لو كان ده حلم يارتنى أفضل أحلم على طول!
................ النقط دى كلام كتير جوايا ليك بس مش عارفه أقوله, مش كسوف منك ده انت الانسان الوحيد اللى ما بتكسفش قدامه وباكون على طبيعتى معاه, لكنى حسيت ان كلام الدنيا عليك ... شوية!
طول ما انت عنى بعيد ما بجبش غير فى سيرتك وما بتكلمش غير عليك, بس مش عارفه ليه قدامك بسكت وما بلاقيش كلام أقوله, يمكن من كتر حبى ليك باكون مش عايزه أضيع وقتى وانا معاك فى كلام, باكون معاك عايزة استمتع باحساس وجودى معاك .. وبس!
روعه الصمت وعظمة الحب ... إحساسى انى أميرة الدنيا او كأنى عروسة البحر، ممكن اسبح فى اى مكان فى بحر واسع من الراحه والامان اللى ما لقتهمش غير فى عنيك.
معقولة فيه كده ؟؟! شكلى بحلم
بس انا عمرى ماحلمت الاقى حد زيك, ولا حتى تخيلت ان في زيك, اصلى بحس فيك الرجولة اللى هتحمينى وتدفينى وتطمنى, بس كمان بحس كتير انك زى ابنى اللى ممكن العب واصحك معاه, وبحس انى مسئولة عنه وباخاف عليه واشيله جوا عنيا, مش هقولك بقى انك ابويا واخويا والكلام التقليدى ده .. بس كفايه انى أقلك انك حبيبى، وانا حبيبى كلمه كبيره اوى عندى ومش سهل أقلها كده لاى حد, انا حبيبى كلمه قلتهالك انت بس .. لانك فعلا .. حبيبى!
واخد قلبى وعقلى معاك.. سواء كنت انا معاك او بعيد
بس استنى بقى يا أستاذ, انت علمتنى حاجه عمرى ما حاستها ولا عرفتها قبل ما أعرفك, علمتنى اغير عليك !!!
ايوه انا فعلا بغير عليك من كل واحده تكلمها، او حتى اى واحد تبص عليك حتى لو ما كلمتهاش, ده انا احيانا بغير عليكى منى انا، وما تسألنيش ازاى بقى!!
ممممم انا كفاية عليا دلوقتى انى نفسى اولادى يبقوا شبهك :$ اصلهم بيقولوا البنت بتطلع شبه باباها وانا بجد مش عايزه اكتر من ان بنتى اللى هتبقى جزء منى ومنك تبقى شبهك وتفكرنى بيك طول العمر
بس هرجع واقول .. والله انا خايفه تكون حلم, اصل ما فيش ملايكة على الأرض .. زمن المعجزات انتهى, بس حتى لو كنت حلم.. بحبك !!
كتبتها وانا قدام النيل :$:$ عشقى الاول
وعدلت فيها حاجات وانا بكتبها على الكمبيوتر وانا باسمع
Bryan Adams
دماغ دماغ يعنى
هناك تعليق واحد:
و اي دماغ..... :)
إرسال تعليق