لو مش قدها .. ياريت ما تبدأهاش

لو عرفت .. قبل ما تحب .. فكر؟؟ ده لو قدرت تفكر يعني :)) 

ما تفتكرش الموضوع سهل وبيجي كده، لان فى الأول هتتعب كتير لحد ما تقابل نصك التانى، الانسان اللى ترتاحله وتحبه وتحس انه فعلا بيكملك ..هتتعب كتير وانت بتدور عليه وبتقابل ناس فى حياتك لحد ما قلبك وعقلك يرسو على بر ويختاروا انسان معين علشان يبقى حبيبك وحياتك وكل حاجة ليك فى الدنيا.

وبعد كل المجهودات الذهنية والنفسية والعاطفية اللى ممكن تعيشها فى حياتك علشان تقابل الانسان ده لازم تبقى عارف ومتوقع برضه ان ما فيش حاجه سهله وما فيش حاجة بتمشي بالساهل.

يعني لازم تبقى عارف انك زى ما هتدخل على ايام حلوه فيها حب وفرح وضحك ودلع وفى نفس الوقت برضه داخل على ايام تانيه فيها دموع وشوق وفراق واشتياق وتفكير وسهر وقلق .. فاوعى تفتكر ابدا ان الحب سهل، او كله حلو ومريح.. هو زى كل حاجه فى حياتنا فيها الحلو والمر فى نفس الوقت .. والحلو ما يكملش برضه.

قبل ما تقرر تحب .. ده اذا كان الحب قرار يعني، لازم تبقى عارف كويس انك بتربط مصير انسان تانى بيك، انسان محتاجك وعايزاك وانت بالنسبة له حاجة مهمه جدا، يعنى لازم تبقى قد المسئولية انك هتكون مهم جدا فى حياه انسان تانى قبل ما يكون هو كمان مهم جدا فى حياتك.

يعني زى ما هيكون نفسك انه ما يجرحكش وما يظلمكش وما يضايقكش لاى سبب من الاسباب لازم انت كمان تكون مستعد تقدمله نفس الحاجات لانه هو كمان هيكون محتاجها منك .. 

محتاج انك تحبه وتخاف عليه وتهتم بيه وتحسسه انه رقم واحد فى حياتك، لازم تحس باهميته وقيمته ..تخاف عليه بجد وتساعده فى كل وقت يكون محتاجلك فيه، يعني قبل ما يفكر يطلب مساعده تكون اول واحد بتمدله ايدك..

لازم تعرف ان العلاقة بينكم هتكون مبنية على طريق اتجاهين يعنى رايح جاى، يعني زى ما هتديله هتاخد منه وزى ما لازم تاخد منه لازم هتديله ..وكل ما تديله اكتر ويكون هو مبسوط اكتر كل ماهو هيديلك اكتر علشان يخليك انت مبسوط اكتر.

الحب ككلمه صغيره فى حروفها وتكوينها .. لكن كاحساس بنعيشه وبيعيش فينا الموضوع كبير واكبر من اى حاجة تانيه ممكن تتخيلها فى حياتك.

هو احساس احنا بنحتاجه علشان نعيش وبيحتاجنا علشان هو يعيش .. يعني من غير الحب حياتنا بتبقى سخيفه ومالهاش طعم زى القهوة المره، ومن غير اهتمامنا ورعايتنا احساس بالحب مهما كان عظيم وكبير هيدبل ويموت زى الشجره الكبيره اللى ما بنرويهاش.

لو عرفت تفكر فى اللحظة الفاصلة المهمه دى .. اللحظة اللى قلبك هيدق فيها ويقلك انا حبيت .. انا اخترت انسان معين وعايزه هو، ونفسي اكمل حياتى معاه وليه .. لو عرفت تفكر فى اللحظة دى وتقرر انك هتكون قد المسئولية اللى انت داخل عليها .. علشان لو طلعت مش قدها .. ياريت ما تبدأهاش.. علشان ما تظلمش نفسك وعلشان ما تظلمش حد تانى معاك هيبقى كل ذنبه انه حبك.