واحشنى

فكرت فيها مالقتلهاش تفسير .. يعني ايه يكون فيه انسان واحشك قوى!! يعني ايه اصلا توحش حد او حد يوحشك!! الاحساس نفسه عامل ازاى يعني ؟؟

فضلت افكر افكر مش عارفه .. جربت اسأل قلبى يعني ايه تبقى واحشنى .. حاولت ادور وادعبث جوايا على الاحساس اللى انا حاسه بيه يمكن اعرف اوصل لتفسير منطقى او حتى غير منطقى .. بس مش عارفه برضه.

اصل واحشنى دى كلمة صغيرة قوى فى عدد حروفها لكنها بتوجع فى القلب قوى قوى ، بتحس فجأة انك وحيد واقف بطولك فى الدنيا، بتحس كان فيه جزء من جسمك مش موجود، كانه سابك وهرب بعيد وانت بتجري فى الدنيا بتحاول تلاقيه علشان ترجعه مكانه وتكمل الجسم من تانى.

لما يكون فيه انسان واحشك قوى .. كل شيء فى حياتك بيكون ناقصه حاجه، لوهله بتتخيل انك مش عارف ايه اللى ناقصك لكن فى الحقيقة اللى ناقصك هو الانسان اللى واحشك، الضحكة مش بتكمل من غيره .. الفرحة ناقصها وجوده .. النجاح مالهوش طعم من غيره، اى لمه او خروجه دايما فيها صورة انسان المفروض يكون موجود علشان القعده تكمل.. بس هو مش موجود.

لما بتوحشنى قوى بحس انى زى الأم اللى ابنها ضاع منها وسط الزحمه وبتجرى بين الناس بلهفه تقلب فى كل الوشوش تدور على ابنها، قلبها بيدق جامد قوى وجسمها بيترعش، مش عارفه تفكر فى اى حاجة فى الدنيا ولا تتكلم مع اى حد فى اى حاجة غير عن ابنها .. مش بتهدى ولا ترتاح الا لما يرجع لحضنها وتحسه بين اديها وتطمن انه معاها.

وزى الأم اللى برضه بعد ما بتحضن ابنها جامد قوى بتزعقله وتقوله ما تسبش ايدي تانى وممكن تضربه كمان من كتر خوفها عليه انه يضيع منها تانى، بتلاقينى بعد غيابك وبرغم لهفتى عليك بكلمك بحده وجفاء بحاول أؤنبك على بعدك عنى بحاول اخوفك من البعد تانى مع ان فى الحقيقة انا اللى بخاف من غيابك وبعدك.

واحشنى .. بتوحشنى .. وحشتنى .. هتوحشنى .. وايه بقى !!

اجمل حاجة فى الاحساس ده انه بيولد جوا الانسان الامل .. امل ان من بعد الفراق لقى .. وامل ان اللحظات والايام الصعبه اللى بتعيشها بعيد عن الانسان اللى واحشك هيجلها يوم وتخلص وتنتهى .. 

وبيتولد احساس جميل من الراحة بمجرد ما تشوف الانسان ده، احساس بينسيك تعب الايام اللى عشتها من غيره، الاحساس ده لوحده بيديك الأمل فى انتظاره، والأمل احساس حلو ومريح.

بس برضه حاسه ان وصفى لاحساس ان حد يبقى واحشك ناقصه حاجة مش عارفه هى ايه، بس اللى اعرفه انه اصلا احساس معقد، بيتكون من الحب والحزن والألم .. فيمكن علشان كده وصفه صعب، لان لازم الاول اوصف يعني ايه أحبك .. وبعدين اوصف ازاى بكون حزينه ووحيده وانت بعيد عنى، وهوصف كمان الالم النفسي والروحى الشديد اللى بعيشه وانت بعيد.. وكل احساس من دول محتاج لوحده كتاب يتشرح فيه.