حبيبي ... شكرا

زوجى الحبيب .. شكرا

شكرا على كل شيء عملته وبتعمله علشانى كل يوم ..

شكرا انك بتحبنى .. ودايما بحس انى اهم حاجه فى حياتك

ولانك بتحس بوجعى قبل اى حد تانى .. ولانك بتهون عليا اى وجع بشوفه

شكرا لانك عمرك ما خلتنى ابات فى ليلية زعلانه ودمعتى على خدى ..

ولانك دايما بتحترمنى قدام الناس .. وبتحترمنى واحنا لوحدنا

شكرا لانك دايما سبب فى رسم البسمة فى حياتى .. ولانك سبب انى اشوف الدنيا بالألوان

حبيبي .. انا بشكرك على كل لحظة حب عشتها معاك وبسببك ..

على الدنيا اللى احلوت بيك .. والأيام اللى نورت بوجودك فيها

على اهتمامك بامورى كلها .. وسؤالك دايما عن ادق تفاصيل حياتى .. من غير فضول ومن غير ملل .. لكن بحب .. واهتمام

بشكرك على عتابك الرقيق لما بغلط فى شيء .. على تقديرك لمجهودى لما بحاول اعملك أكله او شيء انت عايزه .. واعكه فى الاخر ومايطلعش زى ما انت عايز .. بتصبر عليا وتتحملنى .. وبتقدر تعبي وتلومنى بهدوء ورقة .. وحب.

لما برجع من الشغل تعبانة .. بلاقيك فاتحلى صدرك تسمع منى بصبر نادر وجوده فى اى راجل فى الزمن ده ..

شكرا لانى بلاقيك جنبى راجل .. بعتمد عليه و بلجأ اليه .. بفتخر بيه ويشرفنى قدام العالم كله انه جوزى .. وحبيبي وابو اولادى .. ودنيتى بحالها.

ولانك أحن عليا من الأم على أولادها .. لما بتعب بلاقيك جنبى تشيلنى وتخفف عنى .. تجبلى الاكل لحد عندى .. وما تلومنيش على البيت لو ما روقتهوش يومين وانا تعبانه .. ولانى بشوف لهفتك وخوفك عليا لو كحيت مره واحده .. زى خوفك عليا ايام الخطوبة زمان ..

شكرا لانك كنت السبب فى انى اكون ام لاجمل اولاد فى الدنيا ..

ولانك بتشاركنى حياتى لحظة بلحظة .. بتشجعنى وتقف جنبي .. بتحققلى احلامى من قبل ما احلم بيها .. وبتحسسنى انى شخص مهم .. وان كلامى مهم .. واحلامى مهمه .. وآرائي وافكارى وكل شيء بعمله .. مهم وله قيمه.

زوجى الحبيب ..

شكرا لانك بتحبنى .. وكل يوم بتحسسنى انك بتحبنى اكتر من اليوم اللى قبله

شكرا انك بتحترمنى .. فى كل شيء وفى اى وقت

شكرا انك بتدعمنى وتشجعنى وتقوينى .. وتحمينى

شكرا انك موجود فى حياتى .. وانك موجود بكل صفاتك اللى فيك .. الحياه من غيرك أكيد ما كانتش هتبقى حياة ..

حبيبي أقلك على سر .. انا بدعيلك كل يوم فى صلاتى .. بدعيلك بحاجات حلوة قوووى ويارب كلها تتحقق وتبقى من نصيبك .. وكمان بشكر ربنا كل يوم على نعمته اللى بعتهالى .. اللى هى أنت .. أجمل نعمه ممكن انسان يتمتع بيها .. نعمه الزوج المحب المخلص

شكرا انك خلتنى أحلم .. وابقى متأكده ان أحلامى هتتحقق

 ====================

انا كتبت الكلام ده وانا لسه ما اتخطبتش ولا ارتبط .. ولا حبيت ولا اتجوزت

بكتبه من وحى كتاب  “the secret”

بشكر ربنا على شيء لسه ما جاش .. وبحلم بيه قوووى .. وبتخيله وبعيش معاه فى بالى كانه حقيقه .. علشان يتحقق ويحصل بجد ..

لان فى الكتاب قالوا كده .. ولما جربتها على حاجات صغيره اتحققت .. فقررت اطبقها على حاجه من اهم الحاجات فى حياة اى انسان مننا ..

قررت انى اشكر ربنا على النعمه دى .. علشان يبعتهالى

*اللهم لك الحمد كما ينبغى لجلال وجهك وعظيم سلطانك *