انا ما بحبش حد

هتصدق لو قلتلك انى ما بحبش حد .. او بمعنى اكثر دقه ووضوح انا ما فيش فى حياتى علاقة حب عاطفيه .. ولا من طرف واحد ولا من طرفين ولا من طرف تالت حتى ..  ومع ذلك انا على طول عايشة فى حاله حب وبحلم بالحب وكانى عايشه فيه .. بكتب عنه وكانى عايشه فى حاله حب عنيفه.. لو لاحظت يعني نص كتاباتى تقريبا عن الحب .. وبكتبها وكانى بحب شخص معين وبوجهله رساله ما .. ومواقف كتير بعيشها على الورق لكن الحقيقة انه ما فيش حد فى حياتى ..

فيه اللى بيتهمنى انى قافله على قلبى ومش سايبه يتنفس  وفيه اللى بيتهمنى انى ما بعرفش أحب اصلا .. والحقيقة هى انى يمكن اكون بجد خايفه عليه .. انا جربت فى يوم افتح لقلبى الباب واسيبه يخرج ويشوف ويجرب ... بس اكتشفت ان التجارب  لما تبقى  ليها علاقة بالقلب ما تنفعش خالص .. القلب واحد وما نستغناش عنه

فقررت انى اقفل عليه بميت قفل وميت مفتاح .. وما اسمحش لاى حد يقرب منهم الا لما يمر بمليون امتحان وامتحان .. لكن ومع كل ده برضه بحب الحب وبعيش نفسي فيه وبستمتع بكل احاسيسه .. بطلعها فى الكتابه .. فى الأغانى .. فى انى اسرح شوية بخيالى لبعيد ..  وانى فى النهايه ادعى ربنا من قلبى انى اعيشه زى ما بحلم بيه .. بس اعيشه صح .. فى النور وفى حلال ربنا

 ومش معنى كده ان ما فيش حد فى الدنيا  يستاهل .. بس معنى كده انى انا اللى ما قابلتش الحد ده لان أكيد فيه انسان يستاهلنى واستاهله بس ربنا مآخر لقانا لحكمه ما يعرفهاش غيره .. الانسان اللى يستاهل افتحله الباب والشباك والبلوكنات وادخله  حياتى وقلبى وعقلى ويمتلك مستقبلى وتاريخى .. واشيل اسمه وابقى جزء منه ويكون  جزء منى ويكون اولادى نور عنيا جزء مشترك بينى وبينه .. لسه ما قابلتهوش ومعاد وصوله ما يعلمهوش الا ربنا، قريب ولا بعيد، الله أعلم.

انا عارفه ان شروطى صعبه .. واللى هيعدى من امتحان هيبقى خايف من اللى بعده .. بس هو انا عندى ايه غير قلب واحد .. عايزه اديه لانسان واحد هعيش معاه حياتى الواحده .. واحافظ عليه فى غيبته وحضوره علشان يكون شريكي فى جنه ربنا باذن ربنا.

ولحد ما يجي البطل الخيالى .. اللى هيكسر كل الحواجز اللى بنيتها فى حياتى .. ولحد ما يقدر يسرقنى من نفسي ويسرق قلبى ويحببه فيه .. انا ما بحبش حد .. العالم كله عندى عزيز .. لكن مش أكتر من معزه الأخوات .. الأصحاب .. الأصدقاء.. اى مسمى بقى .. لكن قلبى مش ملك لحد ..