قصة حب جميلة بدات النهاردة بيني وبين عمرو .. اسمحولى اناديه حبيبي يعني
حبيته من اول نظرة .. لانه ما ينفعش تعمل معاه اى حاجة تانية غير انك تحبه .. ومن .. اول نظرة كمان وهو كمان حبنى بس ممكن نقول بعد ربع ساعه كده
قالولى عنه ده تنك ومش بيكلم اى حد ومش بيقبل اى حد بسهولة ..
يعني مش اى حد بيعجبه .. بس على مين لست انا ..
بدات قصه حبنا من اول ما اتكلمت معاه وبدات اناغشه واحاول اقرب منه
قعدنا نتكلم ونلعب ونضحك انا وهو .. وكل اللى كانوا معانا غاروا منى وبداوا يقربوا مننا
بيحاولوا يقربوا منه وياخده حته من قلبه زى ما انا عملت .. بس برضه على مين
اكيد ما فيش زى دودو .. الحب الحقيقي بيبان .. وانا حبيته من قبل ما اشوفه اصلا .. من مجرد كلام سمعته عنه من بعيد
وعلى كده بقى احنا طول اليوم .. مش بيكلم حد غيري ..
ومش بيقعد جنب حد غيرى ومش بيسمع كلام اى حد غيرى انا اصلا ..
واجمل لحظة بقى لما لقيته جايبلى وردايه وبيدهالى انا دونن عن كل البنات اللى معانا
يا حبيبي يا عمرو .. للدرجة دى حبيتنى .. وبسرعه كده
انا بجد حبيته قوى .. حبيت ضحكته وبرائته اللى مالهاش زى
حبيت نفسي اللى هو حبها .. واتمنيت ربنا يرزقنى بواحد زيه
وطول الطريق وانا مروحه مش بدعى غير بالدعوه دى
يارب ترزقنى بالذريه الصالحه .. يارب ترزقنى وما تحرمنيش
عمرو ابن اخت صحبتى .. عنده 6 سنين
وكان مكسوف جدا فى بداية القعده ومش بيكلم حد خالص
ولما انا قلتلته ممكن العب معاك يا عمرو قالى تعالى
ومن ساعتها بقينا اصحاب .. وبجد ما كانش بيسمع كلام حد غيري
ولا عايز يقعد مع حد غيري .. وما اعرفش ليه
بس اكيد هو حس باللى جوايا والاطفال بيكون حبهم خالص لوجه الله
ما بيكونش جواهم اى اطماع بشريه .. ولا الوان اسود واخضر وفحلوقى
خلانى العب وارجع لايام الطفولة بتاعت زمان
اتمرجحت زى ما اكون قده وعندى ست سنين انا كمان
وكان هو اللى بيزقنى على المرجيحه كمان
خلانى اضحك من قلبى واضمه فى حضنى وانا بجد فرحانه
بس خلانى اشتاق فوق شوقى الكبير قوى لانى اكون ام
الاحساس اللى بيموتنى بجد .. بحب الاطفال جد وامنيه حياتى اكون ام لاطفال كتير
اكون ام صالحه وكويسه .. واربى اولادى زى ما بيقولوا احسن تربية
بس بجد تبقى احسن تربية .. دينيه واخلاقيا واجتماعيا وعلميا وثقافيا
احساس الامومة اللى بيكبر جوايا كل يوم ..
بيكبر اكتر لما اقرب من طفل والعب معاه والاقيه عسول واحبه ويحبنى
ببقى هتجنن ويبقى عندى ابنى .. بتاعى انا .. ملكى انا
يقولى يا ماما .. نلعب انا وهو طول النهار والليل
اسيب حياتى ودنيتى كلها علشانه .. اكيد اكيد مش هيبقى فيه فى حياتى حد اهم منه
ياااه .. انا خايفه اعيط وانا بكتب الكلام ده .. او شكلى عيطت فعلا
انا هقفل كلام على كده وانا بدعى ربنا فى الايام المفترجه دى
يااااااااااااااااااااااااارب
يارب ترزقنى وما تحرمنيش يارب ..
يارب تحققلى احلامى يارب .. وتسعدنى فى باقى ايامى
يارب ابقى ماما .. قريب يااااااااارب
هناك 4 تعليقات:
إيه يا دودو ده انتى خلتينى أعيط بجد من كتر المشاعر الصادقة دى.... ان شاء الله ربنا يرزقك الذرية الصالحة يا رب و تكونى أم مثالية زى الكتاب مابيقول:) بس حافكرك و انتى ماشية ناكشة شعرك و بتجرى ورا شبيه عمرو و بتصرخى علشان تأكليه:) ربنا يسعدك يا دودو يا رب و يحققلك كل اللى بتتمنيه يا رب:)
يا سيدتى انا عاوزه اصلا اشد شعرى واقطع هدومى وامشى اكلام فى نفسي .. بس هو يجي بس ..
وبعدين انا اصلا همشيى ولادى على عجين ما يلخبطهوش .. مع انى متاكده انهم مش هيشوفوا غير دلع × دلع ولعب وضحك .. ماهى امهم هتكون اعيل منهم اصلا ..
يارب يارب يزرقنى ويرزق كل الناس يارب :))
وبجد بقى منوره مدونتى يا رانيا .. بجد والله
يا شالوووووووووووووووووووووم
لا جامده .. و بتعرفى تثبتى
يا ستى ربنا ينولك مرادك بس على رأى رانيا ياريت تستحملى و متنكشيش شعر
اللهم آمين يا مصطفى ..
وساعتها مش هترف اشد انكشه اولع فيه .. فداهم يعني :$:$
منورنى يا فندم .. من زمان ما شفناكش
إرسال تعليق