شريط حياتى

شريط حياتى بيمر فجأة قدام عيني وبفتكر حاجات غريبة حصلتلى فى يوم من الأيام . مش الغريب الاحداث نفسها الغريب هو انى بفتكر تفاصيل صغيرة قووى يمكن فى وقتها كانتش بالنسبة لى كبير وكانت مش مهمه ويمكن كمان فى وقت ما كانت بتحصل ما كنتش بركز فيها وما اخدتش بالى منها .. لكن وانا بفتكرها بفتكرها بالتفصيل وكانى بتفرج عليها دلوقتى قدامى فى شاشة سينما بالصوت والصورة الطبيعيين.

مش تفاصيل الطفولة ولا تفاصيل المراهقه .. دى تفاصيل حياتى بالكامل .. مواقف صغيره لكن كان ليها دور كبير فى حياتى .. مواقف آثرت فى شخصيتى فى طريقة تفكيرى النهاردة وفى الطريقة اللى بقيت بشوف بيها الدنيا.

مش مهم احكى واقول ايه اللى افتكرته .. لانها كلها تفاصيل خاصة وشخصية .. لكن مهم ان كل انسان يعيش الحالة دى من وقت للتانى .. هتبررله حاجات كتير قوى فى تصرفاته .. وهتعرفه دايما انه انسان مر بتجارب وعاش حياة طويلة مليانة تفاصيل .. وهتفكره بان حياته كان ليه قيمة ما كانتش فاضية ولا مالهاش لازمة زى ما احيانا بيخطر على بال الواحد مننا من وقت للتانى.

الحالة دى بتعيشنى فى حالة من الشجن والسعادة فى نفس الوقت .. وبمر بلحظات كتيره من الحنين .. واجمل ما فيها لما كل مره بقوم اقوى من الاول وكانها جرعه منشطة بتقوينى على الحياة.

الحالة دى بتحسسنى ان فيه حاجات جميلة مرت فى حياتى  .. علشان لما امر بلحظات حزن او اكتئاب افتكر انى زمان فى يوم من الايام مريت باكتر من اللى انا فيه وفى كل مرة كانت بتتحل وتتفك من عند ربنا .