زحمه الأيام

ما بحبش الأيام الزحمه, مش بس الزحمه فى الشوارع والناس، لكن كمان الزحمه فى الحاجات الكتير اللى بعملها فيها، باحس انى بتعب نفسيا لما باشوف كمية ناس كتيره فى يوم واحد، بيجيلى ضغط عصبى لما فى يوم واحد اروح اماكن كتير ومختلفه، واتعامل مع ناس كتيره ومختلفه برضه.. بحس فعلا انها زحمه يا دنيا زحمه..

النهارده رحت الجامعه، علشان اجيب ورق واشوف اصحابى، وقد كان شفت ناس كتير بقالى مده ما شفتهاش فطبعا وقفت مع كل واحده شويتين ورغيت برضه مع كل واحده حبتين كده، بعد الجامعه طلعت على المكتبه فى التحرير علشان اجدد استعاره الكتب اللى معايا (بتاعت البحث) فطبعا ركبت من العباسية للتحرير واكيد شفت ناس كتييييييير اوى فى السكة وانا راكبه :(

فى المكتبه اكيد برضه شفت ناس، بدأ من بتاع الامن اللى على الباب من تحت، وبتاع الامن اللى على الباب من فوق، والبنوته امينه المكتبه، كل دول اتكلمت معاهم، وشفت ناس كتير فى المكتبه اللى اعرفه واللى ما اعرفهوش .. زحمه يا دنيا زحمه.

التحرير كانت واقفه على رجل، كل الشوارع والاتجاهات زحمه زحمه زحمه، العربيات واقفه مش بتتحرك تقريبا، وانا كنت هطلع على رابعه علشان اروح للدكتور استشارة بعد اسبوع المرض الفظيع اللى عدى عليا، هو صحيح انا خفيت من البرد بس جاتلى كحه شديده اوى مبهدلانى، المهم انى ماكنتش عارفه اركب من كتر الزحمه فاخدتها من اصيرها واتمشيت لرمسيس، وركبت من هناك مينى باص لرابعه العدويه.. الشوارع زحمه بطريقه مش طبيعيه، ما هو كنت فى ساعه الذروه بقى.. اخدت ساعه من رمسيس لرابعه، ولحقت معاد الدكتور بالعافيه.

اصلا الرجال اللى بيقطع الحوجزات ماكانش عاوز يدخلنى علشان الدكتور كشف كتير النهارده، بس الممرضه قالتله دخلها اخر استشارة بقى، وبصراحاه انا ما ردتش اديها فلوس على الحركة دى، علشان كنت هحسها رشوه بصراحه .. مش عارفه ليه!!

بعد ده كل طلع عندى التهاب فى الشعب المخاطيه :(( يا عينى عليا!!

الدكتور ادانى 2 دوا، واحد مهدئ للكحه والتانى للحساسيه ... ويارب اخف بقى، احسن الكحه بجد حاجه رخمه اوووى.

وادى يوم زحمه زحمه فى حياتى، لدرجه انى بعد الغدا لما نمت وصحيت حسيت انى فى يوم جديد مش فى نفس اليوم، مش متخيله ان اليوم ده لسه ما خلصش .. هو مش ناوى يخلص ولا إيه؟؟!