أملى بالله كبير

عمرى ما فقدت إيمانى بأن الأحلام بتتحقق

ممكن بتتأخر شوية .. لكن ليها فى الأخر رب موجود

رب سامعها .. وعارفها من غير ما تتقال

رب بيأخرها ومش بينساها

بيأخرها علشان تيجي فى وقتها 

بيأخرها علشان له حكمه ماحدش يعرفها غيره

بيقولوا ان الأحلام اللى بتتحقق قبل معادها بيبقى مالهاش طعم 

زيها زى الأحلام اللى بتتحقق بعد آوانها

علشان كده مؤمنة ان كل شيء فى وقته حلو

وكل شيء وله آوان

المهم انك تعيش بالإيمان .. بالأمل

مؤمن ان ربنا موجود سامعك ومش ناسيك

ربنا اللى بيرزق النملة فى جحرها والحشرة فى اعماق البحر

مش هتصعب عليه .. وهيرزقك

عيش بالأمل .. الأمل ان أحلى يوم فى حياتك لسه هيجي

واحلى ناس فى حياتك .. لسه هتقابلهم

وأحلى حلم فى حياتك .. لسه هتحققه 

الأمل ان فيه حاجات حلوة كتيرة هتحصل

حاجات هتحصل زى ما انت عايزها

وحاجات هتحصل احسن مليون مرة من اللى انت عايزه

الأمــــــــــــــــل 

الكلمة دى مريحه جدا بمجرد ما تسمعها

من غير ما تعديها على عقلك

تحسها بقلبك .. بجوارحك

من غير ما تفكر .. من غير ما تعقدها

من غير حسابات البشر المعقدة .. الأمل آآه موجود

موجود طول ما فيه إيمان

 

وأنا عمرى ما فقدت الإيمان ..

الإيمان بالأمل.. الإيمان بالقدر .. الإيمان بالله

حالة كده

دايما فيه نفس الاحساس بالوحدة ، لكن المره دى نوع غريب من الوحدة، وحدة بتخلى شريط عمرى كله يمر قدام عنيه، والايام اللى فاتت بكل ابتسامتها وضحكاتها اللى كانت بتطلع من القلب، شريط ذكريات بيمر فيه كل الأشخاص اللى عرفتهم فى حياتى، وايام عشتها على النتيجة ما فاتش عليها ايام وشهور، وفى قلبى حاسه كانه فات الف سنة.

جوايا عجز قبل الآوان، عجز وشال الهم بدرى.

من كتر ما وثقت فى ناس حواليه .. ومن كتر ما حلمت بدنيا مثالية .. وعلى قد ما عشمت نفسي بحاجات واحلام وفى الآخر دايما ما بيحصلش اى شيء من اللى انا عايزاه، وبيحصل اى شيء بعيد عن كل اللى بتمناه .. 

بدعى ربنا ويقول يااارب، وبقى يقينى فى النهايه ان ربنا بيأخر اجابة كل دعواتى لحكمه عنده

بس الاحساس بيقتل .. بتوصل معاه لمرحلة ما بتقدرش تسيطر عليه، بتنهار وتقع وتبكى ، وبيكسرك قوى ان ما فيش حد حاسس بيك وبالنسبة لكل اللى حواليك كل مشاكلك على بعضها حاجات هايفه ولا تسوى، مش من حقك تتعب، مش من حقك تتألم .. مش من حقك يبقى عندك مشاكل زيهم وان يجيلك وقت من الأوقات تحتاج فيه لحد يسمعك .. يفتحلك قلبه .. يحضنك ويطبط عليك ويحسسك قد ايه وجودك فى الدنيا دى مهم .. 

واهى حالة كده بيتجي للواحد من وقت للتانى .. بيطلع فيها شوية من الى جواه .. وبترجع دوامة الدنيا من تانى تاخدنى واتوه جواها ...

الحقيقة

الحقيقة ..

كلمة مجردة ووراها حاجات كتيره ..

كلنا فى حياتنا عايشين بندور على الحقيقة .. وكانها قاعه بحث كبيره شويتين  .. وكل ما بنوصل لشيء بنكتشف ان لسه ناقصنا اشياء كتيره فندور عليها .. ودايما الحاجات اللى بنوصلها بنفسنا بنصدقها واللى بيقوله حد غيرنا بيجرحنا !!!

هى طبيعة الدنيا كده، كل واحد عاجبه حاله وعجبه عقله بيصدق اللى هو عايز يصدقه وبيطنش اللى مش على مزاجه.

الحقيقة بنوصلها بالبحث والسؤال والتأمل و كمان الصراحة ..

والصراحة جزء مهم جدا فى تكوين الحقيقة .. لان ممكن الكذب والنفاق يزيفوا كتير من الحقايق .. واهم انواع الصراحة هى صراحة الانسان مع نفسه !!

الانسان ممكن يكسب ثقة انسان تانى ويكون فيه بنهم مساحة من الصراحة .. موضوع مش صعب.

الصعب ان الانسان يصارح نفسه باللى جواه .. ويصدق احساسه ويبطل ينكر الحقايق اللى بيوصلها بنفسه.

صراحة الانسان مع نفسه كنز .. هتعرف قيمته لما تجربه

لما تحس انك كنت معيش نفسك فى وهم وتفوق منه

ومش اى حد اللى فوقك ده انت اللى فوقت نفسك

ساعتها هتحبك نفسك جدااا وهتمر بفترة من اجمل فترات حياتك

وانت كمان هتحب نفسك :)

الحقيقة موجودة .. فى مكان ما!!

احيانا بنكون مستنين حد يدلنا خيطها واحنا نمشى وراه

واحيانا بنحتاج ان نفسنا تفوق لوحدها .. بشوية تأمل وصراحة مع النفس

واحيانا الاتنين مع بعض

بس المهم ان الحقيقة موجودة ومحتاجه اللى يتعب علشان يوصلها

لانها سواء حلوة او مره بتفضل اجمل من الزيف والتلوين

لما يخلص الكلام

كلام كلام كلام .. وصلنا لمرحلة كل اللى بيربطنا ببعض مجرد كلام، سلسلة من الحروف اللى ما بتخلصش .. كنا بنتكلم بالساعات عن ميه الف موضوع، نخرج من موضوع ندخل فى التانى وما فيش علاقة بين الاول والتانى .. كنا بنتكلم وبنحافظ على خيط الكلام علشان ما يخلصش علشان نفضل مع بعض اطول فترة ممكنة .. بس مؤخرا بدا يخلص .. وبدأ الكلام يبقى سكوت .. والسكوت يطول وتمر الايام وكل الكلام اللى كان المفروض يتقال محبوس ومش بيطلع .. خايف يطلع .. وخايف يتقال!!

زمان كان بيطلع بسهولة .. من قبل ما نفكر فيه كان بيطلع .. واول ما يخطر على بالنا كنا بنعرف نقوله بسهولة .. واهو مجرد كلام، بس دلوقتى بقى فيه شيء بيمنعنا، شيء بيخلى الكلام محبوس .. مخنوق مش عايز يطلع، بقى فى شيء واقف ما بينا بيخلينا نفكر كتير قبل نتكلم، نفكر ازاى كنا نتكلم اصلا ولا ما نتكلمش، شيء غريب بقى يخلينا نفكر فى كلامنا اللى هنقوله ونحسبه، وزمان كان بيطلع من جوانا من غير قيود ومن غير تفكير .. كان بيطلع بتلقائية وعفوية!!

الحواجز اللى الكلام كان زمان بيمنعها دلوقتى سكوتنا بقى يبنيها، وبدأت تعلى ما بينا ، وكل يوم ما بنتكلمش فيه بيعلى السور بينى وبينك، وكل ما يعلى السور كل ما الكلام بيبقى أصعب والسكوت اسهل وأريح .. ونعيش انا وانت فى دايره مالهاش أخر، ومجرد ما دخل السكوت ما بينا وبقى الكلام هو اختيارنا الأخير كل ما الدايره دى بتوسع والخروج منها بقى أصعب.

انا وانت .. اختارنا من غير ما نختار، قتلنا بادينا حاجات حلوة كانت ممكن تكبر فى يوم من الايام، وكل احساس حلو كنا بنعبر عنه فى الكلام خلصناه بسكوتنا الطويل .. ولحد امتى هيفضل السكوت ده ما بينا .. لحد امتى هيفضل الشوق مدفون والكلام محبوس والاحساس مخنوق جوانا !!

وادينى بكتب!!

بكتبلك وانا عارفه انك مش هتشوف الكلام ده ومش هتوصله، لكنى برضه بكتبلك.

يمكن احساسى فى يوم من الايام يوصلك وتعرف قيمتك فى حياتى ..

وهفضل أكتبلك كل يوم كلام طالع من جوا قلبى ..

مش هزهق من بعدك مش همل من وحدتى وهصبر عليك 

اعمل ايه بقى يا سيدى .. بحبك !!

بكتبلك وجوايا الف سؤال و سؤال

يا ترى بيفكر فى مين دلوقتى ؟؟

ويا ترى بخطر على باله ولا لأ؟

و يا ترى بتفتكرنى بايه وبتفتكرلى ايه ؟؟

بكتبلك علشان الكلام بيكتر جوايا يوم عن يوم

وعلشان بحاول امسك نفسي وما اكلمكش ولا اسمع صوتك

بحاول اوحشك شوية زى ما انت على طول واحشنى

فبكتب كل الكلام اللى عاوزه اقولهولك واكتر شوية كمان .. بكتبه وافضفض

يمكن العصفوره توصلك انا بحبك قد ايه

او تنقلك كلمة من اللى بكتبه عنك ..

او يمكن اللى انا مش متوقعه يحصل وتقرا فى يوم كلامى

وادينى بكتب !!

شوية تفاصيل .. مالهاش لزمة

تفاصيل صغيره فى حياتنا .. تفاصيل فى العادى وفى حياتنا اليومية مش بناخد بالنا منها، لكن لما بتضيع مننا بنحس بقيمتها وبتوحشنا. طبيعه البنى ادم اللى مش بيحس بقيمة الحاجة اللى فى ايده الا لو ضاعت منه، وغالبا لو رجعتله تانى ممكن ما يقدرهاش برضه. وبيفضل دايما الممنوع مرغوب، والبعيد عن المنال هو الأقرب للقلب والقريب السهل الموجود على طول هو الغير مرغوب فيه. 

علشان كده بيقولوا فى الحب ان التقل صنعه، وتتقل على حبيبك يحبك أكتر، توحشه ويحس بقيمتك، ويحس قد ايه الدنيا فاضية من غيرك وان وجودك مهم وبيدى للحياة نكهه وريحة مميزه، بيخلى لحظات اللقاء مميزه لانه بيكون فيها لهفه وشوق، وبيخلى لحظات البعد كمان مميزه لانه بيملاها رغبه وشوق برضه.

التقل فى الحب يعني تمنع نفسك انك تشوف حبيبك وانت هتموت عليه علشان تفضل دايما فى عنيه مميز وفريد من نوعك، يفضل يحبك مهما العمر عدا بيكوا، ويفضل فيه حاجات صغيره وتفاصيل بيشتاقلها ومش بيلاقيها غير معاك انت بس.

 

مش هتغير علشان حد يحبنى!!

كتير بنسمع الجملة دى من البنات "انا مش هتحجب علشان حد" "انا مش هخس علشان حد"

انا مش هغير فى نفسي علشان حد .. هو ده المفهوم اللى وراه اى جمله على نفس الوزن

انا ربنا خلقنى كده بعيوبى وبمميزاتى .. وخلق كل البشر زيّ فيهم "عيوب" ومميزات

اللى يقدر يحب عيوبه ويتعايش معاها هو اللى يقدر يخلى الناس تحبه بعيوبه زى ما هو

واللى مركز على عيوبه ومش شايف غيرها، ومش قادر يحس بمميزاته طبيعى جدا ان الناس كمان مش هتشوفها ومش هتحس بيها.

علشان كده ما تستغربش أبدا لما تلاقى واحده بتقلك .. انا مش هتغير علشان أى حد

مش بس لانها واثقه فى نفسها، لكن لانها عايزه الانسان اللى هيحبه يحبها وهو عارف عيوبها

يحبها بعيوبها ومميزاتها .. يحبها كلها على بعضها 

لو مش محجبة .. مش هتتحجب علشانه، ويوم ما هتاخد القرار هتاخده علشان ربنا

لو بتشرب سجاير فهى برضه مش هتبطل علشان تعجبه .. يوم ما تبطل هيبقى علشان صحتها

لو تخينه فهى مش هتخسه علشان تعجب حد .. هو لازم يحبها بشكلها كده

لو شخصيتها فيها عيب .. لازم يستحملها بيه .. ويحبها بيه

لو بتحطط مكياج كتيير .. هيحبها بشكلها كده 

ولو ما بتحطش حتى مكياج برضه يحبها زى ماهى

أجمل احساس فى الدنيا لما حد يحبك علشان انت كده

علشان بتغلط فى واحد .. اتنين .. تلاته ..

وعلشان بتتصرف بالطريقة الفلانية

وعلشان مهما كان فيك من عيوب فأكيد فيك مميزات ومش موجودة عن حد غيرك..

 وعلشان هو شايف مميزاتك .. حتى اللى انت مش شايفها

 وحاسس بيها .. وحاسس بيك

 

فى النهايه ما فيش انسان كامل

وزى ما انت الانسان اللى هتختاره وتحبه فيه عيوبه هتستحمله بيها

انت كمان فيك عيوب .. وهو لما حبك واختارك اختارك على بعضك

بعيوبك وغلطاتك .. وحسناتك ومميزاتك

ولان الحب ما بيكونش ليه اسباب واضحه ومحدده

القلب بيحب من أجل الحب .. ولسبب مجهول

العقل هو اللى بيفسر وبيحلل 

وأنا بعلنها صريحه واضحة

أنا مش هتغير علشان حد

أنا كده وما فيش غير كده ما فيش حل تانى

لو عاجبك عاجبك مش عجبك شوف حد تانى :))