رمضان .. يااااااااااااا .. يا رمضان
بدأت وقربت تخلص ولسه ما حستش انك جيت
ليه بقي دايما فيه شيء ناقص فى وجودك
فينك ايام زمان .. فينك يا رمضان ؟؟ وحشتنى بجد
*****
زمان .. يعني مش زمان ايام تيته وجدو والابيض واسود . بس زمان من بتاع 10 سنين ولا 8 سنين .. يعني بقى ايام ما كنت انا فى ابتدائي كده ولا حاجه .. كنت بحب رمضان اوووى .. اوى يعني
زيي زي كل الاطفال اللى بيحبوه من غير اسباب "لله × لله" كده .. سبحان الله يعني.
كنت اول ما شعبان يبدأ .. ابدأ اعدهم .. الأيام يعني
فاضل 29 يوم .. فاضل 28 يوم .. فاضل 27 يوم .. فاضل اسبوع .. بكره الرؤيه ..
وكان فيه سؤال دايما بنسأله لبعض فى اليوم ده "اتحرمنا منه دلوقتى" انت نفسك رمضان يبقى بكره ولا بعد بكره؟؟
وليله الرؤيه كنت أفضل مستينه من بعد المغرب .. مستنيه العشا تأذن علشان اشوف المفتى وهو بيُعلن وبيقول عن تاريخ اول يوم فى رمضان وكان فيه حاجه غريبه بيقولها ماكنتش بفهمها ابدا يعني .. الا لما كبرت بقى وبدات افهم كده :$:$ ... لما كان بيقول انه الهلال لم يظهر .. ما كنتش بفهم يعني ان معنى كده ان بكره مش رمضان ولسه شعبان فيه يوم زياده وكده يعني .
كنت بتغاظ اوووى منهم لما بيقعدوا يتكلموا ويقولوا محاضره طويله .. وكنت بتغاظ اكتر من الشيخ اللى بيقرأ القرآن .. كنت صغيره بقى وافضل اقول .. كل سنه بتقرأ آيات الصيام هى هى .. طيب ممكن تقولى الرؤيا الاول واعمل اللى انت عايزه بعد كده .. كنت ببقى مستعجله اوى .. ومع ذلك كنت بحب اليوم ده اوى .
كنت بحب جرس التليفون اللى مش بيبطل رن اول ما المفتى يعلن يوم رمضان سواء شعبان كامل او 29 يوم .. والتهانى بقى ورمضان كريم والحاجات دى بين الاهل والاصحاب ..
والمذيعه اللطيفه بتاعت القناه الاولى وهى بتهنئ الامه الاسلاميه بشهر رمضان المبارك ...
زمان بقى .. ايام الشيخ الشعراوى قبل أذان المغرب .. والاذان بصوت الشيخ محمد رفعت .. وعمو فؤاد بعد الفطار ..
وكل سنه احاول اخلص المصحف واحس انه كبير اووى يخلص رمضان ومالحقش اوصل لنصه :$:$
*-*-*-*-*-*-*-*
رمضان زمان ايام الهدوء والبرائة والبساطه .. يمكن مشاكلنا كانت اقل او ما كناش عاصين ربنا اوى بالشكل ده فكان سهل علينا ندخل فى روحانيات رمضان ..
********
المهم دلوقتى .. رمضان فين بقى .. حد يدلنى عليه!!
زحمه فى حياتنا ودوشه صوتها بقى عالى اوى
بقينا بنجرى ورا كل حاجه .. وكل حاجه بقت بتجرى ورانا .. سباق بيخلص لما حد فينا يخلص على التانى فى الاخر يا احنا يا الدنيا .. وطبعا الدنيا هى اللى بتكسب فى الاخر والبنى ادم بيموت.
مش بتكلم عن التلفزيون والقنوات الكتييييييييييييير والمسلسلات الاكتر بكتير والبرامج والمسابقات واللى واللى .. انما كمان على كل حاجه حوالينا ..
نفوسنا اللى ما بقتش راضيه باى حاجه .. معصيه ربنا اللى غلفه قلوبنا
موضوع الرؤيا اللى خلاص بقى بيتعرف بالقبه السماويه .. وما حدش بقى يستنى المفتى فى التفزيون وماحدش بقى يسال حد نفسك رمضان يبقى بكره ولا بعده؟
تهانى رمضان اللى ما بقتش تيجى فى التليفون زى زمان .. بقى كله وول وفيس بوك واحيانا مسجات على الموبيل .. ده فى القليل النادر يعني.
يااااااااااااااه .. ربنا يرحمنا بقى
وللحديث عن رمضان بقيه
ليست هناك تعليقات:
إرسال تعليق