أمك ثم أمك ثم أمك

أمك ثم أمك ثم أمك ...

وكانت وصية الرسول الكريم..عليه أفضل الصلاة والسلام..

وصانى بيكى.. بحبك ورعايتك وخدمتك

ماما..

يمكن ما كنتش معاكى دايما  زى ما الوصية بتقول.. ويمكن ما أكونش زى ما بتتمنى انى اكون  .. لكنى بحاول .. بحاول احققلك كل أحلامك فيا، بحاول اكون زى ما انتى بتتمنى واحسن كمان.. بحاول اكون سبب فى فرحك وبسمتك وسعادتك وفخرك.

بجننك معايا كتير.. ويمكن كتير بزعلك منى .. وان كنت متأكده ان قلبك الحنين ده عمره ما يقدر يزعل من بنته اللى بتمووووووت فيه.. بحبك قووى وعلشان كده بدلع عليك وبطلع عنيكي.. وبتعبك معايا.

ماما..

أجمل كلمة ممكن ينطقها لسانى .. وادفى حضن ممكن اترمى جواه.. واحن قلب ممكن يخاف عليا ويحبنى..

ماما..

كل يوم الصبح بفتح عينيى وادعيلك.. فى كل مرة بروح البيت تعبانة من الشغل والاقى اكلك الدافى اللذيذ بدعيلك.. فى كل مرة ببقى مضايقه وبعيط وتيجي كلماتك زى البلسم تريحنى وتحللى اصعب مشاكلى بدعيلك.. فى كل مرة بحس انى وحيدة واجرى على حضنك زى العيال واحس بحنانك.. واحس ان العالم ده كله مش موجود منه غير مساحة حضنك الدافيه .. بدعيلك.

فى كل مرة بتقف قدامى مشكلة مش عارفه احلها .. اول حاجة بفكر فيها علشان احلها هى انتى.. وفى كل مرة بيكون حلك هو اصلح حل.. الوحيدة فى الدنيا اللى بتساعدنى بحب.. وبتنصحنى بحب.. وبتخاف عليا بجد.. وبتتمنالى الخير والسعادة بجد.. الوحيدة فى الدنيا اللى مش بتكسف قدامها من مشاكلى مهما كانت تافهه.. او كانت كبيره ومحرجه.

ماما..

مش بقلك كل الكلام ده علشان النهاردة عيد الأم!!

انتى اكتر واحده عارفه انا بحبك قد ايه.. وكل يوم انتى فيه فى حياتى هو عيد بالنسبالى لى .. رضاكى ودعوتك ليا من قلبك هو هدفى فى الدنيا دى..

يا أمى.. بحبك

وبدعى اعيش العمر كله تحت رجلك.. وبدعى ربنا يخليكي ليا ويباركلى فى عمرك..

كل اللى فوق ده كلام  ممكن اى حد يعتبره كلام عادى .. وممكن اى حد يقوله لمامته.. وممكن حد جميل يطلعلى من النص يقول ما تروحى تقوليلها الكلمتين دول فى وشها بدل ما تكتبيهم على النت..

اولا الكلام اللى كتتبه كله مش كلام عادى.. كل واحد وهو بيتكلم عن حبيبه بيقوله اللى فى قلبه واللى حاسس بيه من غير ما يفكر هو الكلام ده اتقال كام مرة قبل كده.. وكل أم بتسمع من اولادها كلمة بحبك وكانها اول مرة تتقال وكانها اجمل كلمة فى الوجود.. وكل كلمة حب بتيجى من اولادها حتى لو كانت اتقالت مليون مرة قبل كده بيبقى ليها طعم مختلف.. زى بالظبط كلام الحب لما يجي من انسان بتحبه وبتموت فيه.. حتى لو متكرر ، بس من الشخص اللى بتحبه بتحس انه مختلف.

اما بقى انى بكتب لمامتى الكلام ده .. فبكتبه لانى بعتبر لغة الكتابة لغة مختلفه تماما عن لغه الكلام الشفهى.. لغه بتوصل درجة مختلفة من المشاعر والاحاسيس.. بكلمات عميقه ومختلفه ممكن الواحد ما يقدرش يقولها بلسانه.

وختاما.. ربنا يخليكى ليا يا أمى.. ويخلى لكل واحد أمه ويبارك فيها.

ويرحم كل الأمهات اللى محضروش عيد الأم السنة دى.. ويصبر أهلهم وأولادهم ..

وربنا يرحم كل شهداء مصر .. ويصبر أمهاتهم على آلام فراقهم...

مش هتنسانى .. ولا هقدر أنساك

تفتكر انك هتنسانى؟؟

تفتكر انه يعني علشان خلاص مش هتتقابل العيون كل يوم يبقى سهل انك تنسانى؟؟

تفتكر ان فى حكايتنا ينفع تقول البعيد عن العين بعيد عن القلب..

أنا ما أفتكرش خالص..

وأفتكر انك انت كمان ما تفتكرش :)

مش هتقدر تنسانى .. مهما حاولت مش هتعرف

انا مش زى اى واحده تانية عديت عليك فى حياتك

وانت مش زى اى حد عرفته فى حياتى

ولان اللى بينا مش مجرد كلام.. مش مجرد نظرات عين

ولما نبعد عن بعض خلاص يخلص وننسي

انا هفضل فى حياتك بكل ذكرى عشتها معاك

بكل الاخلاص اللى عاملتك بيه.. وبكل الحب اللى ادتهولك

بكل الضحك والجنون اللى كان بينا

هفضل فى أحلامك.. أجمل بنت عرفتها فى حياتك

واجمل حلم عدى عليك فى يوم من الأيام 

حلم بيديك أمل.. وبيدينى أمل ان لسه فيه حب موجود

حب بريء مش مستنى حاجه ولا مشروط بحاجة

فى كل يوم عشناه .. كان لينا ذكريات ومواقف وكلام وقصص

هتفضل فاكرها مهما العمر عدى عليك ومهما البعد فرق ما بينا

هتفتكرنى لانى مش هنساك.. وما اقدرش انساك

ما اقدرش انسى يوم ما اتقابلنا.. واول مرة اتكلمنا

ما أقدرش أنسى احساسى وانا معاك بيبقى عامل ازاى

وفرحتى ولهفتى قبل معادك كانوا بيبقوا ازاى

ما اقدرش انسى كل المشاكل اللى عشتها معاك

ودموعى من بعيد وانا شيفاك بتتعذب ومش قادرة اساعدك

,فرحتى فى كل مرة بترجع تقف فيها على رجلك

أقوى من الأول.. واثق فى نفسك

وما أقدرش انسى يوم ما سيبتنى ومشيت

نظرة عينيك اللى بتقول كلام كتير .. يمكن ماحدش يفهموا غيري

ودموعى اللى كانت محبوسه جوايا وكنت بداريها عليك

وقلبى اللى كان بيدعيلك

ان كل يوم هيجي فى حياتك يبقى احسن من اى يوم عشته

مش هتنسانى .. لانك ببساطة مش هتلاقى صدق زى اللى عندى

مش هتلاقى حد تعيش معاه ذكريات زى اللى عشناها..

وجنون زى اللى عشناه .. 

وضحك زى اللى ضحكناه

أيااااام طويلة.. ومشاكل وخناقات وزعل.. ونرجع نتصالح من تانى

مش هتنسانى لان اللى زىّ ما يتنسيش...

ولأن اللى زيك ما بينساش 

ولان فيه بينا صداقة وايام وذكريات اقوى من ان الأيام تنسيهالنا

وهيفضل كل يوم عشناه واقف ما بينا وكل ما نبعد عن بعض يقربنا

هتفضل أنت.. أنت

وهفضل أنا.. أنا

ومهما الدنيا اتغيرت..  هيفضل جوانا اللى بيحب أنت وبيحب أنا

هيفضل زى ما هو.. هيفضل عايش وبيحب

وحشتنى .. وهتوحشنى 

وبقولك بقى خد بالك من نفسك وانت بعيد عنى

يا أجمل صديق وأخ.. بحبك <3

أملى بالله كبير

عمرى ما فقدت إيمانى بأن الأحلام بتتحقق

ممكن بتتأخر شوية .. لكن ليها فى الأخر رب موجود

رب سامعها .. وعارفها من غير ما تتقال

رب بيأخرها ومش بينساها

بيأخرها علشان تيجي فى وقتها 

بيأخرها علشان له حكمه ماحدش يعرفها غيره

بيقولوا ان الأحلام اللى بتتحقق قبل معادها بيبقى مالهاش طعم 

زيها زى الأحلام اللى بتتحقق بعد آوانها

علشان كده مؤمنة ان كل شيء فى وقته حلو

وكل شيء وله آوان

المهم انك تعيش بالإيمان .. بالأمل

مؤمن ان ربنا موجود سامعك ومش ناسيك

ربنا اللى بيرزق النملة فى جحرها والحشرة فى اعماق البحر

مش هتصعب عليه .. وهيرزقك

عيش بالأمل .. الأمل ان أحلى يوم فى حياتك لسه هيجي

واحلى ناس فى حياتك .. لسه هتقابلهم

وأحلى حلم فى حياتك .. لسه هتحققه 

الأمل ان فيه حاجات حلوة كتيرة هتحصل

حاجات هتحصل زى ما انت عايزها

وحاجات هتحصل احسن مليون مرة من اللى انت عايزه

الأمــــــــــــــــل 

الكلمة دى مريحه جدا بمجرد ما تسمعها

من غير ما تعديها على عقلك

تحسها بقلبك .. بجوارحك

من غير ما تفكر .. من غير ما تعقدها

من غير حسابات البشر المعقدة .. الأمل آآه موجود

موجود طول ما فيه إيمان

 

وأنا عمرى ما فقدت الإيمان ..

الإيمان بالأمل.. الإيمان بالقدر .. الإيمان بالله

حالة كده

دايما فيه نفس الاحساس بالوحدة ، لكن المره دى نوع غريب من الوحدة، وحدة بتخلى شريط عمرى كله يمر قدام عنيه، والايام اللى فاتت بكل ابتسامتها وضحكاتها اللى كانت بتطلع من القلب، شريط ذكريات بيمر فيه كل الأشخاص اللى عرفتهم فى حياتى، وايام عشتها على النتيجة ما فاتش عليها ايام وشهور، وفى قلبى حاسه كانه فات الف سنة.

جوايا عجز قبل الآوان، عجز وشال الهم بدرى.

من كتر ما وثقت فى ناس حواليه .. ومن كتر ما حلمت بدنيا مثالية .. وعلى قد ما عشمت نفسي بحاجات واحلام وفى الآخر دايما ما بيحصلش اى شيء من اللى انا عايزاه، وبيحصل اى شيء بعيد عن كل اللى بتمناه .. 

بدعى ربنا ويقول يااارب، وبقى يقينى فى النهايه ان ربنا بيأخر اجابة كل دعواتى لحكمه عنده

بس الاحساس بيقتل .. بتوصل معاه لمرحلة ما بتقدرش تسيطر عليه، بتنهار وتقع وتبكى ، وبيكسرك قوى ان ما فيش حد حاسس بيك وبالنسبة لكل اللى حواليك كل مشاكلك على بعضها حاجات هايفه ولا تسوى، مش من حقك تتعب، مش من حقك تتألم .. مش من حقك يبقى عندك مشاكل زيهم وان يجيلك وقت من الأوقات تحتاج فيه لحد يسمعك .. يفتحلك قلبه .. يحضنك ويطبط عليك ويحسسك قد ايه وجودك فى الدنيا دى مهم .. 

واهى حالة كده بيتجي للواحد من وقت للتانى .. بيطلع فيها شوية من الى جواه .. وبترجع دوامة الدنيا من تانى تاخدنى واتوه جواها ...

الحقيقة

الحقيقة ..

كلمة مجردة ووراها حاجات كتيره ..

كلنا فى حياتنا عايشين بندور على الحقيقة .. وكانها قاعه بحث كبيره شويتين  .. وكل ما بنوصل لشيء بنكتشف ان لسه ناقصنا اشياء كتيره فندور عليها .. ودايما الحاجات اللى بنوصلها بنفسنا بنصدقها واللى بيقوله حد غيرنا بيجرحنا !!!

هى طبيعة الدنيا كده، كل واحد عاجبه حاله وعجبه عقله بيصدق اللى هو عايز يصدقه وبيطنش اللى مش على مزاجه.

الحقيقة بنوصلها بالبحث والسؤال والتأمل و كمان الصراحة ..

والصراحة جزء مهم جدا فى تكوين الحقيقة .. لان ممكن الكذب والنفاق يزيفوا كتير من الحقايق .. واهم انواع الصراحة هى صراحة الانسان مع نفسه !!

الانسان ممكن يكسب ثقة انسان تانى ويكون فيه بنهم مساحة من الصراحة .. موضوع مش صعب.

الصعب ان الانسان يصارح نفسه باللى جواه .. ويصدق احساسه ويبطل ينكر الحقايق اللى بيوصلها بنفسه.

صراحة الانسان مع نفسه كنز .. هتعرف قيمته لما تجربه

لما تحس انك كنت معيش نفسك فى وهم وتفوق منه

ومش اى حد اللى فوقك ده انت اللى فوقت نفسك

ساعتها هتحبك نفسك جدااا وهتمر بفترة من اجمل فترات حياتك

وانت كمان هتحب نفسك :)

الحقيقة موجودة .. فى مكان ما!!

احيانا بنكون مستنين حد يدلنا خيطها واحنا نمشى وراه

واحيانا بنحتاج ان نفسنا تفوق لوحدها .. بشوية تأمل وصراحة مع النفس

واحيانا الاتنين مع بعض

بس المهم ان الحقيقة موجودة ومحتاجه اللى يتعب علشان يوصلها

لانها سواء حلوة او مره بتفضل اجمل من الزيف والتلوين

لما يخلص الكلام

كلام كلام كلام .. وصلنا لمرحلة كل اللى بيربطنا ببعض مجرد كلام، سلسلة من الحروف اللى ما بتخلصش .. كنا بنتكلم بالساعات عن ميه الف موضوع، نخرج من موضوع ندخل فى التانى وما فيش علاقة بين الاول والتانى .. كنا بنتكلم وبنحافظ على خيط الكلام علشان ما يخلصش علشان نفضل مع بعض اطول فترة ممكنة .. بس مؤخرا بدا يخلص .. وبدأ الكلام يبقى سكوت .. والسكوت يطول وتمر الايام وكل الكلام اللى كان المفروض يتقال محبوس ومش بيطلع .. خايف يطلع .. وخايف يتقال!!

زمان كان بيطلع بسهولة .. من قبل ما نفكر فيه كان بيطلع .. واول ما يخطر على بالنا كنا بنعرف نقوله بسهولة .. واهو مجرد كلام، بس دلوقتى بقى فيه شيء بيمنعنا، شيء بيخلى الكلام محبوس .. مخنوق مش عايز يطلع، بقى فى شيء واقف ما بينا بيخلينا نفكر كتير قبل نتكلم، نفكر ازاى كنا نتكلم اصلا ولا ما نتكلمش، شيء غريب بقى يخلينا نفكر فى كلامنا اللى هنقوله ونحسبه، وزمان كان بيطلع من جوانا من غير قيود ومن غير تفكير .. كان بيطلع بتلقائية وعفوية!!

الحواجز اللى الكلام كان زمان بيمنعها دلوقتى سكوتنا بقى يبنيها، وبدأت تعلى ما بينا ، وكل يوم ما بنتكلمش فيه بيعلى السور بينى وبينك، وكل ما يعلى السور كل ما الكلام بيبقى أصعب والسكوت اسهل وأريح .. ونعيش انا وانت فى دايره مالهاش أخر، ومجرد ما دخل السكوت ما بينا وبقى الكلام هو اختيارنا الأخير كل ما الدايره دى بتوسع والخروج منها بقى أصعب.

انا وانت .. اختارنا من غير ما نختار، قتلنا بادينا حاجات حلوة كانت ممكن تكبر فى يوم من الايام، وكل احساس حلو كنا بنعبر عنه فى الكلام خلصناه بسكوتنا الطويل .. ولحد امتى هيفضل السكوت ده ما بينا .. لحد امتى هيفضل الشوق مدفون والكلام محبوس والاحساس مخنوق جوانا !!

وادينى بكتب!!

بكتبلك وانا عارفه انك مش هتشوف الكلام ده ومش هتوصله، لكنى برضه بكتبلك.

يمكن احساسى فى يوم من الايام يوصلك وتعرف قيمتك فى حياتى ..

وهفضل أكتبلك كل يوم كلام طالع من جوا قلبى ..

مش هزهق من بعدك مش همل من وحدتى وهصبر عليك 

اعمل ايه بقى يا سيدى .. بحبك !!

بكتبلك وجوايا الف سؤال و سؤال

يا ترى بيفكر فى مين دلوقتى ؟؟

ويا ترى بخطر على باله ولا لأ؟

و يا ترى بتفتكرنى بايه وبتفتكرلى ايه ؟؟

بكتبلك علشان الكلام بيكتر جوايا يوم عن يوم

وعلشان بحاول امسك نفسي وما اكلمكش ولا اسمع صوتك

بحاول اوحشك شوية زى ما انت على طول واحشنى

فبكتب كل الكلام اللى عاوزه اقولهولك واكتر شوية كمان .. بكتبه وافضفض

يمكن العصفوره توصلك انا بحبك قد ايه

او تنقلك كلمة من اللى بكتبه عنك ..

او يمكن اللى انا مش متوقعه يحصل وتقرا فى يوم كلامى

وادينى بكتب !!