هتضحك على مين ؟؟

مهما حاولت تدارى وتخبي وتضحك عليها هى فهماك أكتر من نفسك ..

بتحاول تقنع فيها ازاى بس؟؟ .. وهى بتفهم كل حاجه بتخبيها عن الدنيا بحالها .. يعني لو كذبت على الدنيا بحالها .. وفكرت كمان تصدق كذبتك وتعيش فيها هى هتفهمك.

بتعرف اذا كنت مبسوط ولا متضايق ..

من غير ما تتوه فى الكلام معايا وتقول انى برغى وبقول كلام فاضى .. أنا بتكلم عن نفسك!!

نفسك اللى جواك واقرب منك ليك .. نفسك اللى ممكن تنساها وسط مشاغل الدنيا .. وتيجي عليها علشان ترضى حد او تعمل حاجه لحد ..

نفسك اللى ممكن تحاول تقنعها انك كويس ومبسوط وكل حاجة فى حياتك كويسة وزى الفل مع ان ما فيش اى حاجه كويسه .. ومع ان من جواها ضعيفه ومشروخه ومحتاجه اللى يقويها ويقف جنبها.

وهى نفسها اللى بتحاول تدارى جواها الفرحه وتكتمها وتخاف حد ياخد باله انك مبسوط .. او انها "نفسك" مبسوطه أحسن تتحسد ..

نفسك دى اللى بمزاجك بتسمح لحد يدخل جواها ويعيش فيها .. وتفتحله كل أبوابها وأقفالها .. وبمزاجك بتقفلها فى وش حد تانى وما تسمحلوش بس يعدى من قدام الباب ...

يعنى من الآخر انت قدامها كتاب مفتوح مهما حاولت تبين قدامها عكس اللى انت حاسه هتفهمك برضه وهتعرف انت بتحاول تخبى ايه .. يعنى مش هتعرف أبدا تضحك عليها .. ولا تخدعها ولا تغشها .. ومع شوية وقت انت لوحدك هتكتشف كده .. وهتلاقى نفسك مضطر انك تبقى صريح مع نفسك .. تواجهها بالحقيقة .. بالوحش قبل الحلو .. 

هى الشيء الوحيد فى حياتك اللى مش هتعرف تضحك عليها ولا تغشها ولا تكدب عليها .. لانها بتعرف وبتحس بيك قبل ما انت نفسك تحس بنفسك او تفهم انت عاوز ايه ..

وجميل انك تبقى فاهم كده علشان تبقى صريح مع نفسك .. وتواجهها بكل حاجه واى حاجه.. وتفتحلها قلبك وتفضفض معاها بصراحه .. لان ساعتها هترتاح جدا .. الصراحه بتريح برضه.

وجميل قوى لو لقيت حد فى حياتك أقرب ليك من نفسك .. بيفهمك من نظرة .. من حركة .. من حاجه صغيره قوى بتعملها وانت مش واخد بالك .. بيعرف لوحده امتى انت مضايق .. وامتى انت مبسوط ... امتى يهزر معاك وامتى يتكلم بجد .. امتى يطلب منك حاجه وامتى انت محتاج منه انه يبقى بس موجود جنبك .. 

جميل قووى انك تلاقى فى حياتك حد يفهمك لو انت مش فاهم نفسك، ينصحك لو انت محتار .. ويخفف عنك لو انت مخنوق .. والأجمل لما الشخص ده يعمل كل ده وهو مش عايز منك أى حاجة .. بيعمل كل ده علشان نفسه بتحس بنفسك كده وخلاص .. من غير اسباب من غير شروط ..