بعد كل حاجه, بيجى اول لكل حاجه

محتاره اضحك ولا أبكى.

طبعا لو ضحكت ليا اسبابى ولو بكيت ليا اسبابى, ولو ما عنديش اسباب مش هغلب, دى اسهل حاجه تلفيق الاسباب واختراعها يعنى.

هضحك من حياتى ومن نفسى, من هبلى فى حاجات ومن عقلى فى حاجات تانيه.

هبكى على عمر ضايع, على ايام وشهور وسنين عدت .. كده .. من غير ما احس بيهم

ممكن اضحك على.. لا هضحك من بكره ومن اللى ممكن تخبيه الايام, هضحك من حلم مستنياه, ومن فرحه عايشها جوايا مخبياها وخايفه عليها حتى من نفسى.

وارجع وابكى تانى من نفسى, حاجات كتير مش فهماها, وكل ما احاول افهمها, مش بلاقى لها اى تفسير, بتعب لما اتوه فى نفسى واغرق فى شبر مايه كده.

======================

سؤال. سؤال تقليدى

هو ايه الحب ده؟

لأ بجد, سؤال خطر فى بالى, ايه الشئ العجيب اللى ممكن يخلى الانسان يضحى بحاجات كتير فى حياته, علشان خاطر انسان تانى, اى كان هو مين الانسان ده, يا ترى فيه حد يستاهل التضحيه فى أيامنا الحلوة دى؟؟! ولا ما فيش؟

مش تشكيك فى ان الحب موجود فى الدنيا دى, لكن تعجب من ماهيته, ايه طبيعه الشئ اللى مفعوله اقوى من اقوى مهدئ للاعصاب, بيدخل جوا الانسان ويمحى ذكريات مؤلمه كتير, بيمحيها فعلا مش مجرد كلام, وبيملى مكانها ذكريات تانيه, ولحظات تانيه بتبنيها مع انسان بتختاره من وسط كل الناس, علشان تكمل معاه عمرك وحياتك.

لما بتفكر فى بكره بيكون هو كل بكره , ولما بتتمنى نجاح بيكون هو اول خطوة وسلمه فيه.

===============================

مش عارفه ليه بقى, بقالى فترة كل ما أكتب حاجه امسحها, ومش مقتنعه باى شئ باكتبه, وحتى لما بيعجب حد ويقولى انه حلو برضه مش باقتنع بكلامه.

مش عارفه, هو كده معناه انى باحاول اوصل لدرجة اعلى, معناها انى باجرى ورا التقدم والنجاح اكتر

ولا معناها انى بدأت ابقى شخصية ما يعجبهاش العجب :(( والله مش عارفه

=============================

حقيقى بقى, ان كل اخر كان له اول فى الاول

واكيد ان كل اول لازمله من اخر فى الاخر

ماهو دوما الحال من المحال

واذا دامت لغيرك ما آلت اليك

والكلام الغريب الكبير المكلكع ده

هى بس حاجة بقولها لنفسى لما ما بفهمنيش

وانا اليومين دول بقيت ما بفهمنيش كتير اوووووى

بعد كل حاجه بيجى اول لكل حاجة

بعد الحزن بيجى فرح

وبعد الضلمة بيجى نور

وبعد الغروب, بيرجع الشروق

وبعد الوداع بيجمعنا لقى

وبقيت بعد اى حاجه وحشه, بستنى الحاجة الحلوة اللى هتيجى

وبقيت يا دعاء, باحاول أفهمك, وعلى الله أفهمك

ويارب حد يفهم اى حاجه, ولو حد فهم يبقى يفهمنى

ينوبه فيا ثواب