الأحد، يناير 23، 2011

مش كل حاجه .. بتتحكى


صح .. مش كل حاجه بتتحكى
يمكن علشان الكلام ما ينفعاش يتقال لانه ممكن يزعل حد مننا
ويمكن علشان الكلام ما ينفعاش يتقال علشان "مايصحش" يطلع مننا
ويمكن لان ما فيش كلام ممكن يوصف الاحساس اللى عاوزين نوصفه ..
فتلاقينا كتير بنسكت ونكتم جوا نفسنا .. نعمل نفسنا مش واخدين بالنا
وحاجات كتير تحصل من حوالينا وتجرحنا وتتعبنا .. ونعمل نفسنا اقوياء
ويا جبل ما يهزك ريح بقى وبتاع ...

ونسكت ونسكت ونسكت .. ولما حد يسالنا  .. نرسم الوش الجبس
ونبين اننا زى الفل وتمام .. لاننا مش عارفين نقول ايه ولا ايه
ويمكن خايفين لو فتحنا قلبنا نبان ضعفاء قدام اللى بنحكيلهم
ويمكن بنخاف كمان من دموع عنينا اللى مش هتستحمل الظلم اللى بيحصل
وهتنزل لوحدها مع اول حرف هننطق بيه

كتير قوووووى بتبقى الدموع أصدق من اى كلام
بتوصل معانى ومشاعر وحاجات كتير قوى بنعجز عن توصيلها
وكتير بقى بتتمنى انك تلاقى حد يفهمك من غير ما تتكلم
يحس بنبرة صوتك لما تتغير وهى مجروحه
ويشوف حزن بتحاول تداريه فى عنيك عن عيون الناس
ومجرد وجوده جنبك يطمنك ويهديك .. ويريحك

الانسان ده ممكن جدا يكون مامتك، يكون أخوك او أختك
يكون واحد صاحبك .. حبيبك.

وياسلام لما ما تحكيش ولا كلمه وما تقولش ولا حاجه
والانسان ده يفهمك، ويحس بيك ويقدر اللى انت شايله
يا سلام لما يخاف عليك بجد، ويحميك حتى من نفسك
يعني يا سلام كده لما تلاقى اللى يحبك بجد، باخلاص

ولما تكون حزين ومضايق ومش عارفه تحكى ومش لاقى كلام تقوله
تلاقى القلب اللى يسمع كل كلامك، من غير ما تقوله.

هناك 4 تعليقات:

Mona Hekal يقول...

يااااااااه كلامك صح اوي و حسيته اوي و وجعني اوي ياريت فعلا نلاقي الحد ده. اللي يحتوينا و يحسنا من غير حتي ما نتكلم هاتكون ساعتها حياتنا احسن علشان هانلاقي الامان

انا سعيدة اني دخلت مدونتك ارجو تقبل مروري
تحياتي

سندباد يقول...

تقبلي مروري الاول وانشالله مش الاخير
جميل اوي الكلام وحميل اوي الاسلوب وجميلة اوي الفكرة
الصمت احيانا بيكون نعمة لينا وللاخرين
تحياتي لبنات افكارك

Unknown يقول...

Mona:
سعيده طبعا بمرورك ويارب ما تكونش آخر مره وتكرريها دايما

وسعيده كمان ان الكلام عجبك وحستيه بالشكل ده ..
أسفه يعني لو كان الكلام وجعك .. بس يمكن لأنى بعبر عن حاله حقيقيه بعيش فيها .. وانى نفسي ألاقى ناس حواليه من النوع ده .. فالكلام طلع صادق شوية .. من القلب بقى

وفى انتظار مرورك القادم وتعليقك دوما

Unknown يقول...

سندباد:
نورت وسعيده بمرورك .. شرفت مدونتى المتواضعه بكلماتك ومرورك.

وأشكرك بشده يعني على كلامك وإشادتك بالكلام والأسلوب ..

وخالص تحياتى لك