بحب العيد لأنه عيد

العيد يعنى فرحه،فرحه غريبه تحسها طايره فى الهوا لوحدها ، او كاننا بنشربها فى المايه اللى بنشربها ... العيد يعنى بهجه وسعاده بتملى حياتنا لايام ، حتى لو كانت محدوده وقليلة بالنسبة للسنه الطويلة لكننا بنستمتع بيهم، وبنستناهم من العيد للعيد.

العيد بنحسه لما ننزل الصبح قبل شروق الشمس علشان نصلى فنلاقى ناس كتير فى الشارع بتتحرك وكلهم متفقين على هدف واحد، كله على وشه ابتسامه جميله، لانه بيستقبل عيد.
العيد بنحسه من اللمه والزحمه فى المسجد وقت الصلاة، من تكبيرات العيد واصوات الاولاد الصغيرة وهى بتلعب وتعيط فى المسجد وقت الصلاه

بتحسه فى التهانى اللى بنسمعها وبنقولها من اللى نعرفهم واللى ما نعرفهمش كمان.
العيد بنحسه من غير اسباب’ بهجه وحب للخير ربنا بيديهولنا فى قلوبنا لوحده من غير ما نطلبه
لما بنسهر ليلة العيد نبعت مسجات لبعض او نقعد نكلم أصحابنا، وما نرضاش ننام علشان ما تروحش علينا الصلاة
طعم العيدية اللى بتاخدها من ماما وانت بتبوس ايديها وتقولها ربنا يخليكى ليا يا ست الكل، ولا حضن باب الصبح وهو بيقولك كل سنه وانت طيب

العيد بلالين وزينه والوان ولبس جديد، كحك او لحمه مش هتفرق
اجمل ما فى العيد ببساطه انه عيد، بيجمع الناس ويقرب البعيد، المتخاصمين بيتصالحوا، والوحيد بيلاقى الف واحد يسألوا عليه ويعيدوه
ولما الفرح يجيلكم افرحوه واضحكوا وعيشوه، فى ايامنا وقت الفرحه مش كتير، تقريبا الفرحه بتيجي من العيد للعيد
كل عيد وانتم بخير, كل عيد واحنا مع بعض