بالنسبالى لى .. رضاكى ودعوتك ليا من قلبك هو هدفى فى الدنيا دى..

يا أمى.. بحبك

وبدعى اعيش العمر كله تحت رجلك.. وبدعى ربنا يخليكي ليا ويباركلى فى عمرك..

كل اللى فوق ده كلام  ممكن اى حد يعتبره كلام عادى .. وممكن اى حد يقوله لمامته.. وممكن حد جميل يطلعلى من النص يقول ما تروحى تقوليلها الكلمتين دول فى وشها بدل ما تكتبيهم على النت..

اولا الكلام اللى كتتبه كله مش كلام عادى.. كل واحد وهو بيتكلم عن حبيبه بيقوله اللى فى قلبه واللى حاسس بيه من غير ما يفكر هو الكلام ده اتقال كام مرة قبل كده.. وكل أم بتسمع من اولادها كلمة بحبك وكانها اول مرة تتقال وكانها اجمل كلمة فى الوجود.. وكل كلمة حب بتيجى من اولادها حتى لو كانت اتقالت مليون مرة قبل كده بيبقى ليها طعم مختلف.. زى بالظبط كلام الحب لما يجي من انسان بتحبه وبتموت فيه.. حتى لو متكرر ، بس من الشخص اللى بتحبه بتحس انه مختلف.

اما بقى انى بكتب لمامتى الكلام ده .. فبكتبه لانى بعتبر لغة الكتابة لغة مختلفه تماما عن لغه الكلام الشفهى.. لغه بتوصل درجة مختلفة من المشاعر والاحاسيس.. بكلمات عميقه ومختلفه ممكن الواحد ما يقدرش يقولها بلسانه.

وختاما.. ربنا يخليكى ليا يا أمى.. ويخلى لكل واحد أمه ويبارك فيها.

ويرحم كل الأمهات اللى محضروش عيد الأم السنة دى.. ويصبر أهلهم وأولادهم ..

وربنا يرحم كل شهداء مصر .. ويصبر أمهاتهم على آلام فراقهم...