مودك إيه؟؟! (بكسر الدال)
هو ده السؤال اللى سالته لنفسى .. حسيت انى عاوزة اكتب حاجه بس مش عارفه اكتب ايه ولا عن ايه..
ممكن احاول اوصف ال ... لالا بلاش كلمة وصف احسن انا لسه طالعه من إمتحان العربى وزهقانه وصف وكناية وتشبيه وبدل ومفعول به وفيه ولأجله .. خلاص مش واصفه حاجه..
طيب أتكلم عن الامتحان اللى فات,, بصراحه من وانا صغيرة باحب عمرو دياب واللى يحب حد لازم يسمع كلامه وانا دايما باسمع كلام عمرو لما قال (ما بلاش نتكلم فى الماضى) والامتحان ده بقى ماضى خلاص حلو بقى ولا وحش خلصت مش هافتكره تانى .
بس عارفين ايه المشكلة , انى مطلوب منى انسى كل ابيات الشعر ومقولات النثر وشرح النقاط وتفاصيل الشرح والعناصر والتحليل وارمى كل اللى دخلته نافوخى فى الاسبوع اللى فات علشان اوسع مكان لحاجات جديدة وعناصر جديدة وشرح تانى وتفاصيل تانية.
واصعب ما فى الموضوع ان بعد العملية المعقدة دى المفروض انسى كل اللى هادخله خلال اليومين الجايين علشان ادخل حاجات جديدة مرة تانية لحد ما تخلص الامتحانات ومالقيش فى دماغى حاجه .. فجاه بعد كل المجهود ده والعناء اشعر بفراغ فكرى مفاجأ .. ما فيش حاجه علشان تخرج , وقليلة الحاجات اللى هاتدخل ..
طيب كفاينا من سيرة الامتحانات علشان كفاية اللى الواحد فيه . طب اتكلم عن ايه انا دلوقتى ما هو مودى مش جايبنى اتكلم عن الحب لانى لو اتكلم فيه دلوقتى هأعك .. J :$
طب ممكن اقول حاجه عن اى حاجه .. ممكن اقول انى مبسوطة بس علشان بأكل آيس كريم باحبه دلوقتى.. مع اننا فى عز الشتا (المفروض) بس الجو كان حر قوى النهاردة وانا مشيت فى الشمس كتير ..
بس بس جبت التايهه انا مشيت فى الشمس كتير علشان كده باخرف .. يبقى خلاص بقى ما تاخدوش على كلامى .. كل امتحان وانا طيبة , وانتم كمان
ليست هناك تعليقات:
إرسال تعليق