الخطوة الأولى

فاكر اول خطوة مشتها فى حياتك؟؟!

أكيد لأ مش فاكرها .. بس هتلاقى غيرك فاكرها .. ماماتك وباباك وناس كانت حواليك وقتها وبتحبك فاكرينها كويس قوى

الخطوة دى بالنسبه لوالديك كانت من أهم الخطوات فى حياة ابنهم.

كانوا بيساعدوك بقلبهم قبل ما يساعدوك باديهم علشان تتعلم المشي وتقدر تقف على رجليك.  

 

كنت بالنسبة لهم حلم كبير قوى وتحقيقه يعتبر انجاز شخصى ليهم.

ولو سألتهم هتعرف ان فرحتهم بأول خطوة ليك كانت أكبر من اى فرحه تانية فى حياتهم، يمكن بس مش أكتر من لما عرفوا انك هتشرف الدنيا دى.

ولما انت شرفت كان نفسهم وحلمهم انك تكبروتقف على رجليك ويقدروا يخرجوا معاك وهما بيشتروا طلبات البيت وهما خارجين يتفسحوا آخر الأسبوع، يقدروا يلاقوك جنبهم فى اى وقت يحتاجوك فيه ، ويتعكزوا عليك لما يكبروا ويتباهوا بيك قدام أصحابهم وجيرانهم وقدام الدنيا بحالها.

دى اول خطوة فعليه فى حياتك واكبر خطوة مؤثرة فيها كمان لان كل اللى بعد كده تقريبا مبنى عليها ..

هتكبر وتحلم انك تنجح وتوصل لفوق السحاب .. لا ده انت كمان هتحلم انك تطلع لفوق لابعد من القمر .. وكل حلم من أحلامك لازم هيكون فيه خطوة أولى ..

خطوة اولى يعني تدريب وتجهيزات الأول علشان تقدر تبدأها صح .. ماهو ماحدش بيطلع القمر من غير ما يجهز سفينه الفضاء ويتدرب على الحياة من غير جاذبية ويعمل كشف طبى و .. و .. وحاجات تانية كتير .. مش كده ولا ايه؟

مشوار الألف ميل بيبدأ بخطوة

حقيقة لا يمكن انكارها ..

ان اى مشوار بيبدا بخطوة .. وبعد الخطوة دى بيبقى فيه خطوات تانيه كتير .. الذكى هو اللى بيفكر كويس ويدرس خطوته قبل ما يبدا فيها ..

بيفكر فين وازاى وامتى بالظبط هيحط رجليه .. يعني بيفكر فى البداية اللى هو مؤمن ان نجاحها هيوصله للنجاح اللى هو عايزه فى مشواره بمبدأ ان علشان البناء يطلع سليم لازم الأساسات تتحط صح الأول.

وبإيمان كمان ان الخطوة الأولى وقوتها ومكانها وتوقيتها والدقة المتناهيه فيها هى اللى بتوصل اى حد فينا انه يبقى الأول فى كل حاجه بيعملها ..

وفى النهايه عايزك تؤمن بالمقولة دى

ومن يتهيب صعود الجبال يعش أبد الدهر بين الحفر

انا بقول الكلام ده كله لنفسي قبل ما أقوله لاى حد تانى

بشجع نفسي على انها تاخد خطوات فى اتجاه المستقبل

بشجعها انها تتحلى بالصبر والمثابرة علشان تكمل المشوار

بشجعها انها تفكر وتدرس اى خطوة قبل ما تمشيها

بشجعها انها تفكر دايما فى المركز الأول وما تقبلش بأقل منه

بشجع نفسي على الحلم ..

وعلى الإيمان بان الأحلام كلها مهما كبرت ممكن تتحقق

بالإرادة والتصميم واهم منهم الإيمان

علشان كده لو حسيت الكلام المره دى بعيد عنك

فكر بعين واحده بتحلم .. وعايزه تنجح

وساعتها .. هتلاقيه قريب جدا منك

دعـــاء جميل

11-3-2011