إحساسى بيك

قد ايه بحس حالى يتيمه فى بعدك, لو غمضت عينى وانت معايا بتوحشنى, ما بالك حالى فى بعدك بيكون إزاى؟
آه لو أقدر اقلك بحبك قد ايه, اه لو الاقى بس كلام يعبر لك عن حاجه واحده من اللى جوايا.
ده انا لو فضلت اقلك بحبك من دلوقتى ولحد ما اموت مش كفايه عليك.
ده مهما عينى قالتلك بهواك قد ايه ومهما فكرى قالك بفكر فيك قد ايه مش هيقدروا يوصلوا لك فتفوته من حبك فى قلبى.
انت عارف نظرة عينك بتعمل فيا إيه؟؟
بتحيينى, بتاخدنى من دنيتى الصغيره الحزينه, لدنيا تانيه كلها فرحه وراحه وأمان و رضى.
بحبك بجنونك اللى بيحققلى أحلام طفولتى البريئه, وأحبك بعقلك اللى بيفهمنى من غير ما اتكلم و بيحتوينى بحنان ورقه, وأحبك فى حنيتك اللى ملهاش مثيل ولا شبيه , وطيبتك اللى بتحضن قلبى و تطمنه ان بكره لينا وبينا هيترسم وهيكون احلى واحلى.
نظراتك اللى بتلمس قلبى وروحى ووجدانى, وبتعلى من إحساسى وبتطلع من جوايا أحلى الكلام.
احساسى بحبك ما يتوصفش, واحساسى بوجودك فى حياتى ما يتعوضش, ونظره واحد منك تكفينى , نظرة واحده بالدنيا عندى وما فيها.
احساسى بالراحه والامان معاك, احساس عشت عمرى بحاله بدور عليه, احساس ما حستهوش غير فى مكان واحد بس فى الدنيا دى,, فى أحضان أمى, ومن بعده وجودك جنبى.
مطمنه ومش خايفه, واثقه فيك وفى خطواتك فى حياتنا. وفى كلامك وأفعالك.. مرتاحه طول ما انا جنبك و فخوره بيك,, وهقول للدنيا كلها هو ده حبيبى, هو ده الانسان اللى حلمت بيه عمرى بحاله, هو ده حبيبى اللى يستحق قلبى وروحى وعقلى وكل ما فيا.