السبت، مارس 09، 2013

دروس مستفادة

ما وصلتش للعمر ده ببلاش ..  هما صحيح كلهم 23 سنة ونص .. بس برضه كتير قووى .. ده ايام زمان .. زمان قوى يعني .. كان فيه ناس بتموت اصغر من كده وهى عامله اعمال عظيمة جدا .. اما انا فكل اللى عملته فى حياتى انى خلصت تعليم واشتغلت .. وشكرا

بس فى خلال الفترة العمرية اللى عشتها  اتعلمت شوية دروس .. واول درس اتعلمته ان ماحدش بيتعلم ببلاش .. وعلشان تاخد درس محترم لازم تدفع تمن اكثر احتراما

فقررت انا بقى انى اكتب شوية من الدروس اللى اتعلمتها  واللى انا حاسه بيها قوى اليومين دول .. ورزقى ورزقكم على الله ..

* ما تصدقش اى حد بيوعدك انه هيحبك على طول .. لان انت نفسك مش هتقدر تحب حد على طول .. النفس البشرية غريبة وبيتبدل حالها فى الدقيقة الف مرة 

* انت الوحيد فى الحياة اللى هتحب نفسك بجد، والوحيد اللى هتخاف على مصلحتك، والوحيد اللى ممكن تثق فيه

* ما تستناش من اى حد انه يحس بيك، او يفهم انت بتحس بايه، من الآخر ما تستناش اى حاجة من اى حد

* ما تتوقعش انك لما تغيب حد هيهتم بيك او هيقلق عليك، وما تستناش من حد انه يهتم بغيابك .. برضه ما تستناش حاجة من حد

انا مش متشائمة ولا مقفلاها بزيادة ولا حاجة الفكرة بس انى وثقت فى الناس كتير وصدقت كتير وتوقعت حاجات كتير واتمنيت حاجات كتير وطول حياتى كل اللى بتمناه وبستناه من اى حد مش بيحصل، وتقريبا غالبية الناس اللى وثقت فيها وتوقعت ان عمرهم ما هيخونوا  ثقتى فيهم حتى لو بمجرد كلمة  طلعونى فى الاخر هبله وخانوا الثقة دى.

لولا ان الانسان ما ينفعش يعيش لوحده كنت اتمنيت فعلا انى اعيش لوحدى .. ولو بايدي انى الغى الاحساس كنت اول كائن حى فى الدنيا هيطلب انه يعيش من غير ما يحس بحد ولا بحاجة ..


حالة اكتئاب .. ما تاخدوش على كلامى 


هناك 3 تعليقات:

غير معرف يقول...

الفكرة مش فكرة ان الناس مش كويسة أو بتخون.
كل ما في الأمر ان كل واحد ليه وجهة نظره في كل شي .. حتى المعاني المجردة زي الحق و العدل و الصدق بتختلف رؤيتها من شخص لشخص.

ممكن حد في نظرك خان الثقة أو مكانش قد المسئولية, و في نظره أو نظر أشخاص تانيين يكون أدى مسئوليته على أكمل وجه.

بكل بساطة توقعي الأسوأ و أحسني الظن بالناس.

"You can't know a person until you've walked a mile in their shoes"

valē!
8

doaa gamil يقول...

دى حقيقة فعلا ...
الحياة علمتنى فعلا ان الواحد لازم يتوقع الاسوء علشان لو حصل ما يضايقش ..

بس الصعوبة بقى فى انى اتوقع الاسوء فى نفس الوقت اللى المفترض انى هسبق فيه بالخير وهحسن الظن بالناس !!

غير معرف يقول...

1. توفعي الأسوأ من "الحياة" و أحسني الظن بالناس.

2. إذا بلغك عن أخيك الشيء تنكره فالتمس له عذرا واحدا إلى سبعين عذرا، فإن أصبته، وإلا، قل لعل له عذرا لا أعرفه.

3. "لا يلدغ المؤمن من جحر واحد مرتين".

و بدمج المعطيات 1 و 2 و 3 ممكن نوصل للحل :)

valē!
8