حكايات عن حبيبي ... 2

 انا لازم اكتبلك كل حاجه من دلوقتى علشان ما انساش انا عايزه اقلك ايه، احسن من كتر الكلام اللى نفسى اقولهولك حاسه انى اول ما هشوفك هنسي كل حاجه ومش هقلك  اى حاجه .

نفسي أقلك مثلا انى بحبك قوى، وانك اجمل نعمه ربنا بعتهالى ، كفاية انى معاك بحس بنفسى اجمل ست فى الدنيا بحالها، بحس بأنوثتى اللى الدنيا بتضيعها ، كفاية انك مش بتشوف فى البنات غيرى انا ومش بيملى عينك غيرك .. كفاية انك حبيبي يعني.

عايزه أقلك كمان انك بتوحشنى قوى لما بنام كل يوم، بحس النوم بياخدنى منك وببقى نفسي لو افضل صاحيه العمر كله قدام عنيك بس، ابص فيهم واسرح .. وكده مش هبقى عايزه حاجه تانيه خاااااااااالص.

عايزه أقلك ان الناس بقت وحشه قوى ومش بترحم حد ومش بتسيب حد فى حاله، ودايما بيفهموا كلامى وطريقة كلامى غلط، ودايما بحس انى عايزه اجرى استخبى من الدنيا بحالها فى حضنك انت .. تضمنى بحنانك اللى بحس فيه انى بنتك مش بس مراتك وحبيبتك.

عايزه اقلك الحياة قبلك ما تتحسبش، كانت وقت وضايع من عمرى، وان الحياة تتحسب بس باللحظات اللى بلمسك فيها، اللى بتقولى فيها "بحبك" باللحظات اللى بتضمنى فيها وتبص فى عينيى، تتحسب بس باى ثانية عشتها معاك.

عايزه أقلك انك اصلا وحشتنى قوى من دلوقتى، وان كل يوم بيعدي وانا لسه ما اعرفكش صعب قوى وتقيل قوى على قلبى، كل يوم بيمر بحس فيه بوحده أكبر بتموتنى، وبحس فيها بخوف اكبر من الدنيا والناس، واحيانا كمان بخاف من نفسي.

انا مثلا النهاردة بالذات حسيت قد ايه انا محتجالك، مش عارفه ليه النهارده بالذات .. بس حسيت فجأة انى لوحدى قوى، و انى ضعيفه قوى وانى محتاجالك قوى قوى ، حسيت انى نفسي فى حضن دافى منك تهون عليا الدنيا والناس .. ، ونفسي فى كلمة رقيقه منك تحسسنى انى لسه عايشه ..

انت عارف انى بحبك قوى وانت لسه عند ربنا ما جتليش ولا شفتك ولا أعرفك .. وعارف انى هفضل أحبك كده حتى لو فضلت مستخبى منى العمر كله، لان حبك ده هو الأمل الوحيد اللى انا عايشه عليه، الأمل انى هشوفك فى يوم وهيبقى أجمل يوم فى حياتى.