فلانتاين فى حب مصر

واحنا على اعتاب فلانتاين جديد فى سنة جديدة وكعاده كل سنة هكون فيه لوحدى وهحتفل بيه مع نفسي ..لالالالا استنوا كده .. انا بقول لوحدى؟؟

لوحدى ازاى بس وانا معايا ست الكل كلها، معايا مصر بحالها .. مصر كلها اللى بتحتفل بأجمل أيام فى حياتها .. الحرية والنصر والكرامة والعزة ..

ايام الدراسة ما كنتش بحب انزل فى اليوم ده، وكنت دايما بقول لنفسي هنزل ليه، علشان اشوف قلوب ودباديب واتنين ماسكين فى ايد بعض فى كل مكان .. طب وليه اضايق فى نفسي بس وانا لوحدى وطول عمري لوحدى ..

بس المرة دى حاسه انى رافعه راسي لفوق قوى ومبسوطة ونفسي الف فى شوارع مصر كلها واتفرج على حواريها وناسها وجناينها، مش علشان بقى فيه واحد معايا وهقضى معاه اليوم ده زى ما بنات كتير بتعمل أو بتتمنى، لكن لأن مصر ولأول مرة من 30 سنة هتحتفل بالفلانتاين بنفسها .. وهتشيل قلب أحمر وبوكيه ورد كبيييييييييير وريحته جميله وعَطره.

السنة دى حسه انى هسهر مع مصر .. هخرج مع مصر .. هرقص مع مصر .. هقول شعر لمصر .. هنتناجى انا ومصر

حساه انى بحب مصر اكتر من اى يوم تانى فى حياتى .. ولأول مرة فى حياتى أحس ان مصر كمان بتحبنى وبتقدر حبى ليها.

كنت دايما كل سنة فى الفلانتاين بحب اكتب موضوع رومانسي ... واحلم وأتخيل حاجات كتيره ..بس السنة دى حسه انى أعقل من كل سنة .. شايفه المناسبه دى بنظرة تانية مختلفه ، مش النظرة التقليدية اللى بتقولك بحب نفسي وماما وبابا واصحابى .. لأ .. شايفاها بنظرة أمل وتفاؤل .. وحاسه ان كل الأحلام خلاص بقت قريبة جدا وهتتحقق قريب .. ما بقاش فيه مستحيل لان المستحيل حققناه خلاص .. وبقت من حقى ومن حق كل مصري انه يحلم ويوسع أحلامه .. يحلم بالحب والجواز والشغل والعلم والنجاح والثروة والكرامة والحرية والديموقراطية والنصر ..

نحلم نطلع القمر ونوصل للنجوم ونملك العالم ونبقى اسياده ..

كل فلانتاين وانتى طيبة مصر .. ودايما في حب وبتحبى نفسك وبتحبى ولادك و وولادك كمان بيحبوكى وبيحبوا نفسهم وبيحبوا بعض.