أحبك أكرهك

أحبك أكرهك أسيبك أندهك أعلق نفسى بيكى ولا أعمل فيكى إيه

أضمك أبعدك أخونك أوعدك غريب إحساسى بيكى مش مطمنله ليه

=====================================

بحبك دى ما فيهاش شك، عنيه ما شفتش غيرك دى حقيقه، ومهما قالولى فيكى ومهما عادوا وزادوا فى الكلام، بقف وبقول لأ .. لأ ما اسمحش لحد يمس حبيبتى بكلمه حتى لو فى لحظه غضب، لأ ما حدش يكرهها ولا يفكر يبعد عنها، ازاى تبعدوا عن حبيبتى وتسيبوها لوحدها، ازاى تبعدوا عنها وهى بتنادي عليكوا ...

كل يوم كنتى بتعملى فيا وفى حبايبى وأصحابى مواقف نص كم .. نص كم اوى بصراحه وكنت بسامحك وباحاول اصالحهم عليكى، عشان بحبك وما ينفعش حد بيحب حد يزعل منه، يعاتبه اه يلومه اه، "يملصله" ودانه مافيش مشاكل لكن يكرهه ويبعد عنه لأ، يغلط فيه او يقول فى حقه كلام وحش برضه لأ.

بس أنت حيرتينى معاكى، مش قادره أحس بحبك لييّ، ولا قادره احس انك بتدينى نص اللى باديهولك، ليه بتبعدينى عن حياتك بالملل زى ما منير بيقول، وليه خلتينى أقول خلاص ما فيش أمل زى ما منير بيقول برضه فى نفس الأغنيه ..

حاجات غريبه بحسها وأنا بين ايديكى

كتير بخاف منك وكتير بخاف عليكى

لا القرب مرتاحله ولا البعاد أقدر عليه

=========================

ليه كل يوم بتكبرى الخوف جوايا، وتخلنيى أخاف منك وأخاف عليكى.. ليه بتحاول تسدى كل طريق ابنيه وكل كوبرى اعليه وكل بير أحفره أحاول أوصلك منه؟؟

غُلبت حججى فيكى، وبقيت حاسه ان كلامى فيكى موضوع تعبير لتلميذ إبتدائى حافظ مش فاهم، بيقول وبيكرر اللى بيسمعه من غير احساس، ما انتى بتحاولى تقتلى فيّ الاحساس بحبك، وكل يوم بتضيعى من جوايا ذكرى حلوه كنت بحاول اتمسك بيها

هقلك ايه؟؟ .. هقلك كفايه بقى .. كفايه بجد .. حسى بيا مره، حسى انى كبرت وطلعلى صوت، حسى بالنار اللى مشعلله جوايه من حرقتى عليكى، حرقتى على حبك اللى ما قدرتيهوش، حرقتى على نفسى اللى رخصتيها اوى وهونتيها عليكى وعلى كل الدنيا، حرقتى على أخواتى وأهلى وناسى اللى بيموتوا ويتحبسوا ويتبهدلوا وانت ساكته وكأنهم مش حته منك ولا انتى حته منهم ..

كفايه بقى وفوقى قبل ما كله يبقى ضدك ويقف قصادك. صدقينى وقتها انا مش هقدر احميكى منهم ولا اشيل عنك زى ما بعمل دايما... لان وقتها هكون انا فى الصف الاول ما بينهم .. فوقى ارجوكى.

دعاء جميل