السبت، أكتوبر 09، 2010

فى حاله جديدة




فى حاله جديده .. مش عارفه اسميها ايه .. لكنها من افضل الحالات اللى حصلتلى فى حياتى .. تجربه الالم والسعادة فى نفس الوقت .. انواع مختلفه من الآلام وانواع جميله من السعاده .. يعني حاله من الاستقرار النفسي .. لان الالم والسعاده مع بعض فى نفس الوقت بيعملوا توازن نفسي للانسان بطريقه غريبه.
مش ندمانه على اى حاجه قلتها او عملتها .. وسعيده بكل حاجه حصلتلى .. خاصه لما بتاكد ان تدبير ربنا ليا كله خير يوم بعد يوم.. ولما كل يوم يحصل حاجه تاكدلى ان ربنا بيحبنى "الحمد لله" الحاجات دى بتسعدنى جدا وتخلينى طايره ومالكه الكون بجناحاتى.

فيه أمل .. إيه فى أمل
اصلى لسه منزله ألبوم فيروز الجديد .. صوتها واحساسها وكلمات الاغانى .. حساها جايه فى وقتها بالظبط .. وفعلا حسيت بان فيه أمل فى بكره .. حساه ان الدنيا لسه مخبيه ليا حاجات كتير احلى بكتييييييييير من كل اللى عشته .. وفيه امل ان الدنيا هتعوضنى عن كل دمعه او لحظة الم بفرحه جميله هاديه وصافيه.

كمان .. فيه رضى
ايوه فيه رضى .. يعني بقيت احب حياتى اكتر من الاول بكتير .. واكتر من اى يوم تانى عشته فى حياتى قبل كده .. بدات افهم نفسي اكتر وبدات اخطط لمستقبلى صح وارسم خطوطه بايدى وبارادتى الحره .. من غير تنازلات علشان ارضى اى حد .. بقى فيه رضى كبير جوايا بتقسيمه ربنا لكل حاجه فى حياتى .. ولما بتمنى حاجه ومش بتحصل برضى وبقول لنفسي لعله خير .. اكيد ربنا شايلى حاجه احسن .. ولما بتمنى حاجه وبتحصل .. بفرح فرحه ما تسعهاش الدنيا بحالها .. وبشكر ربنا على عطيته ليا وكرمه عليا.

اهم حاجه فى حياه البنى ادم انه يعرف هو عايز ايه بالظبط من حياته ويعرف ازاى يسعد نفسه .. ازاى يحققلها الراحه والامان والاستقرار والسعاده .. ازاى يساعدها علشان تنجح وتحقق امانيها علشان هى كمان تساعده.
اهم حاجه الواحد يكون صريح مع نفسه .. مش مهم يكون صريح مع باقى الناس .. المهم ما يخبيش على نفسه مشاعره وافكاره .. حتى المجنونه منها واللى ممكن يفتكر ان صعب تحقيقها .. لان ما فيش حد هيحس بالواحد زى ما نفسه هتحس ..




هناك 4 تعليقات:

غير معرف يقول...

حالة جميلة يارب يطول وقتها وتعيشى فيها كتير .. بالصدفة كنت بسمع اغنية فى أمل وانا بقرأ :) فقلت لازم اعلق

كلامك لأنه من قلبك وصل اوى

Unknown يقول...

حلوه الصدفه اللى خلتك تدخل مدونتى وتقرا تدوينى وانت بتسمع نفس الاغنيه اللى كنت بسمعها وانا بكتب الكلام ده

يارب الحاله دى يعيش فيها الجميع .. الهدوء والسلام النفسي ... والأمل والرضى

Mezo يقول...

استخدامك للالفاظ دي
(الهدوء والسلام النفسي ... والأمل والرضى )

يخلي اي تعيس يبص للنص المليان من الكبايه .. كتر الف خيرك

غير معرف يقول...

صافي السيد:

يارب دايما ياقمر في حاله حلوه وسعاده ورضي وقناعه دايما بجد

وفعلا مفيش حد بيحس بالانسان الا نفسه