لما تتوه جوا نفسك

====================

احيانا ما بفهمش نفسي
مش بفهم انا عايزه ايه ومحتاجه ايه وبفكر فى ايه
مبسوطة ولا زعلانه .. ولا ايه؟؟
ببص فى المرايا ما بعرفنيش .. بحسنى حد غريب
وكانى اول مره بشوفه
بفتح البوم صورى القديمه واتفرج عليهم
وبسرح شوية فى كل صورة وبسأل سؤال
يا ترى كنت بفكر فى ايه وقت الصورة دى
يا ترى كان ايه فى بالى
كنت مبسوطه من حاجه ولا مهمومة وشايله جبال ..
*-*-*-*-*-*-*-*-*
بستغرب ازاى الواحد ممكن يحتار فى نفسه
ازاى ما يفهمش نفسه ..
مشكله كبيره مش كده ..؟
اصل لو انا ما فهمتش نفسي مين بقى هيفهمنى ؟؟
لو انا ما حستش بمشاعرى واحاسيسي .. وفهمتها
مين بس اللى هيحس بيها !!
بس كتير بحس ان نفس الواحد اكثر تعقيدا من انها تتفهم ببساطه
معقده اكتر من الواحد يفهمها بنفسه
*-*-*-*-*-*-*
الموضوع شكله خطير
شكلنا كده محتاجين دكتور امراض نفسيه
.....
او ببساطه.. محتاجين شوية هدوء
هدوء من الخناق والصوت العالى والتفكير فى الصغيره قبل الكبيره
هدوء من المشاكل بتاعت الدنيا ومن زحمتها
شوية هدوء وشوية تفكير فى نفسنا
يعني نشتغل لنفسنا دكاتره نفسيين ونحاول نفهمها ونحللها
نمسك ورقه وقلم ونكتب ..
بنحب ايه وبنكره ايه ونفسنا في ايه وبنخاف من ايه
نكتب كل حاجه نعرفها عن نفسنا
وكل حاجه نفسنا نعرفها عن نفسنا

ومين عارف؟؟
مش يمكن نفهم نفسنا

*-*-*-*-*-*-*-*-*-*-*-*-*-*-*-*-*
دعـــــــــــــــــــــــــاء جميل