هدوء نسبي

لحظات من الهدوء وشوية استجمام 

نفسي انام قدام البحر .. اغرق فى لونه واسرح مع صوته

نفسي فى شوية هدوء .. شوية جمال .. شوية برائة

يمكن اكون بضحك .. ويمكن اكون بحب اللى بعمله فعلا 

بس فى اوقات ببقى نفسي حد يحس بيا ويحس بالحاجات اللى انا مش عارفه اقلها 

حد يفهم ان مش دايما بيكون ورا الضحكه دى ضحك من جوايا

او على الأقل مش دايما بكون مبسوطه ومرتاحه قوى وانا بضحك زى ما هو باين عليا

علشان كده بحلم بالبحر .. اللى بعشقه وبيوحشنى وانا جواه

لان البحر بيعمل جوايا مفعول ما يقدرش عليه اكبر معالج بالطب الطبيعيى والهوكس بوكس دول

صوت البحر بيعيشنى فى حاله من الشجن مالهاش مثيل .. 

مع لونه بدرجاته الزرقا البديعه سبحان من خلقها ولونها يعني ..

مع نسمات الهوا اللى بتعمل فى الواحد برضه حاجات غريبه .. كانها بتفوقه من موت وبتقوله اصحى .. انت انسان .. انت لسه عايش

مع ريحه الملح وريم البحر ..

مع شمسه الجميل .. اللى مهما حرقتنى بحبها وبستحملها .. 

هو كده البحر معايا .. بيغسلنى حتى لو ما نزلتهوش

وكل ما احس انى فى دوشه وبجرى ورا نفسي وحياتى اتزحمت مره واحده

بحس انى محتاجاله قوى .. محتاج اقف على شطه شويه علشان يرجعلى الهدوء

ولانى بعيده جدا جدا عنه وممكن اقعد كذا سنه ما اشفهوش فيها 

بحلم بيه .. وبفتكر اخر مره وقفت فيها قدامه ..

وسلامى ليه وانا بقوله ان شاء الله هرجعلك تانى . وان شاء الله ما اكونش لوحدى ويكون معايا حبيب نتمشى على رملك وادينا فى ايد بعض ..

بس بجد بقى .. انا نفسي فى شوية هدوء ..

نفسى ابعد فجاه عن كل الناس ..

اقفل الموبايل 

اقفل الفيس بوك وتويتر

واقفل البلاك بيرى

.. ايه كميه الاختراعات دى :(

مش بقلكم الدنيا بقت دوشة

ومع ده كله ما انزلش الشغل كمان واقعد اسبوع مغمضه عنيا .. 

افضى دماغى

انسي كل حاجه بتحصل خارج حدود اوضتى

انسي الناس .. وينسونى هما كمان

ما اكلمش اى حد وما اتكلمش فى اى حاجه

يمكن لما اعمل كده ارتاح شوية .. واحس بالهدوء بدل الدوشة اللى الحياة فيها

وبدل ما الواحد حاسس انه بيجرى ورا نفسه وماعندوش وقت يفكر حتى هو نفسه فى   ايه .. او بيحلم بايه .. او حتى عاوز ايه من بكره

هو بيتحرك وخلاص لان ما فيش وقت نقعد على جنب ونفكر

ولان حلمى البريء ده مستحيل .. انا قررت اسجله فى المدونه يمكن فى يوم من الايام اقدر احققه وساعتها هرجع للموضوع ده واقول .. اللى كتبته لقيته .. هيييييييييه :)))